07-Jul-2024

ବୌଦ୍ଧ (ଜୟାନନ୍ଦ ମିଶ୍ର): ବୌଦ୍ଧ ଜିଲ୍ଲା ପାଣ-ଗଣ୍ଡା ସମାଜ ବିକାଶ ପରିଷଦ ପକ୍ଷରୁ ସାଧାରଣ ସମ୍ପାଦକ ସୁଧାଂଶୁ ଡାଙ୍ଗଙ୍କ ନେତୃତ୍ୱରେ ଏକ ଦଶ ଜଣିଆ ପ୍ରତିନିଧି ଦଳ ଜିଲ୍ଲାପାଳଙ୍କୁ ଭେଟି ଛୁଆଁ ଅଛୁଆଁ ଭେଦଭାବ ତଥା ଜାତିଆଣ ଆକ୍ଷେପରେ ସଂପୃକ୍ତ ଶିକ୍ଷକଙ୍କ ବିରୁଦ୍ଧରେ କାର୍ଯ୍ୟାନୁଷ୍ଠାନ ଗ୍ରହଣ ସକାଶେ ଦୃଢ଼ ଦାବୀ କରିଛନ୍ତି । ଏ ନେଇ ଅଗ୍ରଣୀ ସାମାଜିକ ସଂଗଠନ ପକ୍ଷରୁ ସାମ୍ବିଧାନିକ ଅଧିକାର ପାଇଁ ଜିଲ୍ଲାପାଳ ଜେ ସୋନାଲ୍ ଙ୍କୁ ଏକ ଲିଖିତ ଅଭିଯୋଗ ପତ୍ର ଦାଖଲ କରିଛନ୍ତି ।
  ପ୍ରକାଶ ଥାଉକି , ଗତ ସରସ୍ଵତୀ ପୂଜା ସମୟରେ କଣ୍ଟାମାଳ ବ୍ଲକ୍ ଯୋଗିନ୍ଦ୍ରପୁର ବିଦ୍ୟାଳୟରେ ଗଣ୍ଡା ଜାତିର ଦଶମ ଶ୍ରେଣୀର ଛାତ୍ର ଶକ୍ତି ସଞ୍ଜତ ହରିପାଲ ଡାଲି ଓ ଖିରି ବାଲଟି ଛୁଇଁ ଦେବା ଘଟଣାକୁ ନେଇ ସଂସ୍କୃତ ଶିକ୍ଷୟତ୍ରୀ ଅନୁଶୟା ଦେବୀ ଉକ୍ତ ଛାତ୍ରଙ୍କୁ କଟୁ ଭାଷାରେ ଗାଳିଗୁଲଜ କରିବା ସହିତ ଜାତିଆଣ ଆକ୍ଷେପ କରିଥିଲେ । ସେଥିରେ ବିଦ୍ୟାଳୟର ପ୍ରଧାନ ଶିକ୍ଷକ ପ୍ରକାଶ ଚନ୍ଦ୍ର ପ୍ରଧାନ ଏବଂ ବିଜ୍ଞାନ ଶିକ୍ଷକ ମନୋଜ୍ କୁମାର ସାହୁ ମଧ୍ଯ ସଂପୃକ୍ତ ଥିଲେ। ତାହାକୁ ନେଇ ଅଗ୍ରଣୀ ସାମାଜିକ ସଂଗଠନ ବୌଦ୍ଧ ଜିଲ୍ଲା ପାଣ-ଗଣ୍ଡା ସମାଜ ବିକାଶ ପରିଷଦ ପକ୍ଷରୁ ଗତ ଫେବୃଆରୀ ମାସ ୧୭ତାରିଖରେ ମନମୁଣ୍ଡା ଥାନାରେ ଏତଲା ଦେବା ସହିତ ଜିଲ୍ଲା ଶିକ୍ଷାଅଧିକାରୀ ଗେନ୍ଦେରା କୁଜୁରଙ୍କ ପାଖରେ ଅଭିଯୋଗ କରିଥିଲା । ଅଭିଯୋଗକୁ ଭିତ୍ତି କରି , ଜିଲ୍ଲା ଶିକ୍ଷା ଅଧିକାରୀ ଜାତିଆଣ ଆକ୍ଷେପରେ ସଂପୃକ୍ତ ଥିବା ତିନି ଜଣ ଶିକ୍ଷକଙ୍କ ମଧ୍ୟରୁ କେବଳ ସଂସ୍କୃତ ଶିକ୍ଷୟତ୍ରୀ ଅନୁଶୟା ଦେବୀଙ୍କୁ ଚାକିରୀରୁ ନିଲମ୍ବିତ କରିଥିଲେ। ଅନ୍ୟ ଦୁଇ ଜଣ ଶିକ୍ଷକଙ୍କ ବିରୁଦ୍ଧରେ କାର୍ଯ୍ୟାନୁଷ୍ଠାନ ଗ୍ରହଣ କରିବା ଦାବୀରେ ସଂଗଠନ ପକ୍ଷରୁ ଗତ ମାର୍ଚ୍ଚ ମାସ ୨୧ ତାରିଖରେ ଜିଲ୍ଲା ଶିକ୍ଷା ଅଧିକାରୀଙ୍କ କାର୍ଯ୍ୟାଳୟ ଆଗରେ ବିକ୍ଷୋଭ ଓ ଗଣଧାରଣା ଦେବା ସହିତ ଦୀର୍ଘ ସମୟ ଘେରାଉ କରିବା ପରେ ଘଟଣା ସ୍ଥଳକୁ ଶ୍ରୀ କୁଜୁର୍ ଆସି ଆନ୍ଦୋଳନକାରୀଙ୍କ ସହ ଆଲୋଚନା କରି ଜୁନ୍ ମାସ ସୁଦ୍ଧା ପ୍ରଧାନ ଶିକ୍ଷକ ଏବଂ ବିଜ୍ଞାନ ଶିକ୍ଷକ ଙ୍କ ବିରୁଦ୍ଧରେ କାର୍ଯ୍ୟାନୁଷ୍ଠାନ ଗ୍ରହଣ କରାଯିବାର ଲିଖିତ ପ୍ରତିଶୃତି ପ୍ରଦାନ ପରେ ଆନ୍ଦୋଳନ ପ୍ରତ୍ୟାହୃତ ହୋଇଥିଲା ।
      ଉକ୍ତ ଦୁଇ ଜଣ ଶିକ୍ଷକ ଙ୍କୁ ନିଲମ୍ବନ କରିବା ପରିବର୍ତ୍ତେ ଗତ ଜୁନ୍ ମାସ ୨୮ ତାରିଖରେ ଜିଲ୍ଲା ଶିକ୍ଷା ଅଧିକାରୀ ଅନ୍ୟତ୍ର ବଦଳି କରିଥିବା ପ୍ରତିବାଦରେ ଏବଂ କାର୍ଯ୍ୟାନୁଷ୍ଠାନ ଗ୍ରହଣ ସକାଶେ ଆଜି ସଂଗଠନ ପକ୍ଷରୁ ଜିଲ୍ଲାପାଳ ଜେ ସୋନାଲ ଙ୍କୁ ଭେଟି ଆଲୋଚନା କରିବା ସହିତ ଦୃଢ଼ ଯୁକ୍ତି ଉପସ୍ଥାପନ କରାଯାଇଥିଲା  । ଦୀର୍ଘ ସମୟ ଆଲୋଚନା ପରେ ଉପ ଜିଲ୍ଲାପାଳ ପ୍ରଭାସ ଚନ୍ଦ୍ର ଦଣ୍ଡସେନା ଙ୍କ ନେତୃତ୍ୱରେ ଏକ କମିଟି ଗଠନ କରି ଘଟଣା ସମ୍ପର୍କରେ ପୁଙ୍ଖାନୁପୁଙ୍ଖ ତଦନ୍ତ କରି ଯଥା ଶୀଘ୍ର କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ଜିଲ୍ଲାପାଳ ମହୋଦୟ ପ୍ରତିନିଧି ମଣ୍ଡଳୀ କୁ ପ୍ରତିଶୃତି ପ୍ରଦାନ କରିଥିଲେ । ଏହି ପ୍ରତିନିଧି ମଣ୍ଡଳୀ ରେ ଅନ୍ୟ ମାନଙ୍କ ମଧ୍ୟରେ ସଙ୍ଗଠନର ମୂଖ୍ୟ ଉପଦେଷ୍ଟା ବଟକୃଷ୍ଣ ପ୍ରଧାନ , ଜିଲ୍ଲା ଉପ ସଭାପତି ଦଶରଥ ବେହେରା , ଯୁଗ୍ମ ସମ୍ପାଦିକା ସେବତୀ ବେହେରା , ସହକାରୀ କୋଷାଧ୍ୟକ୍ଷ ଶ୍ରୀନିବାସ ହାତୀ , ଜିଲ୍ଲା କାର୍ଯ୍ୟକାରିଣୀ ସଦସ୍ୟ ନନ୍ଦିନୀ ନାଏକ , କ୍ଷେତ୍ର ମୋହନ ମହାନନ୍ଦ , ସଂଜିତ୍ କୁମାର ଜେନା , ବରିଷ୍ଠ ସମାଜସେବୀ ଜୟରାମ ହରିପାଲ , ଅନ୍ତରାମ ହରିପାଲ ପ୍ରମୁଖ ଯୋଗଦେଇ ସକ୍ରିୟ ଅଂଶଗ୍ରହଣ କରିଥିଲେ ।