01-Jul-2024

ବାଲାଙ୍ଗୀର(ପ୍ରେରଣା ଖବର): ଏବେ ରାଜ୍ୟ ଓ କେନ୍ଦ୍ରରେ ଭାଜପା ସରକାର ଆସିଛି। ଡବଲଇଞ୍ଜିନ ସରକାରରେ ଲୋକେ ଅଧିକଲୋକ ଲାଭାର୍ଥୀ ହେବେ ବୋଲି ପ୍ରଧାନମନ୍ତ୍ରୀ କହୁଛନ୍ତି । ବଲାଙ୍ଗୀର ଜିଲ୍ଲାରେ ମଧ୍ୟ ସାଂସଦ ଓ ୪ଜଣ ବିଧାୟକ ଭାଜପାଦଳରୁ ଜିଣିଛନ୍ତି। ପାଟଣାଗଡ ବିଧାୟକ କନକବର୍ଦ୍ଧନ ସିଂଦେଓ ରାଜ୍ୟଉପମୁଖ୍ୟମନ୍ତ୍ରୀ ଓ ଲୋଇସିଂହାର ବିଧାୟକ ଡ.ମୁକେଶ ମହାଲିଙ୍ଗ ରାଜ୍ୟ ସରକାରରେ ସ୍ୱାସ୍ଥ୍ୟମନ୍ତ୍ରୀ ଦାୟୀତ୍ୱ ପାଇଛନ୍ତି । ଏଣୁକରି ବଲାଙ୍ଗୀରବାସୀଙ୍କ ଆଶା ରହିଛି ଯେ,ବଲାଙ୍ଗୀରରେ ଥିବା କେନ୍ଦ୍ରସରକାରଙ୍କ ସାମାଜିକ ନ୍ୟାୟ ଓ ଦିବ୍ୟାଙ୍ଗ ସଶକ୍ତିକରଣ ବିଭାଗ ଦ୍ୱାରା ପରିଚାଳିତ ଏସଭିନୀରତାର ସେଟେଲାଇଟ ସେଣ୍ଟର ପୂର୍ଣ୍ଣ କାର୍ଯ୍ୟକ୍ଷମ ହେବ । ଅନୁଷ୍ଠାନକୁ ଆବଶ୍ୟକ ଜମିମିଳିବ ଓ ଏକ ସ୍ୱୟଂସଂପୂର୍ଣ୍ଣ ଅନୁଷ୍ଠାନ ହୋଇପାରିବ । 
   ନବୀନସରକାର ଚାଲିଥିବା ବେଳେ କେନ୍ଦ୍ରଅବହେଳା କରୁଥିବା ଅଭିଯୋଗ ଉଠୁଥିଲା । ଠିକସେହିପରି କେନ୍ଦ୍ରୀୟ ଅନୁଷ୍ଠାନ ଗୁଡିକୁ ରାଜ୍ୟସରକାର ସହଯୋଗ କରୁନଥିବା ମଧ୍ୟ ଭାଜପା ଅଭିଯୋଗ୍ ଉଠାଉଥିଲା । କିନ୍ତୁ ଏବେ ଉଭୟ କେନ୍ଦ୍ର ଓ ଓଡିଶା ରାଜ୍ୟରେ ଭାଜପାଦଳର ଡବଲଇଞ୍ଜିନ ସରକାର ଚାଲିଛି । ଏଥିରେ ଅନେକ କେନ୍ଦ୍ରୀୟ ଅନୁଷ୍ଠାନ ଉପକୃତ ହେବେ ବୋଲି ଆଶା କରାଯାଉଛି । ସେହିକ୍ରମରେ ବଲାଙ୍ଗୀରଠାରେ ଥିବା ଓଲଟପୁର ଏସଭିନୀରତାର ଅନୁଷ୍ଠାନର ସେଟେଲାଇଟ ସେଣ୍ଟର ମଧ୍ୟ ଉପକୃତ ହେବ ବୋଲି ଆଶା କରାଯାଉଛି । ଗତ ୬ବର୍ଷ ହେଲା ଏହି ଅନୁଷ୍ଠାନକୁ ରାଜ୍ୟସରକାର ତଥା ବଲାଙ୍ଗୀର ଜିଲ୍ଲାପ୍ରଶାସନ ସହଯୋଗ କରୁନଥିଲା । ରାଜ୍ୟସରକାର ଏହି ଅନୁଷ୍ଠାନକୁ ମାତ୍ର ୩ଏକର ଜମି ଯୋଗାଇ ଦେଇଛନ୍ତି । ଆଉ ୨ଏକର ଜମି ପାଇଁ ଅନୁଷ୍ଠାନର କତ୍ତୃପକ୍ଷ ପ୍ରଶାସନ ପାଖକୁ ଧାଉଁଛନ୍ତି । ଏହି ୨ଏକର ଜମି ମିଳିଲେ ବଲାଙ୍ଗୀରର ଏହି ଅନୁଷ୍ଠାନ ପକ୍ଷରୁ ଦିବ୍ୟାଙ୍ଗମାନଙ୍କ ପାଇଁ ଏକ ନିଜସ୍ୱ ହସପିଟାଲ ଓ ତାଲିମକେନ୍ଦ୍ର ସ୍ଥାପନ କରାଯିବାର ପ୍ରସ୍ତାବ ରହିଛି । କିନ୍ତୁ ବଲାଙ୍ଗୀର ଜିଲ୍ଲା ପ୍ରଶାସନ ଆଉ ୨ଏକର ଜମି ଯୋଗାଇ ଦେବାରେ ବିଫଳ ହୋଇଛନ୍ତି । ଏପରିକି ଏହି ଅନୁଷ୍ଠାନକୁ ଲାଗିରହିଥିବା ସରକାରୀ ଜମିକୁ ଜବରଦଖଲକାରୀଙ୍କ ହାତକୁ ପ୍ରଶାସନ ଟେକି ଦେଇଛି । ଜବରଦଖଲକାରୀଙ୍କ ସାଙ୍ଗରେ କିଛି ପ୍ରଭାବଶାଳୀ ବ୍ୟକ୍ତି ରହିଛନ୍ତି ଓ ସେମାନେ ପ୍ରଶାସନକୁ ପ୍ରଭାବିତ କରି ଜବରଦଖଲ ଜମିରେ କରିଥିବା ଘରଗୁଡିକୁ ବିଦ୍ୟୁତ ସଂଯୋଗ ସହ ରାସ୍ତାଘାଟ ଓ ପାନୀୟଜଳର ବ୍ୟବସ୍ଥା ମଧ୍ୟ କରାଇଛନ୍ତି । 
    ସୂଚନାରୁ ଜଣାଯାଇଛି ଯେ, ପଶ୍ଚିମାଞ୍ଚଳର ଦିବ୍ୟାଙ୍ଗମାନେ ଚିକିତ୍ସା ପାଇଁ କଟକ ଓଲଟପୁର ସ୍ଥିତ ସ୍ୱାମୀ ବିବେକାନନ୍ଦ ଜାତୀୟ ପୁନର୍ବାସ ପ୍ରଶିକ୍ଷଣ ଓ ଅନୁସଂନ୍ଧାନ ସଂସ୍ଥାନ ଯାଇ ଖର୍ଚ୍ଚାନ୍ତ ହେଉଥିଲେ । ତେଣୁ ଏହି ଅଞ୍ଚଳର ଲୋକଙ୍କ ସୁବିଧା ପାଇଁ କେନ୍ଦ୍ରସରକାରଙ୍କ ସାମାଜିକ ନ୍ୟାୟ ଓ ଅଧିକାରିତା ମନ୍ତ୍ରାଳୟ,ଦିବ୍ୟାଙ୍ଗଜନ ସଶକ୍ତିକରଣ ବିଭାଗ ପକ୍ଷରୁ ବଲାଙ୍ଗୀରରେ ଏସଭିନୀରତାରର ଏକ ସେଟେଲାଇଟ ସେଣ୍ଟର ଖୋଲିବାକୁ ପ୍ରସ୍ତାବ କରିଥିଲେ । ଏହି ଅନୁଷ୍ଠାନ ପାଇଁ ମୋଟ ୫ଏକର ଜମି ଆବଶ୍ୟକ କରୁଥିବା ବେଳେ ପ୍ରଶାସନ ମାତ୍ର ୩ଏକର ଜମି ଯୋଗାଇ ଦେଇ ପରେ ଆବଶ୍ୟକ ଜମି ପୁଣି ଯୋଗାଇଦେବ ବୋଲି କହିଥିଲା । ପ୍ରାୟ ୫କୋଟି ଟଙ୍କାରେ ଏଠାରେ ବିଲଡିଂନିର୍ମାଣ ହୋଇ ଆନୁଷଙ୍ଗିକ ଯନ୍ତ୍ରପାତି ଆସି ଗତ ୨୦୧୮ ମସିହାରେ ବଲାଙ୍ଗୀର ବିଜାଖମନ ମୌଜାର କେନ୍ଦ୍ରୀୟବିଦ୍ୟାଳୟ-୨ ପାଖରେ ଅନୁଷ୍ଠାନଟି ଆରମ୍ଭ ହେଲା । ଏବେ ହଜାର ହଜାର ସଂଖ୍ୟାରେ ଦିବ୍ୟାଙ୍ଗ ଶିଶୁ ଓ ବ୍ୟକ୍ତି ଏହି ଅନୁଷ୍ଠାନରୁ ଉପକୃତ ହେଉଛନ୍ତି । ଏହା ବ୍ୟତିତ ସ୍ନାୟୁଜନିତ ଓ ଅରଥୋପେଡିକ୍ସ ସମସ୍ୟା ଥିବା ଲୋକେ ଫିଜିଓଥେରାପି ଭଳି ଚିକିତ୍ସାର ସୁବିଧା ପାଉଛନ୍ତି । ଏବେ ଜଣେ ନିର୍ଦ୍ଦେଶକଙ୍କ ସମେତ ବିଭିନ୍ନ ବିଭାଗର ଡାକ୍ତର ଓ କର୍ମଚାରୀଙ୍କୁ ମିଶାଇ ପ୍ରାୟ ୧୬ଜଣ ବ୍ୟକ୍ତି ଏଠାରେ କାର୍ଯ୍ୟରତ ଅଛନ୍ତି । ଏବେ ଏଠାରେ ଫିଜିଓଥେରାପି, ଅକ୍ୟୁପେସନାଲ ଥେରାପି, ପ୍ରୋସଥେଷ୍ଟିକସ ଓ ଅରଥୋଟିକସ,ସ୍ପେସିଏଲ ଏଜୁକେସନ,ସ୍ପିଚ ଓ ହିୟରିଂ, ସୋସିଆଲୱାର୍କ ଏଣ୍ଡ ପ୍ଲେସମେଣ୍ଟ ୟୁନିଟ, ଓରିଏଣ୍ଟେସନ ଏଣ୍ଡ ମୋବିଲିଟି ଟ୍ରେନିଂ, ଭୋକେସନଲା ଟ୍ରେନିଂ, କ୍ଲିନିକାଲ ସାଇକୋଲୋଜି ଭଳି ଚିକିତ୍ସା ଚାଲିଛି । କଟିଯାଇଥିବା ହାତଗୋଡ ବଦଳରେ କୃତୃିମ ହାତଗୋଡ ଲଗାଯାଇ ଦିବ୍ୟାଙ୍ଗ ପାଲଟିଯାଇଥିବା ଲୋକଙ୍କ ପାଇଁ ଆଶାର କିରଣ ଦେଉଛନ୍ତି । ଦିବ୍ୟାଙ୍ଗମାନଙ୍କୁ ଚିକିତ୍ସା ସୁବିଧା ସହ କୃତିମହାତଗୋଡ ଲଗାଇ ବଞ୍ଚିବାପାଇଁ ଜୀବନଜୀବିକାର ତାଲିମ ମଧ୍ୟ ଦେଉଛନ୍ତି । ସମାଜର ଅବହେଳିତ ବର୍ଗଙ୍କୁ ସାମାଜିକ ନ୍ୟାୟ ଦେବାରେ ଏହି ଅନୁଷ୍ଠାନର ଯଥେଷ୍ଟ ଭୂମୀକା ରହିଛି । ଏବେ ଆଗକୁ ଏକ ତାଲିମ କେନ୍ଦ୍ର ଓ ୫୦ ଶର୍ଯ୍ୟା ବିଶିଷ୍ଟ ହସପିଟାଲ ପାଇଁ ଅନୁଷ୍ଠାନକୁ ଆଉ ୨ଏକର ଜମିର ଆବଶ୍ୟକତା ରହିଛି । ଅନୁଷ୍ଠାନ ପକ୍ଷରୁ ବହୁବର୍ଷ ହେଲା ବଲାଙ୍ଗୀର ଜିଲ୍ଲା ପ୍ରଶାସନକୁ ଏନେଇ ଚିଠିକରି ଜମି ଦେବାକୁ ଅନୁରୋଧ କରାଯାଇଛି । କିନ୍ତୁ ଏପର୍ଯ୍ୟନ୍ତ ବଲାଙ୍ଗୀର ଜିଲ୍ଲାପ୍ରଶାସନ କୌଣସି ପଦକ୍ଷେପ ନେଉନାହାଁନ୍ତି । ଏବେ ରାଜ୍ୟସରକାର ପଦକ୍ଷେପ ନେବେ ବୋଲି ଆଶା କରାଯାଉଛି । ବଲାଙ୍ଗୀର ଜିଲ୍ଲାରୁ ପ୍ରତିନିଧିତ୍ୱ କରୁଥିବା ଉପମୁଖ୍ୟମନ୍ତ୍ରୀ କନକବର୍ଦ୍ଧନ ସିଂଦେଓ,ସ୍ୱାସ୍ଥ୍ୟମନ୍ତ୍ରୀ ଡ.ମୁକେଶ ମହାଲିଙ୍ଗ ଓ ଭାଜପା ସାଂସଦ ସଂଗୀତାକୁମାରୀ ସିଂଦେଓ ଏଥିପ୍ରତି ଧ୍ୟାନ ଦେବାକୁ ଜନସାଧାରଣରେ ଦାବି ହେଉଛି ।