25-May-2024

ବଲାଙ୍ଗୀର(ପ୍ରେରଣା ଖବର): ବଲାଙ୍ଗୀର ଜିଲ୍ଲାରେ ଜଳସେଚନ ହାର ବଢୁନଥିବାରୁ ରବିଧାନଚାଷ ପରିମାଣ ମଧ୍ୟ ବଢିପାରୁନାହିଁ । ଚଳିତବର୍ଷ ବଲାଙ୍ଗୀର ଜିଲ୍ଲାରେ ମାତ୍ର ୭୭୯୮ ହେକ୍ଟର ଜମିରେ ରବି ଧାନଚାଷ ହୋଇଥିବା କୃଷିବିଭାଗ ସୂତ୍ରରୁ ଜଣାଯାଇଛି । ସେଥିମଧ୍ୟରେ ବଲାଙ୍ଗୀର ଉପଖଣ୍ଡର ଆଗଲପୁର ବ୍ଲକରେ ୧୧୨୦ ହେକ୍ଟର, ଦେଓଗାଁ ବ୍ଲକରେ ୧୦୩୩ ହେକ୍ଟର, ଗୁଡଭେଲା ବ୍ଲକରେ ୧୧୮୦ ହେକ୍ଟର, ବଲାଙ୍ଗୀର ବ୍ଲକରେ ୩୯୫ହେକ୍ଟର, ପୁଇଁତଳା ବ୍ଲକରେ ୩୫୦ ହେକ୍ଟର, ଲୋଇସିଂହା ବ୍ଲକରେ ୪୩୫ ହେକ୍ଟର ଏପରି ମୋଟ-୪୫୧୩ ହେକ୍ଟର ଜମିରେ ରବିଧାନଚାଷ ହୋଇଛି । ସେହିପରି ଟିଟିଲାଗଡ ଉପଖଣ୍ଡର ଟିଟିଲାଗଡ ବ୍ଲକରେ ୭୦୦ ହେକ୍ଟର, ସଇଁତଳା ବ୍ଲକରେ ୩୩୦ ହେକ୍ଟର, ମୁରିବାହାଲ ବ୍ଲକରେ ୧୮୦ହେକ୍ଟର, ବଙ୍ଗୋମୁଣ୍ଡା ବ୍ଲକରେ ୩୫୦ହେକ୍ଟର, ତୁରେକେଲା ବ୍ଲକରେ ୨୮୦ହେକ୍ଟର ଏପରି ମୋଟ ୧୭୪୦ ହେକ୍ଟର ଓ ପାଟଣାଗଡ ଉପଖଣ୍ଡର ପାଟଣାଗଡ ବ୍ଲକରେ ୬୮୫ ହେକ୍ଟର, ବେଲପଡା ବ୍ଲକରେ ୩୨୦ ହେକ୍ଟର ଓ ଖପ୍ରାଖୋଲ ବ୍ଲକରେ ୫୪୦ ହେକ୍ଟର ଜମି ଏପରି ମୋଟ ୧୫୪୫ ହେକ୍ଟର ଜମିରେ ରବିଧାନ ଚାଷ ହୋଇଛି । ତିନିଟି ଯାକ ଉପଖଣ୍ଡକୁ ମିଶାଇ ଜିଲ୍ଲାରେ ମୋଟ ୭୭୯୮ ହେକ୍ଟର ଜମିରେ ରବିଧାନ ଚାଷ ହୋଇଛି । ବିଗତ କିଛିବର୍ଷ ହେଲା ଜିଲ୍ଲାର ଦେଓଗାଁ ବ୍ଲକ ଅଞ୍ଚଳରେ ଆଖୁଚାଷ ପରିମାଣ କମିଯାଇଥିବାରୁ ସେହି ଜମି ମାନଙ୍କରେ ଉଠା ଜଳସେଚନ ଜରିଆରେ ଧାନଚାଷ ପରିମାଣ ବଢିଛି । ଦେଓଗାଁର କିଛି ଅଂଶ ଓ ଗୁଡଭେଲା ବ୍ଲକର କିଛି ଅଂଶରେ ତେଲନଦୀର ମେଗାଲିଫ୍ଟ ପଏଣ୍ଟ ଜରିଆରେ ଜଳସେଚିତ କରାଯାଇଛି ।ସେଥିପାଇଁ ଏହି ଦୁଇ ବ୍ଲକରେ କିଛିମାତ୍ରାରେ ଅଧିକ ରବିଧାନ ଚାଷ ହୋଇଛି । ତେବେ ରାଜ୍ୟସରକାର ଏତେ ପରିମାଣର ଯୋଜନା କରୁଥିଲେ ହେଁ ଜିଲ୍ଲାରେ ନିଶ୍ଚିତ ଜଳସେଚନ ହାର ବଢିପାରୁନାହିଁ । ଆଗଲପୁର ବ୍ଲକ ଅଞ୍ଚଳ କିଛି ଅଂଶରେ ମଧ୍ୟ ହିରାକୁଦ କେନାଲର ପାଣି ମାଡୁଛି। ସେହି କାରଣରୁ ଆଗଲପୁର ବ୍ଲକଅଞ୍ଚଳରେ ମଧ୍ୟ ସାମାନ୍ୟ ଅଧିକ ରବିଧାନ ଚାଷ ହୋଇଛି । ରବିଧାନ ବିକ୍ରୀ ପାଇଁ ମୋଟ ୭୭୬୯ ଜଣ ଚାଷ ପଞ୍ଜିକୃତ ହୋଇଛନ୍ତି । ସେମାନଙ୍କର ଧାନ କିଣିବାକୁ ଯୋଗାଣ ନିଗମକୁ ମାତ୍ର ୨.୫ଲକ୍ଷ କ୍ୱିଣ୍ଟାଲର ଟାର୍ଗେଟ ଆସିଛି ବୋଲି ଜିଲ୍ଲା ଯୋଗାଣବିଭାଗ ସୂତ୍ରରୁ ଜଣାଯାଇଛି। ଧାନ କିଣାରେ ଜିଲ୍ଲାର ମୋଟ ୧୦୩ଟି ପେକ୍ସ ଓ ୧୦ ସ୍ୱୟଂସହାୟିକା ଗୋଷ୍ଠୀ ଭାଗନେବେ। ଏହି ଧାନକୁ ୫୦ଟି ମିଲକୁ ଦିଆଯିବ । ମଣ୍ଡିଗୁଡିକରେ ଆବଶ୍ୟକ ବ୍ୟବସ୍ଥା କରିବାକୁ ବଲାଙ୍ଗୀର, କଣ୍ଟାବାଞ୍ଜି ଓ ପାଟଣାଗଡ ଆରଏମସିକୁ ନିର୍ଦ୍ଦେଶ କରା ଯାଇଥିଲା । ଆସନ୍ତା ୨୭ ତାରିଖରୁ ଧାନକିଣା ବିକା ଆରମ୍ଭ ହେବାକୁ ଯାଉଛି । ପ୍ରକାଶ ଯେ,ଚଳିତ ବର୍ଷ ଖରିଫରେ ବଲାଙ୍ଗୀର ଜିଲ୍ଲାରେ ମୋଟ ୮୯,୪୨୩ଜଣ ଚାଷି ପଞ୍ଜିକୃତ ହୋଇଥିଲେ । ସେମାନଙ୍କ ମଧ୍ୟରୁ ୭୫,୦୪୪ ଜଣ ଚାଷି ସେମାନଙ୍କର ୩୪,୩୪,୩୭୩ କ୍ୱିଣ୍ଟାଲ ଧାନ ବିକ୍ରୀ କରିଥିବା ଜଣାପଡିଛି । ଠିକ ସେହିପରି ଗତବର୍ଷ (୨୦୨୨-୨୩) ରବିରେ ମୋଟ ୭,୮୨୧ ଜଣଚାଷି ପଞ୍ଜିକୃତ ହୋଇ ୨,୭୦,୮୦୩ କ୍ୱିଣ୍ଟାଲ ଧାନ ବିକ୍ରୀ କରିଥିଲେ । ତେବେ ଜିଲ୍ଲାର ଯେତେ ପରିମାଣ ଜମିରେ ରବିଧାନ ଚାଷ ହୋଇଛି ସେହି ସବୁ ଜମି ଧାନବିକ୍ରୀ ପାଇଁ ପଞ୍ଜିକୃତ ହୋଇପାରିନାହିଁ । କେତେକ ଜମିରେ ଝଲଶେଚିତ ବ୍ୟବସ୍ଥା କରି ରବୁଧାନ ଚାଷ କରୁଥିଲେ ହେଁ ସେହି ଜମିର କିସମ ପରିବର୍ତ୍ତନ ହୋଇପାରୁନଥିବାରୁ ସେହି ଜମିର ଧାନ ପଞ୍ଜିକରଣ କରିବାକୁ ଚାଷି ସକ୍ଷମ ହେଉନାହିଁ । ଜିଲ୍ଲାରେ ମୋଟ ୭୭୯୮ ହେକ୍ଟର ଜମିରେ ରବିଧାନ ଚାଷ ହୋଇଥିବା ବେଳେ ଏକର ପିଚ୍ଛା ୨୨କ୍ୱିଣ୍ଟାଲ ଧାନ ଅମଳ ହେଲେ ସେଥିରୁ ପ୍ରାୟ ୩ଲକ୍ଷ୮୦ ହଜାର କ୍ୱିଣ୍ଟାଲ ଧାନ କିଣାଯାଇ ପାରନ୍ତା । କିନ୍ତୁ ତାହା କରାଯାଇ ପାରୁନାହିଁ । ଫଳରେ ଚାଷିମାନେ ଅଭାବୀ ବିକ୍ରୀର ସମ୍ମୁଖିନ ହୋଇ ମଧ୍ୟସ୍ଥି ହାତରେ କମଦରରେ ଧାନ ବିକ୍ରୀ କରିବାକୁ ବାଧ୍ୟ ହେଉଛନ୍ତି । ଏନେଇ ବଲାଙ୍ଗୀର ଜିଲ୍ଲା ମୁଖ୍ୟ ଯୋଗାଣ ଅଧିକାରୀ ବି.ପ୍ରଭାକର ପାତ୍ରଙ୍କୁ ପଚାରିବାରୁ ଆମ ପାଖରେ ଯେତେ ଚାଷି ପଞ୍ଜିକୃତ ହୋଇଛନ୍ତି ସେହି ଆଧାରରେ ଟାର୍ଗେଟ ମଗାଯାଇଛି ବୋଲି କହିଛନ୍ତି ।