03-May-2024

ସିନ୍ଧେକେଲା (ଦୀନେଶ ଜୈନ ): ବର୍ତ୍ତମାନ ସବୁଠାରୁ ଉତ୍ତପ୍ତ ସହର ଟିଟିଲାଗଡ଼ ନିକଟରେ ଅବସ୍ଥିତ ସିନ୍ଧେକେଲା ଅଂଚଳରେ ପ୍ରଚଣ୍ଡ ଖରା ହେଉଥିବାବେଳେ ସିନ୍ଧେକେଲା ପଞ୍ଚାୟତର ଭତାସର ଗ୍ରାମରେ ଗତ ୧୦ ରୁ ୧୨ ଦିନ ହେଲା ପାଣି ପାଇଁ ଲୋକେ ହାହାକାର ହେଉଥିବା ଚର୍ଚ୍ଚା ର ବିଷୟ ପାଲଟିଛି । ଦୁଇ ଶହ ଜନ ସଂଖ୍ୟା ବିଶିଷ୍ଟ ଭତାସର ଗ୍ରାମରେ ଗ୍ରାମ୍ୟ ଜଳ ଯୋଗାଣ ବିଭାଗ ପକ୍ଷରୁ ଏକ ଓଭରହେଡ ଟ୍ୟାଙ୍କ ଲାଗି ଗ୍ରାମକୁ ପାଣି ଯୋଗାଣ ବ୍ୟବସ୍ଥା କରାଯାଇଛି । ଟ୍ୟାଙ୍କ ନିର୍ମାଣ ଦିନ ଠାରୁ ପାଞ୍ଚ ବର୍ଷ ପର୍ଯ୍ୟନ୍ତ ମେଣ୍ଟେନେନ୍ସ ପାଇଁ ଠିକାଦାରଙ୍କ ଦାୟିତ୍ୱ ରହିବା କଥା କିନ୍ତୁ କେବଳ ବର୍ଷେ ଦେଢ଼ ବର୍ଷ ହୋଇଛି ଏବେ ୧୦ , ୧୨ ଦିନରୁ ମୋଟର ପୋଡି ଯାଇଥିବାରୁ ତାକୁ ମରାମତି ହୋଇପାରୁ ନାହିଁ । ଏପଟେ ପ୍ରଚଣ୍ଡ ଖରାରେ ଲୋକେ ତ୍ରାହୀ ତ୍ରାହି ହେଉଥିବାବେଳେ ସେପଟେ ପାଣିକୁ ନେଇ ଲୋକେ ଟହଲ ବିକଳ ହେଉଛନ୍ତି । ସ୍ଥାନୀୟ ସରପଞ୍ଚ ନରେଶ ଅଗ୍ରୱାଲ ଉକ୍ତ ଠିକାଦାରଙ୍କ ସମେତ ବଙ୍ଗୋମୁଣ୍ଡା ବ୍ଲକ ଗ୍ରାମ୍ୟ ଜଳ ଯୋଗାଣ ବିଭାଗ ଯନ୍ତ୍ରୀ ସାରଦା ପ୍ରସାଦ ମହାନ୍ତି ବଙ୍ଗୋମୁଣ୍ଡା ବ୍ଲକ ବିଡ଼ିଓ ବାସନ୍ତି ସେଠୀ ପ୍ରମୁଖଙ୍କୁ ବାରମ୍ବାର ଅଭିଯୋଗ କରିଥିଲେ ସୁଦ୍ଧା କେହି କର୍ଣ୍ଣପାତ କରୁନାହାନ୍ତି । ଏ ସମ୍ପର୍କରେ ବଙ୍ଗୋମୁଣ୍ଡା ଗ୍ରାମ୍ୟ ଜଳ ଯୋଗାଣ ଯନ୍ତ୍ରୀ ମହାନ୍ତିଙ୍କୁ ପଚାରି ବୁଝିବାରୁ ଆସନ୍ତାକାଲି ଜଳ ଯୋଗାଣ ସ୍ୱାଭାବିକ ହୋଇଯିବ ବୋଲି କହିଛନ୍ତି । ଯଦି ନ ହୁଏ ତେବେ ଗ୍ରାମବାସୀ ଏକ ଆନ୍ଦୋଳନ କରିବେ ବୋଲି ଚେତାବନୀ ଦେଇଛନ୍ତି ।