02-May-2024

ଟିଟିଲାଗଡ଼/କଣ୍ଟାବାଞ୍ଜି(ପ୍ରେରଣା ଖବର ): ଆଜି ମୁଖ୍ୟମନ୍ତ୍ରୀ ତଥା ବିଜେଡି ସୁପ୍ରିମୋ ନବୀନ ପଟ୍ଟନାୟକ ପଶ୍ଚିମଓଡିଶାର କଣ୍ଟାବାଞ୍ଜି ଆସନର ବିଧାୟକ ପ୍ରାର୍ଥି ଭାବରେ ନାମାଙ୍କନପତ୍ର ଦାଖଲ କରିଛନ୍ତି। ସେ ଟିଟିଲାଗଡଠାରେ କଣ୍ଟାବାଞ୍ଜି ନିର୍ବାଚନମଣ୍ଡଳି ଦାୟୀତ୍ୱରେ ଥିବା ଅତିରିକ୍ତ ଜିଲ୍ଲାପାଳ ପବିତ୍ର ବେହେରାଙ୍କ ପାଖରେ ତାଙ୍କର ନାମାଙ୍କନପତ୍ର ଦାଖଲ କରିଛନ୍ତି । ଏହି ନାମାଙ୍କନପତ୍ର ଦାଖଲ ବେଳେ ନବୀନଙ୍କ ସହିତ ୫ଟି ଅଧ୍ୟକ୍ଷ ଭି.କେ.ପାଣ୍ଡିଆନ, ନବୀନଙ୍କ ବାଲ୍ୟବନ୍ଧୁ ତଥା ବିଜେଡିର ବରିଷ୍ଠ ରାଜ୍ୟ ଉପସଭାପତି ଅନଙ୍ଗଉଦୟ ସିଂଦେଓ, ଟିଟିଲାଗଡ ବିଧାୟିକା ପ୍ରାର୍ଥି ଟୁକୁନୀ ସାହୁ, ବଲାଙ୍ଗୀର ବିଧାୟକ ପ୍ରାର୍ଥି କଳିକେଶନାରାୟଣ ସିଂଦେଓ, ପ୍ରଣବ ବଳବନ୍ତରାୟ ପ୍ରମୁଖ ଉପସ୍ଥିତ ରହିଥିଲେ । ନବୀନ ପଟ୍ଟନାୟକ ହିଞ୍ଜଳି ପରେ ପଶ୍ଚିମଓଡିଶାର କଣ୍ଟାବାଞ୍ଜିକୁ ତାଙ୍କର ଦ୍ୱିତୀୟ ନିର୍ବାଚନମଣ୍ଡଳି ରୂପେ ବାଛିଛନ୍ତି । ଆଜି ନାମାଙ୍କନ ପାଇଁ ସେ ଭୁବନେଶ୍ୱରରୁ ଉଡାଜାହାଜରେ ଆସି ତୁଷୁରା ନିକଟସ୍ଥ ବଡଙ୍ଗୋମୁଣ୍ଡା ଉଡାଜାହାଜ ପଡିଆରେ ଓହ୍ଲାଇଥିଲେ । ତୁଷୁରା ପଡିଆରେ ରାଜ୍ୟସଭା ସାଂସଦ ନିରଂଜନ ବିଶି,ତୁଷୁରା ଏନଏସି ଅଧ୍ୟକ୍ଷ ଅଜୟ ଜୟସ୍ୱାଲ, ରାଜ୍ୟସଭା ସାଂସଦଙ୍କ ନୋମିନି ରମେଶ ଅଗ୍ରୱାଲ ମୁଖ୍ୟମନ୍ତ୍ରୀଙ୍କୁ ସ୍ୱାଗତ କରିଥିଲେ । ସେଠାରୁ ସେ ହେଲିକପ୍ଟରରେ ଟିଟିଲାଗଡ ଯାଇ ସିଟିସ୍କୁଲ ପଡିଆରେ ଓହ୍ଲାଇଥିଲେ । ହେଲିପେଡରେ ବିଜେଡିର ବରିଷ୍ଠନେତା ଅନଙ୍ଗଉଦୟ ସିଂଦେଓ, ବଲାଙ୍ଗୀର ପର୍ଯ୍ୟବେକ୍ଷକ ମନ୍ତ୍ରୀ

ନିରଂଜନ ପୂଜାହାରୀ, କଳିକେଶନାରାୟଣ ସିଂଦେଓ, ଟୁକୁନି ସାହୁ, ବଲାଙ୍ଗୀର ସାଂସଦପ୍ରାର୍ଥି ସୁରେନ୍ଦ୍ର ସିଂଭୋଇ, କଣ୍ଟାବାଞ୍ଜିର ପୂର୍ବତନ ବିଧାୟକ ଆୟୁବ ଖାନ,ଏସଡିସିର ଉପାଧ୍ୟକ୍ଷା ନୀରୁପମା ମାଝୀ, ବିକାଶ ପରିଷଦର ଏକ୍ସପର୍ଟ ମେମ୍ବର ହଂସରାଜ ଜୈନ, ଯୁବନେତା ଗିରିରାଜ ସିଂମାଝୀ ପ୍ରମୁଖ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କୁ ସ୍ୱାଗତ ଜଣାଇ ଏକ ଶୋଭାଯାତ୍ରାରେ ଉପଜିଲ୍ଲାପାଳଙ୍କ କାର୍ଯ୍ୟାଳୟ ପର୍ଯ୍ୟନ୍ତ ନେଇଥିଲେ । ହଜାର ହଜାର ସମର୍ଥକଙ୍କ ଗହଣରେ ନବୀନ ପଟ୍ଟନାୟକ ଉପଜିଲ୍ଲାପାଳଙ୍କ କାର୍ଯ୍ୟାଳୟରେ ପହଞ୍ଚି ତାଙ୍କର ନାମାଙ୍କନପତ୍ର ଦାଖଲ କରିଥିଲେ । ମୁଖ୍ୟମନ୍ତ୍ରୀଙ୍କ ଏହି ଗସ୍ତ ପାଇଁ ଟିଟିଲାଗଡ ସହର ଲୋକାରଣ୍ୟ ହୋଇଯାଇଥିଲା । କଣ୍ଟାବାଞ୍ଜି ନିର୍ବାଚନମଣ୍ଡଳିର କଣ୍ଟାବାଞ୍ଜି ଏନଏସି, ତୁରେକେଲା, ବଙ୍ଗୋମୁଣ୍ଡା, ମୁରିବାହାଲ ବ୍ଲକ ଓ ଟିଟିଲାଗଡ ନିର୍ବାଚନମଣ୍ଡଳିର ବ୍ଲକ ତଥା ସହରାଞ୍ଚଳରୁ ବିଜେଡି କର୍ମିମାନେ ଆସି ସାମିଲ ହୋଇଥିଲେ । ମୁଖ୍ୟମନ୍ତ୍ରୀଙ୍କ ଏହି ଗସ୍ତରେ ଶାନ୍ତିଶୃଙ୍ଖଳା ରକ୍ଷା ପାଇଁ ସମ୍ବଲପୁର ଆଇଜି ହିମାଂଶୁ ଲାଲ,ବଲାଙ୍ଗୀର ଏସପି ଋଷିକେଶ ଖିଲାରୀ ପ୍ରମୁଖଙ୍କ ସହ ବରିଷ୍ଠ ପୋଲିସ ଅଧିକାରୀମାନେ ଉପସ୍ଥିତ ରହିଥିଲେ । ସେହିପରି ଟିଟିଲାଗଡ ନିର୍ବାଚନମଣ୍ଡଳିର ବିଧାୟିକାପ୍ରାର୍ଥି ମନ୍ତ୍ରୀ ଟୁକୁନୀ ସାହୁ ମଧ୍ୟ ଆଜି ଟିଟିଲାଗଡ ଉପଜିଲ୍ଲାପାଳ ରେହାନ କ୍ଷେତ୍ରୀଙ୍କ ପାଖରେ ତାଙ୍କର ନାମାଙ୍କନପତ୍ର ଦାଖଲ କରିଛନ୍ତି । ସେ ପ୍ରଥମେ ଟିଟିଲାଗଡର ଅଧିଷ୍ଠାତ୍ରୀଦେବୀ ମାଁ ଘଣ୍ଟାଶୁଣୀ ଦେବୀ ଓ ଜଗନ୍ନାଥ ମନ୍ଦିରକୁ ଯାଇ ଦର୍ଶନପରେ ତାଙ୍କ ସମର୍ଥକଙ୍କ ସହ ଆସି ନାମାଙ୍କନପତ୍ର ଦାଖଲ କରିଛନ୍ତି । ନବୀନ ପଟ୍ଟନାୟକ ଅମଳରେ ହୋଇଥିବା ଦୃତବିକାଶ ହିଁ ବିଜେଡିଦଳକୁ ଜିଣାଇବ ବୋଲି ମନ୍ତ୍ରୀ ଟୁକୁନୀ ସାହୁ କହିଛନ୍ତି । ଠିକ ସେହିପରି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ କଣ୍ଟାବାଞ୍ଜି ନିର୍ବାଚନମଣ୍ଡଳିରୁ ନିର୍ବାଚନ ଲଢିବା ପରେ ବିଜେଡିଦଳ ଖୁବ ଉତ୍ସାହିତ ରହିଛି । ଆମେ ଜିଲ୍ଲାରୁ ମୁଖ୍ୟମନ୍ତ୍ରୀ ଜିଣି ୬ଷ୍ଠଥର ପାଇଁ ମୁଖ୍ୟମନ୍ତ୍ରୀ ହେବେ ବୋଲି ବିଜେଡିର ବରିଷ୍ଠ ନେତା ଅନଙ୍ଗଉଦୟ ସିଂଦେଓ କହିଛନ୍ତି ।