19-Apr-2024

ବଲାଙ୍ଗିର (ଚିତ୍ରସେନ ବେହେରା ): ଗତ ୧୬ ଏପ୍ରିଲରେ ବଲାଙ୍ଗିର ସ୍ବେଚ୍ଛାସେବୀ ସଂଗଠନ ଦ୍ଵାରା ଉଦ୍ଧାର କରାଯାଇଥିବା ଅସହାୟ ଯୁବକଙ୍କ ଶବର ଆଜି ଶେଷ ସଂସ୍କାର କରାଯାଇଥିଲା। ଔପଚାରିକତା ଦୃଷ୍ଟିରୁ ପୋଲିସ ପକ୍ଷରୁ ଶବକୁ ବ୍ୟବଚ୍ଛେଦ ପରେ ୭୨ ଘଣ୍ଟା ପର୍ଯ୍ୟନ୍ତ ଭୀମ ଭୋଇ ମେଡିକାଲ କଲେଜ ହସ୍ପିଟାଲସ୍ଥିତ ଶବ ସଂରକ୍ଷଣ କେନ୍ଦ୍ରରେ ସଂରକ୍ଷିତ ରଖାଯାଇଥିଲା। ଦାୟିତ୍ୱରେ ଥିବା ପୋଲିସ ଅଧିକାରୀ ଗିରି ଧାରୀ ରାକ୍ସା ଓ ଅଶ୍ବିନୀ ଘିବେଲାଙ୍କ ଉପସ୍ଥିତିରେ ଆଜି ବଲାଙ୍ଗିର ସ୍ବେଚ୍ଛାସେବୀ ସଂଗଠନର ସୁମିତ ମିଶ୍ର, ସନ୍ତୋଷ ପଟ୍ଟନାୟକ, ଗୋବିନ୍ଦ ଚନ୍ଦ୍ର ଶତପଥୀ, ରୂପକ ପ୍ରଧାନ, ସୀମାଞ୍ଚଲ ସୁନା ଓ ସରୋଜ ଜାଲ ପ୍ରମୁଖ ଶବକୁ ସଂରକ୍ଷଣ କେନ୍ଦ୍ରରୁ ସ୍ୱର୍ଗରଥ ଯୋଗେ ପ୍ରଥମେ ବଲାଙ୍ଗିର-ଟିଟିଲାଗଡ ରୋଡସ୍ଥିତ ଚମଡା ଗୋଦାମ ପଛପଟ ମୁକ୍ତିଧାମକୁ ନେଇ ଯାଇଥିଲେ। ସେଠାରେ ଜେସିବି ସାହାଯ୍ୟରେ ଗାତ ଖୋଳାଯାଇ ଉକ୍ତ ୭/୮ ଦିନ ପୁରୁଣା ଶବକୁ ବାୟୁ ସଂକ୍ରମଣ ରକ୍ଷା ଦୃଷ୍ଟିରୁ ଦାହ କରିବା ପରିବର୍ତ୍ତେ ମାଟିରେ ପୋତି ଶେଷ ସଂସ୍କାର କରାଯାଇଥିଲା। ପୋଲିସ ଏବଂ ସଂଗଠନର ସଦସ୍ୟଙ୍କ ଦ୍ଵାରା ଏକ ନୀରବ ଶାନ୍ତି ପ୍ରାର୍ଥନା କରାଯାଇ ସେହି ଅସହାୟ ଶବକୁ ଶେଷ ସମ୍ମାନ ଦିଆଯାଇଥିଲା।

ଏଠି ସୂଚନାଯୋଗ୍ୟ ଯେ, ବଲାଙ୍ଗିର ସ୍ବେଚ୍ଛାସେବୀ ସଂଗଠନ ପ୍ରଥମେ ୪ ଏପ୍ରିଲରେ ଅଖିଆ ଅପିଆ ଅସୁସ୍ଥ ନିର୍ବସ୍ତ୍ର ପଡି ରହିଥିବା ଜଣେ ଅସହାୟ ଯୁବକକୁ ସାଲେପାଲିସ୍ଥିତ ଏକ ପରିତ୍ୟକ୍ତ ଘରୁ ଉଦ୍ଧାର କରି ଭୀମ ଭୋଇ ମେଡିକାଲ କଲେଜ ହସ୍ପିଟାଲରେ ଚିକିତ୍ସା ନିମନ୍ତେ ଭର୍ତ୍ତି କରିଥିଲା। ସାମାନ୍ୟ ସୁସ୍ଥ ହେବା ପରେ ଯୁବକ ଜଣକ ହସ୍ପିଟାଲରୁ ଡିସଚାର୍ଜ ନ ହୋଇ ମଧ୍ୟ ପୁଣି ସେହି ପରିତ୍ୟକ୍ତ ଘରକୁ ଚାଲି ଆସି ଆଶ୍ରୟ ନେଇଥିଲେ। ବାପା ଅନ୍ୟ ରାଜ୍ୟରେ ଦାଦନ ଖଟୁଥିବା ବେଳେ ମାଁଙ୍କର ମୃତ୍ୟୁ ପରେ ଯୁବକ ଜଣକ ସାମାନ୍ୟ ମାନସିକ ଭାରସାମ୍ୟ ହରାଇ ବସିଥିଲେ। ରକ୍ଷଣାବେକ୍ଷଣ ଅଭାବ ଏବଂ ଖାଦ୍ୟ ଅଭାବରୁ ଯୁବକଙ୍କର ଜୀବନ ଚାଲିଯାଇଥିଲା। ୪/୫ ଦିନ ପରେ ଦୁର୍ଗନ୍ଧ ହେବାରୁ ସ୍ଥାନୀୟ ଲୋକଙ୍କଠାରୁ ଖବର ପାଇ ପୋଲିସ ଉପସ୍ଥିତିରେ ବଲାଙ୍ଗିର ସ୍ବେଚ୍ଛାସେବୀ ସଂଗଠନ ସେହି ପୋକ ସାଲୁବାଲୁ ପଚା ଶବକୁ ପିପିଇ କିଟ୍ ପିନ୍ଧି ଉଦ୍ଧାର କରି ଶବ ସଂରକ୍ଷଣ କେନ୍ଦ୍ରରେ ସଂରକ୍ଷିତ ରଖି ଫେରିଥିଲା। ଆଜି ସେହି ଅସହାୟ ଶବର ଶେଷ ସଂସ୍କାର ମଧ୍ୟ ବଲାଙ୍ଗିର ସ୍ବେଚ୍ଛାସେବୀ ସଂଗଠନ ଦ୍ୱାରା କରାଯାଇଥିଲା।