15-Apr-2024

ବାଲାଙ୍ଗୀର(ପ୍ରେରଣା ଖବର ): ବଲାଙ୍ଗୀର ଜିଲ୍ଲାର ୫ଟି ବିଧାନସଭା କ୍ଷେତ୍ରପାଇଁ ରାଜନୈତିକଦଳମାନଙ୍କ କସରତ ପରେ ଟିକେଟ ଘୋଷଣା କରାଯାଇଛି । କଂଗ୍ରେସଦଳ ଓ ବିଜେପିଦଳ ଉଭୟ ସଂସଦୀୟକ୍ଷେତ୍ର ଓ ୭ଟି ଯାକ ନିର୍ବାଚନମଣ୍ଡଳିରେ ପ୍ରାର୍ଥି ଦେଇସାରିଛି । କିନ୍ତୁ ଶାସକ ବିଜେଡିଦଳ ଅନ୍ୟସବୁ ବିଧାନସଭା କ୍ଷେତ୍ରରେ ବିଧାୟକ ପ୍ରାର୍ଥି ଘୋଷଣା କରିସାରିଥିଲେ ହେଁ କଣ୍ଟାବାଞ୍ଜି ଆସନ ଝୁଲିରହିଛି । ଏପର୍ଯ୍ୟନ୍ତ କାହାରିକୁ ଟିକେଟ ଦିଆଯିବ ତାହା ସ୍ପଷ୍ଟ ହୋଇନାହିଁ । ଏହି ନିର୍ବାଚନ ମଣ୍ଡଳି ଆଦିବାସୀ ବହୁଳ ଅଞ୍ଚଳ ହୋଇଥିବାରୁ ଶାସକ ବିଜେଡିଦଳ ଜଣେ ଆଦିବାସୀ ମହିଳା ନୀରୁପମା ମାଝୀଙ୍କୁ ଟିକେଟ ଦେଉ ବୋଲି ଜିଲ୍ଲା ଆଦିବାସୀ କଲ୍ୟାଣ ମହାସଂଘ ଦାବି ଉଠାଇଛି । ନୀରୂପମା ମାଝି ଅବସରପ୍ରାପ୍ତ ସୈନିକ ଗିରିରାଜ ସିଂମାଝୀଙ୍କ ପତ୍ନୀ ଓ ବଲାଙ୍ଗୀର ଆଦିବାସୀ ଉନ୍ନୟନ ପରିଷଦର ଉପାଧ୍ୟକ୍ଷା ରହିଛନ୍ତି । ନୀରୁପମା ଓ ତାଙ୍କ ସ୍ୱାମୀ ଗିରିରାଜ ଗତ କିଛିବର୍ଷ ହେଲା କଣ୍ଟାବାଞ୍ଜି ଅଞ୍ଚଳରେ ଲୋକଙ୍କ ସହିତ ମିଶି ସାଂଗଠନକ କାମ କରୁଛନ୍ତିି । ଏହାବାଦ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ମହିଳାଙ୍କୁ ଗୁରୁତ୍ୱ ଦେଉଥିବାରୁ ଚଳିତଥର ଜଣେ ଆଦିବାସୀ ମହିଳାଙ୍କୁ ଟିକେଟ ଦିଅନ୍ତୁ ବୋଲି ଆଜି ବଲାଙ୍ଗୀର ଜିଲ୍ଲା ଆଦିବାସୀ କଲ୍ୟାଣମହାସଂଘ ଦାବି କରିଛି । ଆଦିବାସୀସଂଘର ଜିଲ୍ଲା ସଭାପତି ସତ୍ୟନାରାୟଣ ଭୋଇଙ୍କ ନେତୃତ୍ୱରେ ଏକ ପ୍ରତିନିଧିଦଳ ବିଜେଡିର ସାଂଗଠନିକ ସଂପାଦକ ପ୍ରଣବପ୍ରକାଶ ଦାସ(ବିବିଦାସ)ଙ୍କୁ ଭେଟି ଲିଖିତ ଭାବରେ ଏହି ଦାବି କରିଛନ୍ତି ବୋଲି ଜଣାଯାଇଛି । ଆଦିବାସୀ କଲ୍ୟାଣସଂଘ ଦାବି କରିଛି ଯେ,କଣ୍ଟାବାଞ୍ଜିରେ ନୀରୁପମା ହିଁ ଯୋଗ୍ୟ ପ୍ରାର୍ଥି । ତାଙ୍କ ପ୍ରାର୍ଥିତ୍ୱ ଉଭୟ ଆଦିବାସୀ ଓ ମହିଳାଙ୍କ କଲ୍ୟାଣ ପାଇଁ ହେବ । ସତ୍ୟନାରାୟଣ ଭୋଇଙ୍କ ସହିତ ବଙ୍ଗୋମୁଣ୍ଡା ବ୍ଲକସଭାପତି ଶରତଚନ୍ଦ୍ର ଭୋଇ,ତୁରେକେଲା ବ୍ଲକସଭାପତି ଦୁଃଖିଶ୍ୟାମ ଭୋଇ,ମୁରିବାହାଲ ବ୍ଲକସଭାପତି ଅଶ୍ୱିନୀ ମାଝୀ,ସଂପାଦକ ଦୈତାରୀ ଭୋଇ,ଜିଲ୍ଲା ସଂପାଦକ ପୁରୁଷୋତ୍ତମ ଧରୁଆ ପ୍ରମୁଖ ପ୍ରଣବପ୍ରକାଶ ଦାସଙ୍କୁ ଭେଟି ଏହି ଦାବି ରଖିଛନ୍ତି । ପ୍ରକାଶ ଯେ,କଣ୍ଟାବାଞ୍ଜି ଆସନରୁ ଚଳିତଥର ବିଜେଡିରୁ ପୂର୍ବତନ ବିଧାୟକ ଆୟୁବ ଖାନ,ତାଙ୍କ ପୁଅ ଡ.ଅରସଦ ଖାନ,ଗତ ୨୦୧୯ରେ ବିଧାୟକ ପ୍ରାର୍ଥି ହୋଇଥିବା ଅଜୟ ଦାସ,ଆଦିବାସୀନେତା ତଥା ପୂର୍ବସୈନିକ ଗିରିରାଜ ସିଂମାଝୀ ଓ ତାଙ୍କ ପତ୍ନୀ ନୀରୁପମା ମାଝି । ତେବେ ଗତ ୧୦ଦିନ ହେଲା କଣ୍ଟାବାଞ୍ଜି ରାଜନୀତି ସ୍ଥିର ହୋଇଯାଇଛି ।

କଣ୍ଟାବାଞ୍ଜିର କଂଗ୍ରେସ ବିଧାୟକ ସନ୍ତୋଷ ସିଂସାଲୁଜା(କୁକୁ ସିଂ) ବିଜେଡିଦଳକୁ ଯିବେ ଓ ତାଙ୍କୁ ବିଜେଡିଦଳ ଟିକେଟ ଦେଉଛି ବୋଲି ପ୍ରଚାର ହେଲା । ଫଳରେ ବିଜେଡିଶିବିର ସଂପୂର୍ଣ୍ଣ ସ୍ତବ୍ଧ ହୋଇଯାଇଛି । ସେପଟେ ବିଜେଡିଦଳ ୪ଟି ପର୍ଯ୍ୟାୟରେ ବିଧାୟକ ପ୍ରାର୍ଥି ତାଲିକା ପ୍ରକାଶ କରିଥିଲେ ହେଁ କଣ୍ଟାବାଞ୍ଜି ଆସନ ପାଇଁ କାହାରିକୁ ଟିକେଟ ଦେଇନାହିଁ । ଫଳରେ ଲୋକଙ୍କ ମନରେ ସସପେନ୍ସ ଲାଗିରହିଛି । ଗତ ୨୦୧୯ ମସିହାରେ ବିଜେଡିଦଳ ପୂର୍ବତନ ବିଧାୟକ ମହମ୍ମଦ ଆୟୁବ ଖାନଙ୍କ ବଦଳରେ ଅଜୟ ଦାସଙ୍କୁ ଟିକେଟ ଦେଇଥିଲା । ଅଜୟ ଦାସ ବଲାଙ୍ଗୀର ବାସୀନ୍ଦା ହୋଇଥିବାରୁ ବାହାରପ୍ରାର୍ଥି କହି ଲୋକ ଭୋଟ ଦେଇନଥିଲେ । ଫଳରେ ବିଜେଡି ୩ନମ୍ବରରେ ରହିଥିଲା । କିନ୍ତୁ ଗତ ୫ବର୍ଷ ହେଲା ଅଜୟ ଦାସ ମଧ୍ୟ ତାଙ୍କର ସଂଗଠନ ଚଳାଇଛନ୍ତି । ବିଜେଡିଦଳ ଏକ ଦ୍ୱନ୍ଦାତ୍ମକ ସ୍ଥିତିରେ ରହିଛି ।