15-Apr-2024

ବାଲାଙ୍ଗୀର(ପ୍ରେରଣା ଖବର ): ଚଳିତ ନିର୍ବାଚନ ପୂର୍ବରୁ ବିଭିନ୍ନ ଲୋକଙ୍କ ଦଳଡିଆଁ ପର୍ବ ଚାଲିଛି । ସେହିକ୍ରମରେ ନବୀନ ପଟ୍ଟନାୟକ ସରକାରଙ୍କ ବିକାଶମୂଳକ ପ୍ରକଲ୍ପରେ ଅନୁପ୍ରାଣିତ ହୋଇ ବଲାଙ୍ଗୀର ବିଜେଡିରେ ଶହଶହ ସଂଖ୍ୟାରେ ଯୁବକ ଓ କୃଷକମାନେ ଅନ୍ୟଦଳରୁ ଆସି ଯୋଗଦେଉଛନ୍ତି । ଆଜି ଦେଓଗାଁ ବ୍ଲକର ଖଗସୀକନା ଓ ଅଏଁଲାପାଲି ଗାଁର ପ୍ରାୟ ଦେଢଶହ ପୁରୁଷ/ମହିଳା,ଯୁବକ ଆସି ବିଜେଡିଦଳରେ ଯୋଗଦେଇଛନ୍ତି । ମୁଖ୍ୟତଃ ଖଗସୀନାର ଚାଷୀ ମାନଙ୍କର ଉଠାଜଳସେଚନକୁ ନେଇ ସମସ୍ୟା ରହିଥିଲା । ସେହି ସମସ୍ୟାକୁ ବିଜେଡିର ବରିଷ୍ଠ ନେତା ଲକ୍ଷ୍ମଣ କୁମାର ମେହେର ଭୁବନେଶ୍ୱର ପର୍ଯ୍ୟନ୍ତ ଚାଷୀଙ୍କ ସହିତ ଯାଇ ସମାଧାନ କରାଇଥିଲେ । ଫଳରେ ଚାଷିମାନେ କଂଗ୍ରେସଦଳ ଛାଡି ଏବେ ବିଜେଡିମୁହାଁ ହୋଇଛନ୍ତି । ଆଜି ଶୈଳଶ୍ରୀ ପ୍ୟାଲେସରେ ବିଜେଡିର ରାଜ୍ୟ ସଂପାଦକ ଲକ୍ଷ୍ମଣକୁମାର ମେହେର ଓ ରାଜ୍ୟସଂପାଦକ ପ୍ରଦ୍ୟୁତ ମିଶ୍ରଙ୍କ ଉପସ୍ଥିତିରେ ବିଜେଡି ବିଧାୟକ ପ୍ରାର୍ଥୀ ତଥା ରାଜ୍ୟ ସାଧାରଣସଂପାଦକ

କଳିକେଶ ନାରାୟଣ ସିଂଦେଓ ଆସିଥିବା ଲୋକଙ୍କୁ ବିଜେଡି ଉତ୍ତରିୟ ଓ ଫୁଲତୋଡା ଦେଇ ଦଳରେ ସାମିଲ କରାଇଥିଲେ । ମୁଖ୍ୟତଃ ଆଜିର ଏହି ମିଶ୍ରଣ ପରେ ଦେଓଗାଁ ଅଞ୍ଚଳରେ ବିଜେଡିଦଳ ଆହୁରି ମଜବୁତ ହେବ ବୋଲି ଲକ୍ଷ୍ମଣ କୁମାର ମେହେର କହିଛନ୍ତି । ପ୍ରକାଶ ଯେ,ଏହା ପୂର୍ବରୁ ମଧ୍ୟ ରାଜ୍ୟସାଧାରଣ ସଂପାଦକ ପ୍ରଦ୍ୟୁତ ମିଶ୍ରଙ୍କ ନେତୃତ୍ୱରେ ଶତାଧିକ ଯୁବକ ବିଜେଡିଦଳରେ ସାମିଲ ହୋଇସାରିଛନ୍ତି । ନୂଆ କରି ବିଜେଡିଦଳରେ ଯୋଗଦେଇଥିବା ସଭ୍ୟମାନେ କହିଛନ୍ତି ଯେ,ବିଜେଡିଦଳ ତୃଣମୂଳସ୍ତରରେ ବିକାଶକୁ ଗୁରୁତ୍ୱ ଦେବା ସହ ଓଡିଶାବାସୀଙ୍କୁ ସମସ୍ତ ଦିଗରେ ସମୃଦ୍ଧ କରିବା ପାଇଁ କାମ କରୁଛି । ତେଣୁ ଏହି ବିକାଶଧାରରେ ସାମିଲ ହେବାକୁ ସେମାନେ ଅନ୍ୟଦଳରୁ ବିଜେଡିକୁ ଆସିଛନ୍ତି ବୋଲି କହିଛନ୍ତି ।