06-Apr-2024

ସୁବର୍ଣ୍ଣପୁର(ମନୋରଞ୍ଜନ ତ୍ରିପାଠୀ )
ଝିଅ ଜନମ ଆଉ ଚୁଲି ମୁଣ୍ଡକୁ ନୁହେଁ, ଝିଅ ଜନମ ଅନ୍ତର୍ଜାତୀୟ ସ୍ତରରେ ନିଜ ର ଖ୍ୟାତି ବଢାଇବାକୁ l ଏବେ ବିଭିନ୍ନ କ୍ଷେତ୍ରରେ ନିଜର ପାରଦର୍ଶିତା ପ୍ରତିପାଦନ କରି ଝିଅ ମାନେ କନ୍ୟା ରତ୍ନ ସାଜୁଛନ୍ତି ସବୁଠି l ଏଭଳି ସୋନପୁର ମାଟିର ତିନି କନ୍ୟା ରତ୍ନ ହୀରା ମୋତି ମାଣିକ ଭଳି ବିଦେଶ ମାଟିରେ ନିଜ କଳା କୁ ଚମକାଇଛନ୍ତି l  କେବଳ ଯେ ଜିଲ୍ଲା ନୁହେଁ ରାଜ୍ୟ ଏବଂ ଦେଶ ପାଇଁ ସୁନାମ ଆଣିଛନ୍ତି । ନେପାଳର ରାଜଧାନୀ କାଠମାଣ୍ଡୁ ଠାରେ ଅନୁଷ୍ଠିତ ମଡେଲିଂ ପ୍ରତିଯୋଗିତାରେ ନିଜର ଶ୍ରେଷ୍ଠତ୍ୱ ପ୍ରତିପାଦନ କରି ସୋନପୁରର ତିନି ଝିଅ ବିଭିନ୍ନ ବିଭାଗରେ କୃତିତ୍ଵ ଅର୍ଜନ କରିଛନ୍ତି ।ଏପ୍ରିଲ ୧ ତାରିଖରେ କାଠମାଣ୍ଡୁର ପାଲାଜୋ ହଟେଲ୍‌ରେ ଉକ୍ତ ପ୍ରତିଯୋଗିତାର ଫାଇନାଲ୍ ରାଉଣ୍ଡ ଅନୁଷ୍ଠିତ ହୋଇଥିଲା । ଏହି ମେଗା ଇଭେଣ୍ଟରେ ୧୦ଟି ଦେଶର ୩୦ ଜଣ ପ୍ରତିଯୋଗୀ ଭାଗ ନେଇଥିଲେ । ବିଭିନ୍ନ ସ୍ତରରେ ଉତ୍ତମ ପ୍ରଦର୍ଶନ କରି ମୋଟ ୯ଟି ବିଭାଗ ମଧ୍ୟରୁ ୩ଟି ବିଭାଗରେ ସୋନପୁରର ଉକ୍ତ ତିନି ଝିଅ ବିଜେତା ହୋଇଛନ୍ତି ।

ସୋନପୁର ପଟାଭାଡି ନିବାସୀ ବିଶ୍ୱବିଜୟିନୀ ମିଶ୍ରଙ୍କୁ ମିସ୍ ଟିନ୍ ଗ୍ଲୋବାଲ୍ ଇଣ୍ଟରନେସନାଲ୍ ତାଜ୍ ମିଳିଛି । ସେହିପରି ମାଣିକେଶ୍ୱରୀ ପ୍ଲଟ୍ ନିବାସୀ ସୁଚିସ୍ମିତା ବେହେରା ମିସ୍ ପ୍ରିଟିନ୍ ଗ୍ଲୋବାଲ୍ ଇଣ୍ଟରନେସନାଲ୍ ୨୦୨୪ ଘୋଷିତ ହୋଇଛନ୍ତି । କନିଷ୍ଠ ବିଭାଗରେ ବଡବଜାରର ହର୍ଷିତା ରଞ୍ଜନଙ୍କୁ ଲିଟିଲ୍ ମିସ୍ ଗ୍ଲୋବାଲ୍ ଇଣ୍ଟରନେସନାଲ୍ ମଡେଲ୍ ମିଳିଛି l ଅନ୍ତର୍ଜାତୀୟ ସ୍ତରର ଖ୍ୟାତନାମା ମଡେଲ୍ ମାନେ ଯୋଗଦେଇ ବିଜେତା ପ୍ରତିଯୋଗୀଙ୍କୁ ତାଜ୍   ଆୱାର୍ଡ ପ୍ରଦାନ କରିଥିଲେ । ସୋନପୁରର ଝିଅ ବିଦେଶ ମାଟିରେ ନିଜର ଶ୍ରେଷ୍ଠତ୍ୱ ପ୍ରଦର୍ଶନ କରିଥିବାରୁ ଏହି ପ୍ରତିଯୋଗୀ ମାନଙ୍କୁ  ବିଭିନ୍ନ ମହଲରୁ ଶୁଭେଚ୍ଛାର ସୂଅ ଛୁଟୁଛି  ।