05-Feb-2024

ବଲାଙ୍ଗୀର(ଚିତ୍ରସେନ ବେହେରା ): ଓଡିଆ  ଭାଷା ଭାରତର ଏକ ପ୍ରାଚୀନ ଓ ସମୃଦ୍ଧ ଭାଷା। ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ଉଦ୍ୟମ  ଓ ନିଷ୍ଠା ଯୋଗୁଁ  ଓଡିଆ  ଭାଷା ଭାରତର ଷଷ୍ଠ  ଶାସ୍ତ୍ରୀୟ ଭାଷା ଭାବରେ ସ୍ବୀକୃତ ହୋଇଛି।ଓଡିଆଭାଷା ପ୍ରତିଷ୍ଠାନ ସ୍ଥାପନ କରାଯାଇଛି।ଓଡିଆ ଉତ୍କର୍ଷ କେନ୍ଦ୍ର ସ୍ଥାପନ ସହ ଓଡିଆ  ଭାଷାର  ସର୍ବୋଚ୍ଚ ନମ୍ବର ପାଇଥିବା ଛାତ୍ରଛାତ୍ରୀଙ୍କୁ ପୁରସ୍କୃତ କରାଯାଉଛି।  ବିଶ୍ବ ଓଡିଆ ଭାଷା ସମ୍ମିଳନୀର ଆୟୋଜନ ମଧ୍ୟ  ସାରା ବିଶ୍ବରେ ପ୍ରଥମ ।ତେବେ ବୈଶ୍ବିକ ପ୍ରଭାବରେ ବିଶ୍ବର ବହୁ ସ୍ଥାନୀୟ ଭାଷା ସଂକଟରେ। ଭାଷାର ବହୁଳ ବ୍ୟବହାର ଓ ସମ୍ବର୍ଦ୍ଧନ ହିଁ ଏହି ସଂକଟରୁ ଓଡିଆ ଭାଷାକୁ  ଉଦ୍ଧାର କରି ଦୀର୍ଘତମ ଉପଯୋଗୀ କରିବ ବୋଲି ବିଶ୍ବ ଓଡିଆ ଭାଷା ସମ୍ମିଳନୀର  ଅବସରରେ ଆଜି ବଲାଙ୍ଗୀର ପୌର ପରିଷଦ ତରଫରୁ ଆୟୋଜିତ  ଓଡିଆ ଭାଷା ସାହିତ୍ୟର  ପ୍ରତିଭା ସମ୍ମାନ ସମାରୋହ  ଅବସରରେ ମତ ପ୍ରକାଶ ପାଇଛି।

ବଲାଙ୍ଗୀର ପୌରାଧ୍ୟକ୍ଷା ଶ୍ରୀମତୀ ଲିକା ସାହୁଙ୍କ ସଭାପତିତ୍ବରେ ରାଜେନ୍ଦ୍ର ପାର୍କ  ପରିସରରେ ଅନୁଷ୍ଠିତ ଏହି କାର୍ଯ୍ୟକ୍ରମରେ  ପଦ୍ମଶ୍ରୀ ନରସିଂହ ପ୍ରସାଦ ଗୁରୁ, ନାଟ୍ୟଭୂଷଣ ଜଗଦାନନ୍ଦ ଛୁରିଆ  ବରେଣ୍ଯ ଅତିଥି ଭାବରେ ଯୋଗ ଦେଇ ଭାଷିକ ସଂକଟର ରକ୍ଷାକର୍ତ୍ତା କେବଳ ସେହି ଭାଷା ର ବ୍ୟବହାରକାରୀ । ଓଡିଆ ଭାଷା କୁ ସମୃଦ୍ଧ କରିବାକୁ ହେଲେ ଏହାର ବହୁଳ ବ୍ୟବହାର ହିଁ ଏକମାତ୍ର ମାର୍ଗ ବୋଲି କହିଥିଲେ। ପ୍ରାରମ୍ଭରେ ବନ୍ଦେ ଉତ୍କଳ ଜନନୀ ପରେ ପୌର ନିର୍ବାହୀ ଅଧିକାରୀ ଇଂ ବିଶ୍ବମ୍ଭର ମିଶ୍ର ସ୍ବାଗତ ଭାଷଣ ଦେଇଥିଲେ।ଏହି ଅବସରରେ ଓଡିଆ ଭାଷା ସାହିତ୍ୟକୁ ସମୃଦ୍ଧ କରିଥିବା ସ୍ରଷ୍ଟା ଗାଳ୍ପିକା ଡାକ୍ତର ମଂଜୁବାଳା ପଣ୍ଡା , କବୟତ୍ରୀ ଡାକ୍ତର ଜ୍ୟୋତିର୍ମୟୀ ସାହୁ,  କବି ଡକ୍ଟର ସଂଜୟ କୁମାର ମିଶ୍ର, କବି ସନ୍ଦୀପ କୁମାର କୁଅଁର,କବି ଆନନ୍ଦ ଚନ୍ଦ୍ର ସାହୁ, କବି ବିଜୟ କୁମାର ତ୍ରିପାଠୀ ଙ୍କୁ ଅଙ୍ଗବସ୍ତ୍ର,ପୁଷ୍ପଗୁଚ୍ଛ ଓ ସ୍ମୃତିଫଳକ ଦେଇ  ସମ୍ବର୍ଦ୍ଧିତ

କରାଯାଇଥିଲା।  ଏହା ସହ ଓଡିଆ ରେ ରାଜେନ୍ଦ୍ର ବିଶ୍ବବିଦ୍ୟାଳୟର ସ୍ବର୍ଣ୍ଣ ପଦକ ବିଜୟିନୀ ଆୟେଶା ଖାନମ୍ ତଥା ଓଡିଆରେ ଗଙ୍ଗାଧର ମେହେର ବିଶ୍ବବିଦ୍ୟାଳୟର  ସ୍ବର୍ଣ୍ଣ ପଦକ ବିଜୟିନୀ  ସୌମ୍ୟା ମଧୁପର୍ଣ୍ଣା ତ୍ରିପାଠୀଙ୍କୁ  ଅଙ୍ଗବସ୍ତ୍ର,ପୁଷ୍ପଗୁଚ୍ଛ ଓ ସ୍ମୃତିଫଳକ ଦେଇ  ସମ୍ବର୍ଦ୍ଧିତ କରାଯାଇଥିଲା। ସମାରୋହକୁ କବି ବିଜୟ କୁମାର ତ୍ରିପାଠୀ  ସଂଯୋଜନା କରିଥିଲେ। କାର୍ଯ୍ୟକ୍ରମ ରେ ସହରର ବରିଷ୍ଠ ନାଗରିକଙ୍କ  ସମେତ ବହୁ ଜନସାଧାରଣ,ପୌର କାଉନସିଲର ବୃନ୍ଦ ଯୋଗ ଦେଇଥିବା ବେଳେ ପୌର କର୍ମଚାରୀମାନେ ପରିଚାଳନା କରିଥିଲେ।