07-Jan-2024

ବଲାଙ୍ଗୀର(ମଳୟ ମିଶ୍ରଙ୍କ ରିପୋର୍ଟ): ବଲାଙ୍ଗୀର ସହରର ଜିଲ୍ଲା ମୁଖ୍ୟ ଚିକିତ୍ସାଳୟ ନିକଟସ୍ଥ ସୁଦ୍ ପଡାରେ ଥିବା ଏକ ଔଷଧଦୋକାନରେ କାମ କରୁଥିବା ସଇଁନ୍ତଳା ମଅଗାଁର ଜଣେ ଅବିବାହିତା ଯୁବତୀ ମାଲିକର ଅବୈଧ ଯୌନଲାଳସାର ଶିକାର ହେବାପରେ ଗତମାସ ୯ତାରିଖରେ ଏସିଡ୍ ପିଇଦେଇ ଆତ୍ମହତ୍ୟା କରିଥିବା ଓ ଗୁରୁତର ଅବସ୍ଥାରେ ତାଙ୍କୁ ବଲାଙ୍ଗୀର ଭୀମଭୋଇ ମେଡିକାଲ କଲେଜର ହାସପାତାଳରେ ଭର୍ତ୍ତି କରାଯିବା ପରେ ଅବସ୍ଥା ଗୁରୁତର ହେବାରୁ ବୁର୍ଲା ରେଫର୍ କରାଯିବା ସତ୍ତ୍ୱେ ମାଲିକ ତାକୁ ବରଗଡର ଘରୋଇ ହାସପାତାଳ ବିକାଶରେ ଭର୍ତ୍ତି କରାଯିବା ପରେ ସେଠାରେ ଗତମାସର ୧୨ ତାରିଖରେ ତା'ର ମୃତ୍ୟୁ ହୋଇଥିବା ଜଣାପଡିଛି । କିନ୍ତୁ ଏହି ଏମଏଲସି ମାମଲାଟିକୁ ଉଭୟ ସରକାରୀ ଓ ଘରୋଇ ହାସପାତାଳ ପକ୍ଷରୁ ପୁଲିସ୍ ରେ ଏତଲା କରା ନଯିବା ସହ ବିନା ଶବବ୍ୟବଚ୍ଛେଦରେ ଯୁବତୀଟି ଖ୍ରୀଷ୍ଟିୟାନ୍ ସଂପ୍ରଦାୟର ହୋଇଥିବାରୁ ମାଟିତଳେ ପୋତିଦିଆଯାଇଥିବା ପ୍ରକାଶ ।

ଅନୁସନ୍ଧାନରୁ ପ୍ରକାଶ ଯେ , ପୂର୍ବରୁ ସ୍ତ୍ରୀ ସହ ଡିଭୋର୍ସ ହେବାପରେ ଦ୍ବିତୀୟବିବାହ କରିଥିବା ପାଟଣାଗଡ ଅଞ୍ଚଳର ଏହି ଔଷଧଦୋକାନୀ ଜଣକ ତାଙ୍କ ଦୋକାନରେ କାମ କରିବାର ପ୍ରଲୋଭନ ଦେଇ ମହିଳା କର୍ମଚାରୀଙ୍କ ସାଙ୍ଗରେ ରୀତିମତ ନିଜର ଯୌନଲାଳସା ମେଣ୍ଟାଇ ଆସୁଥିବା ସହ ଉକ୍ତ ଯୁବତୀଟିକୁ ଫାଶରେ ଫସାଇ ଅବୈଧ ସମ୍ପର୍କ ସ୍ଥାପନ କରି ଆସୁଥିଲେ । ଗତମାସ ୮ ତାରିଖରେ ଅର୍ଥାତ୍ ଘଟଣାର ପୂର୍ବଦିନ ରାତିରେ ଦୋକାନ ବନ୍ଦ କଲାପରେ ଶେଷରେ ଥିବା ମାଲିକ ଓ ଉକ୍ତଯୁବତୀଟି ରହିଯାଇଥିଲେ । ମାଲିକ ତାକୁ ସେହି ପଡାରେ ଘରଭଡା ନେଇ ତାକୁ ରଖିଥିବା ଘରକୁ ଯିବାକୁ କହିବା ସତ୍ତ୍ୱେ ଯୁବତୀଟି ଟ୍ରେନ୍ ଚକାତଳେ ଆତ୍ମହତ୍ୟା କରିବାକୁ ସିଧା ସୋନପୁର ଲେଭେଲ୍ କ୍ରସିଂ ଗେଟ୍ ଆଡକୁ ଯିବାରୁ ମାଲିକ ପଛେପଛେ ଯାଇ ତାକୁ ବୁଝାଇ ମନାଇ ଫେରାଇ ଥିଲେ ଓ ଯୁବତୀଟି ପୁଣି ନମାନି ଆରପଟ ଚମାରପଡା ଗ୍ୟାସ୍ ଗୋଦାମ ନିକଟରେ ଥିବା ରେଳଲାଇନ୍ ଆଡକୁ ଚାଲିଯାଇଥିଲା । ପୁଣି ତା'କୁ ଯାଇ ମାଲିକ ଯୁବତୀଟିକୁ ଧରିଆଣିବା ସମୟରେ ତିନିଜଣ ସ୍ଥାନୀୟ ଦୁର୍ବୃତ୍ତଙ୍କ ସାଙ୍ଗରେ ତାଙ୍କର ଗଣ୍ଡଗୋଳ ମଧ୍ୟ ହୋଇଥିଲା । ଶେଷରେ ବହୁକଷ୍ଟରେ ମାଲିକ ଯୁବତୀଟିକୁ ଭଡାଘରେ ଛାଡିଥିଲେ । ଏ ସମ୍ପର୍କରେ ମାଲିକ ଯୁବତୀଟିର ଘରକୁ ଖବର ଦେବାରୁ ଝିଅଟିର ବାପା ରାତିବାରଟାରେ ସଇଁନ୍ତଳାରୁ ଆସିବା ସମ୍ଭବ ନୁହେଁ ବୋଲି ମନାକରି ସକାଳୁ ଆସିବାକୁ କହିଥିଲେ । ପରଦିନ ସକାଳୁ ଝିଅର ବାପା ବଲାଙ୍ଗୀର ସୁଦ୍ ପଡାର ଭଡାଘରକୁ ପହଞ୍ଚିବା ପରେ ଯୁବତୀଟି ବାହାନା କରି ବାପାକୁ ସିଙ୍ଗଡା ଆଣିବାକୁ ବାହାରକୁ ପଠାଇଦେଇ ଏସିଡ୍ ପିଇଦେଇଥିବା ବିଶ୍ବସ୍ତସୂତ୍ରରୁ ପ୍ରକାଶ । ଏହାପରେ ଯୁବତୀଟିକୁ ବଲାଙ୍ଗୀର ଭୀମଭୋଇ ମେଡିକାଲ କଲେଜ ର ହାସପାତାଳରେ ଚିକିତ୍ସା ନିମନ୍ତେ ଭର୍ତ୍ତି କରାଯିବା ପରେ ଅବସ୍ଥା ଗୁରୁତର ହେବାରୁ ଡାକ୍ତର ତାକୁ ବୁର୍ଲା ଭୀମସାରକୁ ରେଫର କରାଯାଇଥିଲା । କିନ୍ତୁ ମାଲିକ  ନିଜର ନାଁ' ଗାଁ' ଡାକ୍ତରଖାନା ରେଜିଷ୍ଟରରେ ନ ଦର୍ଶାଇ ଘଟଣାକୁ ଲୁଚାଇବା ମନ୍ଦ ଉଦ୍ଦେଶ୍ୟରେ ଦୋକାନର ଅନ୍ୟଜଣେ ଯୁବକର୍ମଚାରୀର ଫୋନ୍ ନମ୍ବର ଉଲ୍ଲେଖ କରିବା ସହ  ଯୁବତୀଟିକୁ ସେଠାକୁ ନନେଇ ବରଗଡର ବିକାଶ ଘରୋଇ ହାସପାତାଳରେ ଭର୍ତ୍ତି କରିଦେଇଥିଲେ । ସେଠାରେ ୪ଦିନପରେ ଯୁବତୀଟିର ମୃତ୍ୟୁ ହୋଇଯାଇଥିବା ଓ ସେଠାରେ ମଧ୍ୟ ଏହି ମାମଲାଟି ପୁଲିସ୍ କୁ ନ ଜଣାଇ ବିନା ଶବବ୍ୟବଚ୍ଛେଦରେ ଫେରାଇ ଆଣି ଗାଁ'ରେ କବର ଦିଆଗଲା ବୋଲି ଚର୍ଚ୍ଚା ହେଉଛି । ସବୁଠାରୁ ଆଶ୍ଚର୍ଯ୍ୟର ବିଷୟ ଯେ , ଯୁବତୀଟିର ପରିବାର ପକ୍ଷରୁ ଏ ସମ୍ପର୍କରେ କେହି ମୁହଁ ଖୋଲୁ ନାହାଁନ୍ତି  ! ଏ ସମ୍ପର୍କରେ କେତେକ ସାମ୍ବାଦିକ ବନାମ ସମାଜସେବୀଙ୍କ ପକ୍ଷରୁ ଭୀମଭୋଇ ମେଡିକାଲ କର୍ତ୍ତୃପକ୍ଷଙ୍କୁ ପଚରାଉଚୁରା କରାଯିବା ସହିତ ତଥ୍ୟ ମଗାଯାଇଥିବା ଜଣାଯାଇଛି । ତେବେ ଏଭଳି ଏକ ଗୁରୁତର ଅବୈଧ ଆପରାଧିକ ମାମଲାଟି ଜିଲ୍ଲା ପ୍ରଶାସନର ନାକତଳେ ଘଟିଯାଇ ଥିଲେ ହେଁ ଏ ସମ୍ପର୍କରେ କାହାକୁ ଜଣା ନଥିବା ବିସ୍ମୟର ବିଷୟ  !  ଅଭିଯୁକ୍ତ ଔଷଧଦୋକାନ ମାଲିକଙ୍କ ଲକ୍ଷାଧିକ ଟଙ୍କା ସମସ୍ତଙ୍କର ମୁହଁ ବନ୍ଦ କରିଦେଇନାହିଁ ତ  ? ଏହା ଏବେ ଚର୍ଚ୍ଚାର ବିଷୟ ହୋଇଛି ।