05-Jul-2026

ବରପାଲି :( ସୁଦାମ ଦୀପ) ଖୁବ ଶୀଘ୍ର ବରପାଲି ସହର ଏକ ନୂତନ ଓ ଆକର୍ଷଣୀୟ ରୂପରେ ନଜର ଆସିବ। ସହରର ସୌନ୍ଦର୍ଯ୍ୟକରଣ, ଐତିହ୍ୟର ସଂରକ୍ଷଣ ଏବଂ ଆଧୁନିକ ଭିତ୍ତିଭୂମି ବିକାଶକୁ ନେଇ ବ୍ୟାପକ ଯୋଜନା ପ୍ରସ୍ତୁତ ହେଉଛି। ବିଜେପୁର ବିଧାୟକ ସନତ କୁମାର ଗଡତିଆଙ୍କ ପ୍ରଚେଷ୍ଟାରେ ବରପାଲି "ମହାପୁରୁଷ ଐତିହ୍ୟ ଗ୍ରାମ"ର ମାନ୍ୟତା ପାଇଥିବାରୁ ସହରର ସର୍ବାଙ୍ଗୀଣ ବିକାଶ ପାଇଁ ପ୍ରଶାସନ ପକ୍ଷରୁ ସ୍ୱତନ୍ତ୍ର କାର୍ଯ୍ୟଯୋଜନା ଆରମ୍ଭ କରାଯାଇଛି।ଏହି ଯୋଜନା ଅନୁସାରେ ସହରର ପ୍ରମୁଖ ରାସ୍ତା, ଐତିହାସିକ ସ୍ଥାନ, ଧାର୍ମିକ ପୀଠ, ପ୍ରବେଶପଥ, ପାର୍କ, ସାର୍ବଜନିକ ସ୍ଥାନ ଏବଂ ଅନ୍ୟାନ୍ୟ ଗୁରୁତ୍ୱପୂର୍ଣ୍ଣ ଅଞ୍ଚଳର ବିକାଶ ଓ ସୌନ୍ଦର୍ଯ୍ୟକରଣ ଉପରେ ବିଶେଷ ଗୁରୁତ୍ୱ ଦିଆଯିବ। ସହରର ଐତିହ୍ୟ, ସଂସ୍କୃତି ଓ ପରମ୍ପରାକୁ ଅକ୍ଷୁଣ୍ଣ ରଖି ଏହାକୁ ଏକ ଆକର୍ଷଣୀୟ ଐତିହ୍ୟ ସହରରେ ପରିଣତ କରିବାକୁ ପ୍ରୟାସ ଜାରି ରହିଛି।
ଏହି ପରିପ୍ରେକ୍ଷୀରେ ପ୍ରଶାସନ ପକ୍ଷରୁ ନିଯୁକ୍ତ ଆର୍କିଟେକ୍ଟ ଦଳ ବରପାଲି ସହରର ବିଭିନ୍ନ ପ୍ରମୁଖ ସ୍ଥାନ ପରିଦର୍ଶନ କରି ସ୍ଥିତିର ଅନୁଧ୍ୟାନ କରିଛନ୍ତି। ସହରର ବିକାଶ ପାଇଁ କେଉଁ କେଉଁ କ୍ଷେତ୍ରରେ କାମ କରାଯିବ ଏବଂ କିପରି ଏକ ସୁନ୍ଦର ଓ ସୁପରିକଳ୍ପିତ ସହରର ରୂପ ଦିଆଯିବ, ସେନେଇ ସେମାନେ ପ୍ରାଥମିକ ସର୍ଭେ କରିଛନ୍ତି।
ଏହି ଅବସରରେ ବରଗଡ଼ ଜିଲ୍ଲାପାଳ ଆଦିତ୍ୟ ଗୋୟଲ, ବରପାଲି ତହସିଲଦାର ରୁକମଣ ମେହେର, ବରପାଲି ଗୋଷ୍ଠୀ ଉନ୍ନୟନ ଅଧିକାରୀ ସୁମନ୍ତ କୁମ୍ଭାର, ବରପାଲି ବିଜେପି ନଗର ମଣ୍ଡଳ ସଭାପତି ପ୍ରତାପ କେଶରୀ ସିଂଙ୍କ ସମେତ ବିଭିନ୍ନ ବିଭାଗର ଅଧିକାରୀ ଉପସ୍ଥିତ ରହି ବିକାଶ କାର୍ଯ୍ୟର ବିଭିନ୍ନ ଦିଗ ଉପରେ ଆଲୋଚନା କରିଥିଲେ।ସ୍ଥାନୀୟ ଲୋକଙ୍କ ମଧ୍ୟରେ ଏହି ଯୋଜନାକୁ ନେଇ ବେଶ ଉତ୍ସାହ ଦେଖିବାକୁ ମିଳୁଛି। ଯୋଜନା ସଫଳ ରୂପେ କାର୍ଯ୍ୟକାରୀ ହେଲେ ବରପାଲି କେବଳ ଏକ ସୁନ୍ଦର ସହର ନୁହେଁ, ବରଂ ଏହାର ଐତିହ୍ୟ, ସଂସ୍କୃତି ଓ ପର୍ଯ୍ୟଟନ ସମ୍ଭାବନା ପାଇଁ ରାଜ୍ୟ ସ୍ତରରେ ଏକ ସ୍ୱତନ୍ତ୍ର ପରିଚୟ ସୃଷ୍ଟି କରିବ ବୋଲି ଆଶା ପ୍ରକାଶ ପାଉଛି। 
ଆଗାମୀ ଦିନରେ ଏହି ସହର ଯଦି ଏକ ପ୍ରମୁଖ ପର୍ଯ୍ୟଟନ ସ୍ଥଳୀ ଭାବେ ବିକଶିତ ହୁଏ, ତେବେ ସ୍ଥାନୀୟ ଲୋକଙ୍କ ଆର୍ଥିକ, ସାମାଜିକ ଓ ସାଂସ୍କୃତିକ ବିକାଶ ପାଇଁ ଏହା ଏକ ବଡ଼ ସୁଯୋଗ ସୃଷ୍ଟି କରିବ। ପର୍ଯ୍ୟଟକଙ୍କ ଆଗମନ ବୃଦ୍ଧି ପାଇଲେ ହୋଟେଲ, ରେଷ୍ଟୁରାଣ୍ଟ, ପରିବହନ, ହସ୍ତଶିଳ୍ପ, ସ୍ଥାନୀୟ ବ୍ୟବସାୟ ଓ କ୍ଷୁଦ୍ର ଉଦ୍ୟୋଗର ବିକାଶ ହେବ। ଫଳରେ ଅନେକ ଯୁବକ-ଯୁବତୀଙ୍କ ପାଇଁ ନୂତନ ରୋଜଗାରର ସୁଯୋଗ ସୃଷ୍ଟି ହେବ ଏବଂ ସ୍ଥାନୀୟ ଲୋକଙ୍କ ଆୟ ବୃଦ୍ଧି ପାଇବ।
ଏଥି ସହିତ ସ୍ଥାନୀୟ ପରମ୍ପରା, ସଂସ୍କୃତି ଓ ଐତିହ୍ୟ ଦେଶ-ବିଦେଶରେ ପରିଚିତ ହେବ, ଯାହା ଏହି ଅଞ୍ଚଳର ଗୌରବକୁ ଆହୁରି ବଢ଼ାଇବ। ତେଣୁ ପର୍ଯ୍ୟଟନର ବିକାଶ କେବଳ ସହରର ସୌନ୍ଦର୍ଯ୍ୟ ବୃଦ୍ଧିରେ ସୀମିତ ନ ରହି, ସ୍ଥାନୀୟ ଲୋକଙ୍କ ଜୀବନଯାପନର ମାନ ଓ ଆର୍ଥିକ ସମୃଦ୍ଧିର ଏକ ନୂଆ ଦିଗ ଉନ୍ମୋଚନ କରିବ।