30-Dec-2023

ବଲାଙ୍ଗୀର,-ବଲାଙ୍ଗୀର ଭୀମଭୋଇ ମେଡିକାଲ କଲେଜ ହସପିଟାଲର ହାଉସସର୍ଜନ ଡାକ୍ତର ଡ.ବିଶ୍ୱରଂଜନ ସାହୁଙ୍କୁ ଗୁରୁବାର ଦିନ ସଂଧ୍ୟାରେ ଲାଲଟିକ୍ରାଠାରେ ଦୁଇଜଣ ଅସାମାଜିକ ଯୁବକ ମରଣାନ୍ତକ ଆକ୍ରମଣ କରିଥିଲେ । ସେହି ଘଟଣାକୁ ନେଇ ଗତଦୁଇ ହେଲା ହାଉସସର୍ଜନମାନେ କାର୍ଯ୍ୟବନ୍ଦ କରି ଧାରଣା ଦେଇ ଆନ୍ଦୋଳନ କରିଥିଲେ । ତେବେ ପୋଲିସ ଏକ ସ୍ୱତନ୍ତ୍ର ଟିମ ଗଠନ କରି ସେହି ଦୁଇଜଣ ଅଭିଯୁକ୍ତଙ୍କୁ କନ୍ଧମାଳରୁ ଯାଇ ଧରି ଗିରଫ କରିଥିବା ଆଜି ପୋଲିସ ସୂଚନା ଦେଇଛି । ସ୍ଥାନୀୟ ଟାଉନଥାନାଠାରେ ଆୟୋଜିତ ସାମ୍ବାଦିକ ସମ୍ବିଳନୀରେ ସଦର ଏସଡିପିଓ ତୁଫାନ ବାଘ ଏନେଇ ସୂଚନା ଦେଇଛନ୍ତି । ଗିରଫ ଅଭିଯୁକ୍ତ ଦ୍ୱୟ ଡାକ୍ତରଙ୍କୁ ଆକ୍ରମଣ ମାମଲା ରହିଥିବା ସହ ପୂର୍ବରୁ ମଧ୍ୟ ସେମାନଙ୍କ ନାମରେ ଡକାୟତିକେସ ରହିଥିବା ପୋଲିସ ସୂଚନା ଦେଇଛି । ଏହି ଦୁଇ ଅଭିଯୁକ୍ତଙ୍କୁ ଏନଏସଏରେ ବୁକ କରାଯିବାକୁ କୁହାଯାଇଛି । ଗିରଫ ଅଭିଯୁକ୍ତ ଦ୍ୱୟ ହେଲେ ଚଟିଆପାଲିପଡାର ସମୀର ବଡମାଲି ଓ ଶାନ୍ତିପଡାର ଲିପୁନ ଓରଫ ରାଜୁ ସାହୁ ବୋଲି ଜଣାଯାଇଛି । ମୁଖ୍ୟ ଅଭିଯୁକ୍ତ ସମୀର ତାଙ୍କ ସ୍ତ୍ରୀକୁ ଡାକ୍ତରଖାନାକୁ ଦେଖାଇବାକୁ ଯାଇଥିଲେ । କିନ୍ତୁ ସେଠାରେ ଥିବା ଡ.ବିଶ୍ୱରଂଜନ ସାହୁ କୁଆଡେ ଚିକିତ୍ସାରେ ଅବହେଳା କରିଥିଲେ । ଫଳରେ ସେତେବେଳେ ସମୀର ଡାକ୍ତରଙ୍କ ସହିତ ଉଚ୍ଚବାଚ ହୋଇଥିଲେ । ସେହି ଘଟଣାକୁ ନେଇ ସଂଧ୍ୟାରେ ଡାକ୍ତର ହ ଷ୍ଟେଲକୁ ଫେରିବା ବେଳେ ଲାଲଟିକ୍ରାଠାରେ ତାଙ୍କୁ ଅଟକାଇ ସମୀର ଓ ତାର ସହ ଯୋଗୀ ଲିପୁନ ମାଡମାରିଥିଲେ । ଏହି ଘଟଣାକୁ ନେଇ ଡାକ୍ତରମାନେ ଉଦବେଗ ପ୍ରକାଶ କରିଥିଲେ ଓ ଆନ୍ଦୋଳନ କରି ଅଭିଯୁକ୍ତଙ୍କୁ ତୁରନ୍ତ ଗିରଫ କରାଯାଇ ଡାକ୍ତରଙ୍କୁ ସୁରକ୍ଷା ଦିଆଯିବାକୁ ଦାବି କରିଥିଲେ । ଡ.ବିଶ୍ୱରଂଜନ ସାହୁଙ୍କ ଅଭିଯୋଗକୁ ଭିତ୍ତିକରି ଟାଉନଥାନାରେ ମାମଲା ନମ୍ବର-୭୪୦/୨୦୨୩ ଦଫା ୩୪୧/୨୯୪/୩୨୩/୩୨୪/୩୦୭/୩୪ ଆଇପିସି ଓ ୩ ମେଡିକାଲ କର୍ମଚାରୀଙ୍କୁ ଦୁର୍ବବ୍ୟହାର(୨୦୦୮)ରେ ମାମଲା ରୁଜୁ କରି ଏକ ସ୍ୱତନ୍ତ୍ର ଟିମ ଗଠନ କରି ତଦନ୍ତ ଆରମ୍ଭ କରିଥିଲେ । ଏହି ତଦନ୍ତ ଟିମରେ ଆଇଆଇସି ବିଶ୍ୱଜିତ ମନବୋଧ,ଆଇଆଇସି ଅନୀତା ପଟନୀଆ,ଏସଆଇ ଏସ.କେ.ବାରିକ,ଏମ.ମଲ୍ଲିକ,ଏ.ନାୟକ,ଏ.ସାମଲ,ଏଏସଆଇ ଏଚ.କେ.ମିଶ୍ର,କେ.ମାଝୀ,ବି.ଦେହେରି,ବି.ଭୋଇ,କେ.ପାଣ୍ଡେ,ଟି ଭୁମିଆ ଓ କନଷ୍ଟବଲ ଏସ.ସାହୁ ସାମିଲ ଥିଲେ । ଗତ ୨୦୧୯ ମସିହାରେ ଟାଉନଥାନା ଅଞ୍ଚଳରେ ହୋଇଥିବା ଏକ ଡକାୟତି ମାମଲା ଏହି ଦୁଇଜଣ ଅଭିଯୁକ୍ତ ସାମିଲ ଥିଲେ । ସେତେବେଳେ କେସନମ୍ବର-୫୧୧/୨୦୧୯ ଦଫା ୩୯୫/୩୨୪/୧୨୦(ବି) ଆଇପିସିରେ ସାମିଲ ଥିଲେ ଓ ଗିରଫ ହୋଇ ଜେଲ ଯାଇଥିଲେ ବୋଲି ଏସଡିପିଓ ଶ୍ରୀ ବାଘ ସୂଚନା ଦେଇଛନ୍ତି ।