21-Nov-2023

ବୀରମହାରାଜପୁର,  (ବିନୋଦ ପାଣ୍ଡେ ): ସୁବର୍ଣ୍ଣପୁର ଜିଲ୍ଲା ବୀରମହାରାଜପୁର ବ୍ଲକ ଅନ୍ତର୍ଗତ ଜଟେସିଂହା ହରିହର ଜୋର ପୋଲ ଉପରୁ ଜଣେ ଅସହାୟ ମାନସିକ ଅଜଣା ବ୍ୟକ୍ତିଙ୍କୁ ସ୍ଥାନୀୟ ବ୍ଳକ ଉପାଧ୍ୟକ୍ଷ ନାରାୟଣ ଲୁହା ଉଦ୍ଧାର କରିଥିଲେ।‌  ସୁବଳୟାକୁ  କୈାଣସି କାର୍ଯ୍ୟରେ  ଯାଉଥିବା ସମୟରେ ଉପାଧ୍ୟକ୍ଷ ଶ୍ରୀ ଲୁହା ଉକ୍ତ ସ୍ଥାନରେ  ଅସହାୟ ଅବସ୍ଥାରେ ଜଣେ ମାନସିକ ବ୍ୟକ୍ତି ପଡି ରହିଥିବା ଦେଖିବାକୁ ପାଇଥିଲେ। ତୁରନ୍ତ ସେଠାରେ ନିଜ ଗାଡି ଅଟକାଇ ଉକ୍ତ ଅପରିଚିତ ଅସହାୟ ବ୍ୟକ୍ତି କୁ ପ୍ରଥମେ ତା'ର ମୁହଁରେ ପାଣି ପକାଇ ଥିଲେ। ଏବଂ ଜୀବିତ ଥିବା ଜାଣି ପାଣି ପିଇବାକୁ ଦେଇଥିଲେ।  ଏହି ମାନସିକ ବ୍ୟକ୍ତି ଜଣକ ଗୁରୁତର ଥିବାରୁ ଶ୍ରୀ ଲୁହା ଉକ୍ତ ସ୍ଥାନରୁ ତୁରନ୍ତ ଉଦ୍ଧାର କରି  ଆମ୍ବୁଲାନ୍ସ ଯୋଗେ ବୀରମହାରାଜପୁର ମୁଖ୍ୟ ଡାକ୍ତରଖାନାରେ ଭର୍ତ୍ତି କରିଥିଲେ। ସେଠାରେ ଡାକ୍ତର ସ୍ବପ୍ନେଶ୍ଵର ବେହେରା ଗୁରୁତର ବ୍ୟକ୍ତିକୁ ଚିକିତ୍ସା କରିବା ସହ ବାମ ହାତର ଆଙ୍ଗୁଠି କଟି ପୋକ ଲାଗିଥିବା ସ୍ଥାନରେ ସଫା  କରିଥିଲେ। ସେ ଆଠଗଡ  ବଡମ୍ବା ଗ୍ରାମର ପ୍ରମୋଦ କୁମାର ପ୍ରଧାନ ବୋଲି ପ୍ରକାଶ କରିଥିଲା। ମୋ ନିଜ ସ୍ତ୍ରୀ ମୋତେ ଛାଡି ଯିବାରୁ ମୋର ଏମିତି ଅବସ୍ଥା ହୋଇଛି ବୋଲି ନିଜେ କହିଛି। ଉପାଧ୍ୟକ୍ଷ ଶ୍ରୀ ଲୁହା ତାଙ୍କୁ ଗାଧୋଇ ନୂତନ ବସ୍ତ୍ର ପରିଧାନ କରିବା ସହ ଖାଇବାକୁ ଦେଇଥିଲେ। ଉପାଧ୍ୟକ୍ଷ ମହାନ କାର୍ଯ୍ୟ ଯୋଗୁଁ ଉକ୍ତ ଅସହାୟ ବ୍ୟକ୍ତି ଜଣକ ନୂଆ ଜିବନ ପାଇଛି । ଫଲରେ ଅଞ୍ଚଳର ବିଭିନ୍ନ ମହଲରୁ ଶ୍ରୀ ଲୁହାଙ୍କୁ ସାଧୁବାଦ ଜଣାଇଛନ୍ତି।