29-Aug-2026

ବେଲପଡା(ମଳୟ ମିଶ୍ରଙ୍କ ରିପୋର୍ଟ):  ସମଗ୍ର ଶିକ୍ଷା ଅନ୍ତର୍ଗତ ବଲାଙ୍ଗୀର ଜିଲ୍ଲାର ଦାଦନ ଅଧ୍ୟୁଷିତ ବ୍ଲକ୍ ବେଲପଡାର କାନୁଟ୍ କସ୍ତୁରବା' ଗାନ୍ଧୀ ବାଳିକା ବିଦ୍ୟାଳୟରେ ବ୍ୟାପକ ଅନିୟମିତତାର ଅଭିଯୋଗ ହେଉଛି । ମୁଖ୍ୟତଃ ହଷ୍ଟେଲର ଛାତ୍ରୀମାନଙ୍କ ଖାଦ୍ୟପେୟ ବା ମେସ୍ ଖର୍ଚ୍ଚରେ କେବେ ଅଧିକ ଉପସ୍ଥାନ ପକାଯାଇ ତ କେବେ ନିମ୍ନମାନର ଖାଦ୍ୟ ଦିଆଯାଇ ହିସାବପତ୍ରରେ ମିଥ୍ୟାବିଲ୍ ଦାଖଲ କରାଯାଉଥିବା ବେଳେ , ବିଶେଷ କରି ମାସ ମାସ ଧରି ଉଧାରରେ ଅଣାଯାଉଥିବା ମେସ୍ ପାଇଁ ଖାଦ୍ୟସାମଗ୍ରୀର ମାନ , ପରିମାଣ ଓ ଦରଦାମ୍ ରେ ନିୟମିତ ଭାବରେ ହେରଫେର କରାଯାଇ ସେ ବାବଦ ଟଙ୍କା ବାଟମାରଣା କରାଯାଇ ଆସୁଥିବା ଚର୍ଚ୍ଚା ହେଉଛି । ଏଥିରେ ହଷ୍ଟେଲର ୱାଡେନ , ହଷ୍ଟେଲ୍ ଇନଚାର୍ଯ  , ଦାୟିତ୍ବରେ ରହିଥିବା ପ୍ରଧାନଶିକ୍ଷକ, ବିଇଓ , ଜେଣ୍ଡର କୋଅର୍ଡିନେଟର ଓ ଡିପିସି ପ୍ରମୁଖଙ୍କ ସମ୍ପୃକ୍ତି ରହିଥିବାରୁ ଏହା ବାହାରକୁ ଆସୁନଥିବା କୁହାଯାଉଛି ।

ଏହାସହିତ ଅନ୍ତେବାସିନୀ ଛାତ୍ରୀଙ୍କ ସ୍ବାସ୍ଥ୍ୟାବସ୍ଥାର ସଠିକ୍ ତଦାରଖ କରାଯାଇ ଉପଯୁକ୍ତ ଚିକିତ୍ସା ବ୍ୟବସ୍ଥା ଗ୍ରହଣ କରାଯାଉ ନ ଥିବା ଓ ଜାଣିଲେ ମଧ୍ୟ ମୁଖ୍ୟତଃ ଇନ୍ ଚାର୍ଯ ରହିଥିବା ଜଣେ ସ୍ଥାନୀୟା ଶିକ୍ଷୟିତ୍ରୀଙ୍କ ମେରୀରାୟ ନୀତି ଯୋଗୁଁ କେହି ପାଟି ଫିଟାଉନାହାଁନ୍ତି ।  

କିଛିଦିନ ତଳେ ବଲାଙ୍ଗୀର ଜିଲ୍ଲା ତଥା ପାଟଣାଗଡ ଉପଖଣ୍ଡର ପାଟଣାଗଡ ବ୍ଲକର ସୋଲବନ୍ଧ କେଜିବିଭିର ଜନୈକା ଛାତ୍ରୀଙ୍କର ରହସ୍ୟଜନକ ଭାବରେ ମୃତ୍ୟୁ ହେବା ସହିତ ଅନ୍ୟଜଣେ ଛାତ୍ରୀ ଅସୁସ୍ଥ ହୋଇପଡି ଡାକ୍ତରଖାନାରେ ଚିକିତ୍ସା ପାଇଁ ଭର୍ତ୍ତି ହୋଇଥିଲେ । ଏ ସମ୍ପର୍କରେ ବିଭାଗୀୟ ଓ ଥାନାରେ ପୁଲିସ ତଦନ୍ତ ହୋଇଥିବା ସହ ମୃତା ଛାତ୍ରୀଙ୍କର ପୋଷ୍ଟମର୍ଟମ କରାଯାଇଥିଲା ।  ଦ୍ବିତୀୟତଃ  ହଷ୍ଟେଲର ଜଣେ ଛାତ୍ରୀ ପ୍ରେମିକ ସହ ହାଇଦ୍ରାବାଦ ପଳାଇଥିବା ଘଟଣା ଜଣା ପଡିଥିଲା । ଏହାପରେ ଇନଚାର୍ଜ ଶିକ୍ଷକଙ୍କ ଠାରୁ ଦାୟିତ୍ବ କାଢିନିଆଯିବା ସହ ଉକ୍ତ ଘଟଣାରେ ମୋଟ ୮ ଜଣଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ଶୁଣାଯାଇଥିଲେ ହେଁ , ସବୁକୁ ଚପାଇ ଦିଆଗଲା । 

ସେହି ସମୟରେ ଦେଓଗାଁ' ବ୍ଲକ୍ ର ସାଗରପାଲି , ବେଲପଡା ବ୍ଲକର ଉକ୍ତ କାନୁଟ୍ ଓ ତୁରେକେଲା ବ୍ଲକ୍ ର କୁଇବାହାଲ କେଜିବିଭିରେ ମଧ୍ୟ ଅନୁରୂପ ଗୁରୁତର ଅଭିଯୋଗ ଉଠିଥିଲା ।  ଗତମାସ ୩୧ ତାରିଖରେ ଦେଓଗାଁ' ବ୍ଲକର ସାଗରପାଲି କେଜିବିଭିର ଜଣେ ୬ଷ୍ଠ ଶ୍ରେଣୀର ଛାତ୍ରୀ ରାମଚନ୍ଦ୍ରପୁରର ପେଟବ୍ୟଥା ହେଉଥିବାରୁ ହଷ୍ଟେଲର ଇନଚାର୍ଜ ମିତାମୟୀ ନାୟକ ତା' ଘରଲୋକଙ୍କୁ ଖବର ଦେଇଥିଲେ ଓ ସେମାନେ ଆସିଥିବା ଦେଖାଯାଇଥିଲା ।  ଅଥଚ ସେଦିନ ଓ ତା' ପୂର୍ବଦିନ ହଷ୍ଟେଲର ୱାଡେନ୍ ନିରୁପମା ମେହେର ଓ ଆକାଉଣ୍ଟାଣ୍ଟ ନିହାରିକା ମେହେର ଚାଉଳ ଆଣିବାକୁ ଗଇଁନ୍ତଳା ଯୋଗାଣ ଗୋଦାମକୁ ଯାଇଥିବାରୁ ଅନୁପସ୍ଥିତ ରହିଥିବା କୁହାଯାଇଥିଲା ।  ଏ ସମ୍ପର୍କରେ ଜେଣ୍ଡର କୋଅର୍ଡିନେଟର ସନ୍ତୋଷ କୁମାର ମହାରଣାଙ୍କର ଫୋନ୍ ଯୋଗେ ଦୃଷ୍ଟି ଆକର୍ଷଣ କରାଯିବାରୁ ସେ ତାଙ୍କର ଅସହାୟତା ପ୍ରକାଶ  କରିଥିଲେ ।  ଦ୍ବିୟତଃ ସେହିଦିନ ବେଲପଡା ବ୍ଲକର କାନୁଟ୍ କେଜିବିଭିର ଜନୈକା ୭ମ ଶ୍ରେଣୀର ଛାତ୍ରୀ ଭୁଟୁଙ୍ଗପଡାର ଯୋଗେଶ୍ବରୀ ମହାନନ୍ଦ ବାନ୍ତି କରି ଅସୁସ୍ଥ ହୋଇପଡିବାରୁ ତାଙ୍କ ପରିବାର ଲୋକେ ନେବାକୁ ଆସିଥିବା ଦେଖାଯାଇଥିଲା । ତେବେ ଛାତ୍ରୀଟିର କିଛି ହୋଇନାହିଁ , ସେ ଠକୁଛି ବୋଲି  ୱାଡେନ୍ ମୋହିନୀ ଗିରି ପ୍ରକୃତ ଘଟଣାକୁ ଲୁଚାଇ ପ୍ରକାଶ କରିଥିଲେ । ଏହି କେଜିବିଭିର  ଇନଚାର୍ଜ ରହିଥିବା ଶିକ୍ଷୟିତ୍ରୀ ଲୋପାମୁଦ୍ରା ସାହୁ କଟକଣା ଆଳରେ ସମସ୍ତ ପ୍ରକାରର ଅନିୟମିତତାକୁ ଘଣ୍ଟଘୋଡାଇ ଆସୁଥିବା ଚର୍ଚ୍ଚା ହେଉଛି । ତେଣୁ ମୁଖ୍ୟତଃ ମାସ ମାସ ଧରି ଉଧାରରେ ଦୋକାନୀ ଦେଉଥିବା ନିମ୍ନମାନର ଡାଲି ଓ ତେଲ ଏହାର କାରଣ ବୋଲି କୁହାଯାଉଛି ।  ଲକ୍ଷାଧିକ ଟଙ୍କାର ମେସ୍ ସାମଗ୍ରୀ ମାସ ମାସ ଧରି ଦୋକାନରୁ ବାକିରେ ଆଣୁଥିବା ସହିତ ବାଟମାରଣା ପାଇଁ ବଜାରଦର ଠାରୁ ଅଧିକମୂଲ୍ୟ ପକାଯାଇଆସୁଥିବାରୁ ନିମ୍ନମାନର ଶସ୍ତାଭେଜାର ସାମଗ୍ରୀ ନିମନ୍ତେ ଏପରି ସମସ୍ୟା ଉପୁଜୁଥିବା ଆଶଙ୍କା କରାଯାଉଥିଲେ ହେଁ , ଉପରୁ ତଳସ୍ତର ପର୍ଯ୍ୟନ୍ତ ସମସ୍ତେ ଭାଗ ଖାଉଥିବାରୁ ମୁହଁ ବନ୍ଦ କରି ସବୁପ୍ରକାର ଦୁର୍ଘଟଣାର ପ୍ରକୃତ ତଦନ୍ତ ନକରି ଚପାଇଦେଉଥିବା କୁହାଯାଉଛି । ହଷ୍ଟେଲର ଶତାଧିକ ଛାତ୍ରୀଙ୍କର କେବଳ ମେସ୍ ଖାଦ୍ୟପେୟ ନୁହେଁ , କମିଟି ସହ ସଲାସୁତୁରାରେ  ଛାତ୍ରଛାତ୍ରୀଙ୍କ ୟୁନିଫର୍ମ ଓ ଅନ୍ୟାନ୍ୟ ଅବୈଧ କାରବାରର ଏହି  ସ୍ଥାନୀୟା ଇନଚାର୍ଜ ହିଁ ସର୍ବେସର୍ବା ବୋଲି ବହୁଦିନରୁ ଚର୍ଚ୍ଚା ହୋଇ ଆସୁଛି  ।  ଏଣୁ ତଳସ୍ତରରେ ଅନ୍ତତଃ କେଜିବିଭିର ଆକାଉଣ୍ଟାଣ୍ଟ,  ୱାର୍ଡେନ ଓ ଇନଚାର୍ଜଙ୍କର ଏ ପ୍ରକାରର ହାତସଫେଇର ଭିଜିଲାନ୍ସ ତଦନ୍ତର ଆବଶ୍ୟକତା ରହିଛି ।  ପ୍ରତିମାସର ମେସ୍ ସାମଗ୍ରୀର ଦରତାଲିକା ସମ୍ପର୍କରେ ଜାଣିବାକୁ କେତେକ ବୁଦ୍ଧିଜୀବୀଙ୍କ ପକ୍ଷରୁ ସୂଚନା ଅଧିକାର ଆଇନ ବଳରେ ଆବେଦନ କରିବାକୁ ପ୍ରସ୍ତୁତ ହେଉଥିବା ସୂଚନା ମିଳିଛି । ପରେ  ଏ ସମ୍ପର୍କିତ ଏକ ପୁଙ୍ଖାନୁପୁଙ୍ଖ ରିପୋର୍ଟ ପ୍ରକାଶ ପାଇବ  । 

ଆହୁରି ମଧ୍ଯ , ବର୍ଷ ବର୍ଷ  ଧରି ବିଭିନ୍ନ ବିଭାଗର ଆବାସିକ ବିଦ୍ୟାଳୟ ଓ ହଷ୍ଟେଲ ଗୁଡିକରେ ନିୟମିତ ମେସ୍ , ଡ୍ରେସ୍ ଓ ଅନ୍ୟାନ୍ୟ ବାଟମାରଣା ଚାଲିଛି । ଏଗୁଡିକ ମଧ୍ୟରେ ସମଗ୍ର ଶିକ୍ଷା , ଆଦିବାସୀ କଲ୍ଯାଣ ବିଭାଗ ଓ ଏହି ବିଭାଗର ' ଅନ୍ବେଷା ' ହଷ୍ଟେଲ ଗୁଡିକରେ ଭେଜାଲ ଶସ୍ତାଖାଦ୍ୟ ପିଲାମାନଙ୍କର ପ୍ରାଣହାନୀର କାରଣ ପାଲଟିଛି । ଗତ ସପ୍ତାହରେ ତୁରେକେଲା ବ୍ଲକ ଅନ୍ତର୍ଗତ କଣ୍ଟାବାଞ୍ଜିର ଏକ ପବ୍ଲିକ୍ ସ୍କୁଲ୍ ତଥା ୩୪୮ ଶଯ୍ୟାବିଶିଷ୍ଟ  ହିଆଲ୍ 'ଅନ୍ବେଷା' ହଷ୍ଟେଲର ଜଣେ ଛାତ୍ରର ମୃତ୍ୟୁର କାରଣ ଅଦ୍ୟାପି ସ୍ପଷ୍ଟ ହୋଇନାହିଁ । ଇଂରାଜୀ ମାଧ୍ୟମର ସ୍କୁଲରେ ପାଠ ପଢୁଥିବା  ଏହି ସ୍ବତନ୍ତ୍ର ହଷ୍ଟେଲରେ ଆଗରୁ ଛାତ୍ରୀ ଅସଦାଚରଣ ପରି ଗୁରୁତର ଅଭିଯୋଗ ପ୍ରକାଶ ପାଇ ଚାଞ୍ଚଲ୍ୟ ସୃଷ୍ଟି କରିଥିଲା । ଏହି ହଷ୍ଟେଲର ଇନଚାର୍ଜ ସୁରେଶ ବେହେରା ଗତ ୨୦୨୫ ରୁ ରହିଛନ୍ତି ଓ ଏହା ବଲାଙ୍ଗୀର ଆଦିବାସୀ କଲ୍ଯାଣ ବିଭାଗ ଅଧୀନରେ ପରିଚାଳିତ  । ଏହି ପିଲାଟିର ଅଭାବିତ ମୃତ୍ୟୁର କାରଣ  ହଷ୍ଟେଲ ଦାୟିତ୍ୱରେ ରହିଥିବା ଶିକ୍ଷକ କିମ୍ବା ଜିଲ୍ଲା କଲ୍ଯାଣ ଅଧିକାରୀ ପ୍ରତାପ ଚନ୍ଦ୍ର ମହାନ୍ତି ଜାଣିଶୁଣି ଲୁଚାଉଥିବା ଚର୍ଚ୍ଚା ହେଉଛି ।