22-Nov-2023

ସିନ୍ଧେକେଲା(ଅନୀଲ କୁମାର ତ୍ରିପାଠୀ ): ବଲାଙ୍ଗୀର ଜିଲ୍ଲା ଶେଷ ସୀମାରେ ଅବସ୍ଥିତ ସିନ୍ଧେକେଲା। ବର୍ତ୍ତମାନ ବଙ୍ଗୋମୁଣ୍ଡା ବ୍ଲକ ଅଧିନରେ ଥିବା ବେଳେ ଦୀର୍ଘ ପ୍ରାୟ ତିନି ଦଶନ୍ଧି ଉପରେ ହେଲା ସିନ୍ଧେକେଲାର ପାରିପାର୍ଶ୍ବିକ ସ୍ଥିତି ଯୋଗୁଁ ଏକ ନୂତନ ବ୍ଲକ ଘୋଷଣା କରାଯିବା ପାଇଁ ବାରମ୍ବାର ଦାବି ହୋଇ ଆସୁଛି  l ଏହାରି ଭିତରେ ସରକାର ସିନ୍ଧେକେଲା ପ୍ରତି ବୈମାତୃକ ମନୋଭାବ ପୋଷଣ କରିଆସୁଛନ୍ତି ବୋଲି ଅଭିଯୋଗ କରି ଅଞ୍ଚଳରେ ବିଭିନ୍ନ ସମୟରେ ଅଖଚକ, ଦୋକାନ ବଜାର ବନ୍ଦ କରି ସିନ୍ଧେକେଲାକୁ ଏକ ନୂତନ ବ୍ଲକ ଘୋଷଣା କରାଯିବାକୁ ନେଇ ଦାବି ହୋଇ ଆସିଛି । ତେବେ ସିନ୍ଧେକେଲା ଅଞ୍ଚଳ ବାସୀଙ୍କ ଭାବାବେଗ ଓ ଦାବିକୁ ଓଡିଶା ବିଧାନସଭାର ଶୀତକାଳୀନ ଅଧିବେସନରେ ୨୧ ତାରିଖ ମଙ୍ଗଳବାର ଦିନ କଣ୍ଟାବାଞ୍ଜି ବିଧାୟକ ସନ୍ତୋଷ ସିଂ ସାଲୁଜା ପତ୍ର ସଂଖ୍ୟା ୟୁଡିଏକ୍ୟୁ ନମ୍ବର - ୧୬ ର ପ୍ରଶ୍ନ (କ) ରାଜ୍ୟ ସରକାର ରାଜ୍ୟରେ ମୋଟ କେତେ ଗୋଟି ନୂଆ ବ୍ଲକ ଗଠନ କରିବା ପାଇଁ ବିଚାର କରୁଛନ୍ତି ତାର ଜିଲ୍ଲା ନାମ ଓ ନୂତନ ବ୍ଲକର ନାମ ତାଲିକା (ଖ) ସିନ୍ଧେକେଲା ପଞ୍ଚାୟତ ଓ ଲାଠୋର ପଞ୍ଚାୟତ କୁ ନୂଆ ବ୍ଲକ ଘୋଷଣା କରିବା ପାଇଁ ବିଚାର କରିବେ କି ଓ କୋଉ ସମୟ ସୀମା ମଧ୍ୟରେ ରାଜ୍ୟ ସରକାର ନିଷ୍ପତ୍ତି ଗ୍ରହଣ କରିବେ ବୋଳି ପଚାରିଥିଲେ। ଏହାର ଉତ୍ତରରେ ପଞ୍ଚାୟତ ରାଜ ଓ ପାନୀୟ ଜଳ ମନ୍ତ୍ରୀ ପ୍ରଦୀପ କୁମାର ଅମାତ ପ୍ରଶ୍ନ (କ) ବର୍ତ୍ତମାନ ରାଜ୍ୟରେ ନୂତନ ବ୍ଲକ ପୁନର୍ଗଠନ ପାଇଁ ସରକାରଙ୍କ କୋୖଣସି ଯୋଜନା ନାହିଁ (ଖ) ଭବିଷ୍ୟତରେ ସରକାର ବ୍ଲକ ପୁନର୍ଗଠନ ପାଇଁ ଯେତେବେଳେ ବିଧିବଦ୍ଧ ନିଷ୍ପତ୍ତି ନେବେ ସେ ସମୟରେ ସିନ୍ଧେକେଲା ପଞ୍ଚାୟତ ଓ ଲାଠୋର ପଞ୍ଚାୟତକୁ ନୂଆ ବ୍ଲକ ଘୋଷଣା କରିବା ପ୍ରସ୍ତାବ ଉପରେ ବିଚାର କରିବେ ବୋଲି ଉତ୍ତର ରଖିଥିଲେ l ବିଧାୟକ ସାଲୁଜା ବିଭିନ୍ନ ସମୟରେ ଐତିହ୍ୟ ସମ୍ପନ୍ନ ରାଣୀପୁର ଝରିଆଲ ହେଉ କି ସିନ୍ଧେକେଲା ବ୍ଲକ ଦାବି ହେଉ ସବୁବେଳେ ସରକାରଙ୍କ ଦୃଷ୍ଟି ଆକର୍ଷଣ କରୁଥିବା ଯୋଗୁଁ ଅଂଚଳବାସୀ ଧନ୍ୟବାଦ ଦେଇଛନ୍ତି । ସରକାର ମଧ୍ୟ ଠିକ ସମୟରେ ଠିକ ନିଷ୍ପତ୍ତି ନେଲେ ଅଞ୍ଚଳବାସୀ ଉପକୃତ ହୋଇପାରିବେ ବୋଲି ବିଭିନ୍ନ ଅନୁଷ୍ଠାନ ଓ ବ୍ୟକ୍ତି ବିଶେଷ  ଆଶା କରୁଛନ୍ତି । ବ୍ଲକ ଦାବିକୁ ନେଇ ଅଞ୍ଚଳରେ ଏକ ଆଶା ସଞ୍ଚାର ହୋଇଥିବା ବେଳେ ଆଗାମୀ ଦିନରେ ମଧ୍ୟ ଦରକାର ପଡିଲେ ବ୍ଲକ ଦାବିକୁ ନେଇ ଦଳମତ ନିର୍ବିଶେଷରେ ରାଜରାସ୍ତାକୁ ଓହ୍ଲାଇବା ପାଇଁ ପଛଘୁଞ୍ଚା ଦେବୁନାହିଁ ବୋଲି ସମାଜସେବୀ ଅନିଲ କୁମାର ତ୍ରିପାଠୀ, ସିନ୍ଧେକେଲା ବଣିକ ସଂଘ ସଭାପତି ସୁବାସ ଜୈନ , ଝରିଆଲ ସରପଞ୍ଚ ଭରଦ୍ୱାଜ ଗହୀର, ଅଳଣ୍ଡା ସରପଞ୍ଚଙ୍କ ପ୍ରତିନିଧି ଯୁବରାଜ ବାଗ, ଝଲପ ସରପଞ୍ଚଙ୍କ ପ୍ରତିନିଧି ଗୋବିନ୍ଦ ପୁଟେଲ, ବରିଷ୍ଠ ସାମ୍ବାଦିକ ଦିନେଶ ଜୈନ, ବଲାଙ୍ଗୀର ଜିଲ୍ଲା ବିଜେଡ଼ି ଉପସଭାପତି ଉମାକାନ୍ତ ସାହୁ, ଜିଲ୍ଲା ବିଜେପି ସମ୍ପାଦକ ଅନିଲ ନାଏକ, ସିନ୍ଧେକେଲା ମଣ୍ଡଲ ବିଜେପି ଯୁବମୋର୍ଚ୍ଚା ଉପସଭାପତି ହେମନ୍ତ ସାହୁ, ନରେଶ ରଣା, ନିତ୍ୟାନନ୍ଦ ପୃଷେଠ ପ୍ରମୁଖ ସୁଚନା ଦେଇଛନ୍ତି।