17-Oct-2023

କଣ୍ଟାମାଳ(ଜୟ କୁମାର ମହାରଣା ): ବନ ଧନର ଦ୍ରୁତ ଅବକ୍ଷୟ ସମ୍ପ୍ରତି ସମଗ୍ର ଅଞ୍ଚଳବାସୀ ଙ୍କ ପାଇଁ ଏକ ପ୍ରକାର ଚ୍ୟାଲେଞ ସୃଷ୍ଟି କରିଥିବାବେଳେ ଉଭୟ ରାଜ୍ୟ ଓ କେନ୍ଦ୍ର ସରକାର ଏହାରି ସୁରକ୍ଷା ପାଇଁ ବିଭିନ୍ନ ଯୋଜନା ମାଧ୍ୟମରେ ପାଣି ଭଳି ଅର୍ଥ ଖର୍ଚ୍ଚ କରୁଛନ୍ତି  l  ହେଲେ ବୌଦ୍ଧ ବନଖଣ୍ଡ କଣ୍ଟାମାଳ ରେଞ୍ଜର ବିଭିନ୍ନ ସଂରକ୍ଷିତ ଘଞ୍ଚ ଜଙ୍ଗଲରୁ ପ୍ରତିଦିନ ବହୁ ମୂଲ୍ୟବାନ ଗଛ କଟାଯାଇ ତାରି ମଞ୍ଜକୁ ସାଇଜ କରାଯାଇ ଏଠାରୁ ବାହାର ରାଜ୍ୟକୁ ଚୋରା ଚାଲାଣ କରାଯାଉଥିବା ନେଇ ସାଧାରଣରେ ତୀବ୍ର ଅସନ୍ତୋଷ ପ୍ରକାଶ ପାଉଛି  l  ଏହିଁ ଚୋରା କାଠ ଚାଲାଣ ରେ ଏକ ସୁସଂଗଠିତ ରାକେଟ କାମ କରୁଥିବା ବେଳେ ବିଭାଗ ନିରବଦ୍ରଷ୍ଟା ସାଜିଥିବା ଆଲୋଚନା ହେଊଛି  l  ଏହାର ଜ୍ୱଳନ୍ତ ଉଦାହରଣ ଘଣ୍ଟାପଡା ସେକ୍ସନ ପରତୀମାଳ ରୁ ଉଦ୍ଧାର କେନ୍ଦୁ କାଠ ଗଣ୍ଡି   l 

ସୂଚନାନୁସାରେ ବୌଦ୍ଧ ଜିଲ୍ଲା କଣ୍ଟାମାଳ ବନାଞ୍ଚଳ ଅଧିନ ଘଣ୍ଟାପଡ଼ା ସେକସନ ଅନ୍ତର୍ଗତ ଖୁଣ୍ଟିଗୋରା ପଞ୍ଚାୟତର ପରତିମାଲ ପୋଖରୀ ଭିତରୁ ୩୫ ଖଣ୍ଡ କେନ୍ଦୁ ଗଣ୍ଡି ଜବତ କଲା ବନ ବିଭାଗ।  ଘଣ୍ଟାପଡ଼ା ସେକସନ ବନପାଳ ଚନ୍ଦ୍ରଶେଖର ଦାସ ବିଶ୍ଵସ୍ତ ସୂତ୍ରରୁ ଖବର ପାଇ ନିଜର ଟିମ ସହ ପରତିମାଲ ପୋଖରୀକୁ ଯାଇ ପାଣି ଭିତରେ ଖୋଜାଖୋଜି କରି ପାଣି ଭିତରେ କାଠ ଗଣ୍ଡି ଥିବା ସୁରାକ ପାଇଥିଲେ  । ସୁରାକ ପାଇ ସ୍ଥାନୀୟ ଲୋକମାନଙ୍କ ସାହାଯ୍ୟରେ ପୋଖରୀ ପାଣିରୁ ୩୫ ଖଣ୍ଡ କାଠ ଗଣ୍ଡି ଉଦ୍ଧାର କରି ଜବତ କରିଛନ୍ତି। ଜବତ କାଠ ଗଣ୍ଡି ଗୁଡିକ କେନ୍ଦୁ କାଠ ବୋଲି ତଦନ୍ତରୁ ଜଣାପଡିଛି l ଉକ୍ତ ଚଢାଉରେ ସମସ୍ତ ବନ କର୍ମଚାରୀ ସାମିଲ ଥିଲେ । ବର୍ତ୍ତମାନ ସୁଦ୍ଧା ଜବତ କାଠଗଣ୍ଡିର ମୂଲ୍ୟ ଆକଳନ ହୋଇ ନ ଥିବା ସ୍ଥଳେ କାଠଗଣ୍ଡି କେଉଁଠୁ ଆସିଲା, ଏଥିରେ କେଉଁମାନେ ସାମିଲ ହୋଇଛନ୍ତି ତାର ତଦନ୍ତ ଚାଲିଥିବା ନେଇ ପ୍ରକାଶ କରିଛନ୍ତି ବନପାଳ ଶ୍ରୀ ଦାସ ।