21-Aug-2023

ନୟାଗଡ଼, (ପ୍ରଦୀପ କୁମାର ପଣ୍ଡା) ଶିକ୍ଷାବିଭାଗର ବିଚିତ୍ର ନୀତି।ଦୀର୍ଘ ଚାରି ମାସ ହେଲା ସମସ୍ତ ସ୍କୁଲ ଖୋଲି ପାଠପଢା ଆରମ୍ଭ ହୋଇଥିବା ବେଳେ ଏ ପର୍ଯ୍ୟନ୍ତ କୌଣସି ଛାତ୍ରଛାତ୍ରୀ ସମସ୍ତ ପାଠ୍ୟପୁସ୍ତକ ପାଇନଥିବାରୁ ପାଠ ପଢା କେମିତି ଚାଲିଥିବ ତାହା ସହଜେ ଅନୁମେୟ ।ରାଜ୍ୟ ସରକାର ମାଳ ମାଳ ବିଦ୍ୟାଳୟ ଖୋଲି ସମସ୍ତେ ପଢିବେ ସମସ୍ତେ ବଢ଼ିବେ ନାରା ଦେଉଥିବା ବେଳେ ତାହା ଏକ ପ୍ରହସନ ରେ ପରିଣତ ହେବା ପରି ଜଣା ଯାଉଛି । ଗୁଣାତ୍ମକ ଶିକ୍ଷାର ଡିଣ୍ଡିମ ପିଟୁଥିବା ସରକାର ସ୍କୁଲ ଖୋଲିବାର ଚାରି ମାସ ବିତି ଯାଇଥିଲେ ମଧ୍ୟ ଏ ପର୍ଯ୍ୟନ୍ତ ସମସ୍ତ ମାଗଣା ପାଠ୍ୟପୁସ୍ତକ ପିଲାମାନଙ୍କ ପାଖରେ ପହଞ୍ଚି ପାରିଲାନାହିଁ । ଏମିତିରେ ଛାତ୍ରଛାତ୍ରୀ ମାନଙ୍କର କେମିତି ବିକାଶ ଘଟୁଛି ତାହା ସାଧାରଣରେ ପ୍ରଶ୍ନବାଚୀ ସୃଷ୍ଟି କରିଛି । ସୂଚନାଯୋଗ୍ୟ ୨୦୨୩-୨୪ ଶିକ୍ଷାବର୍ଷ ଗତ ମେ ମାସରୁ ଆରମ୍ଭ ହୋଇଥିଲେ ମଧ୍ୟ ଏ ପର୍ଯ୍ୟନ୍ତ ସମସ୍ତ ପାଠ୍ୟପୁସ୍ତକ ସବୁ ବିଦ୍ୟାଳୟରେ ପହଞ୍ଚି ପାରିନାହିଁ । ଓଡ଼ଗାଁ ବ୍ଲକର ୧୩୮ ଟି ବିଦ୍ୟାଳୟର ଏକା ଅବସ୍ଥା । ଯାହା ଫଳରେ ପିଲାମାନେ ସଠିକ ଶିକ୍ଷାଦାନ ପାଇବା ପରିବର୍ତ୍ତେ ଶିକ୍ଷକଙ୍କ କଥା ଓ ମଧ୍ୟାନଭୋଜନ ଖାଇ ଘରକୁ ଫେରୁଛନ୍ତି । ଓଡ଼ଗାଁ ବ୍ଲକ ଶିକ୍ଷାଧିକାରୀ କୁହନ୍ତି ପ୍ରାୟ ୯୦ ଭାଗ ବହି ପ୍ରତି ବିଦ୍ୟାଳୟରେ ପହଞ୍ଚି ଯାଇଛି ଆଉ କିଛି ପୁସ୍ତକ ପୁରାତନ ଶିକ୍ଷାର୍ଥୀଙ୍କ ଠାରୁ ଆଣି ଦେଲେ ଅଭାବ ପୂରଣ ହୋଇ ପାରିବ । ପ୍ରକାଶ ଥାଉକି ଗତ ଜୁନ ମାସରେ ଓଡ଼ଗାଁ ବ୍ଲକକୁ ଏକ ମାଗଣା ପାଠ୍ୟପୁସ୍ତକ ଧରି ଆସିଥିବା ୭୦୯ ଗାଡି ସମସ୍ତ ପୁସ୍ତକ କବାଡ଼ିଆ ଦୋକାନରେ ବିକ୍ରି କରିବା ସମୟରେ ଓଡ଼ଗାଁ ପୋଲିସ ତାହାକୁ ଜବତ କରିଥିଲା । ସେହି ପୁସ୍ତକ ସବୁ ଥାନାରେ ଗଛିତ ଥିବା ଜଣାଯାଏ । ଶୀଘ୍ର ମାଗଣା ମିଳୁଥିବା ସମସ୍ତ ପାଠ୍ୟପୁସ୍ତକ ଛାତ୍ରଛାତ୍ରୀ ମାନଙ୍କୁ ଯୋଗାଇଦେବାକୁ ଅଭିଭାବକ ମାନଙ୍କ ଦାବି ହେଉଛି ।