23-Jul-2023

ବଲାଙ୍ଗୀର ( ମଳୟ ମିଶ୍ରଙ୍କ ରିପୋର୍ଟ ) କଣ୍ଟାବାଞ୍ଜି ସ୍କୁଲ୍ ଛାତ୍ର ଲଳିତ ଜୈନ ବିବାଦୀୟ ଅପମୃତ୍ଯୁ ବନାମ ହତ୍ୟାଅଭିଯୋଗ ମାମଲାର ଗତି ଦିନକୁ ଦିନ ଭିନ୍ନମୋଡ ବଦଳୁଛି । ପୁଲିସ୍   ଘଟଣାସ୍ଥଳ ଯାଞ୍ଚ ପୂର୍ବକ ଏଥିରେ ସଂଶ୍ଳିଷ୍ଟ ଥିବା ଅଭିଯୋଗରେ ଆହୁରି କେତେକଙ୍କୁ ପଚରାଉଚୁରା ଆରମ୍ଭ କରିଛି ।
ତେବେ ଏହାର ମୂଳକାରଣ ସ୍ବରୂପ ମୃତ ନାବାଳକର ପିତା ପ୍ରମୋଦ ଜୈନଙ୍କ କହିବାନୁଯାୟୀ ,  ଲଳିତ ସହ ସେହି ସ୍କୁଲ୍ ଓ ସମାନ ଦଶମଶ୍ରେଣୀରେ ପଢୁଥିବା 
ବିଶାଲ ଅଗ୍ରବାଲଙ୍କ ଝିଅ ଜେସିକା ( ଛଦ୍ମନାମ )ଠାରୁ ଟଙ୍କା ନେଇ ଲଳିତ ଜଣେ ସାଙ୍ଗପିଲା ଚନ୍ଦ୍ର ପ୍ରକାଶ ଡଙ୍ଗୀକୁ ଦେଉଥିଲା । ଉକ୍ତ ପିଲାର ବାପା କଣ୍ଟାବାଞ୍ଜି ଥାନା ସମ୍ମୁଖରେ ଗୁପ୍ ଚୁପ୍ ଠେଲା  ଓ  ମାମୁ ସହରରେ ଏକ ଚାଟ୍ ଦୋକାନ କରିଥିବା ଏବଂ ସେମାନେ ରାଜସ୍ଥାନରୁ ଆସି ସହରରେ ଭଡାଘରେ ରହୁଛନ୍ତି । ଗତ ୧୧ ତାରିଖରେ ଘଟଣାଦିନ ବିଶାଲ ଓ ବିକାଶ ଉକ୍ତ ଠେଲାବାଲାଠାରୁ ମଧ୍ୟ ଲକ୍ଷେ ତିରିଶ ହଜାର ଟଙ୍କା ଫେରସ୍ତ ନିମନ୍ତେ ରାଜିନାମା ଲେଖାଇ ନେଇଥିବା ପ୍ରକାଶ । ତେବେ ଏହି ରାଜସ୍ଥାନୀ ଫୁଟ୍ ପାଥ୍ ଖୁଚୁରା ବ୍ୟବସାୟୀଙ୍କ ପୁଅକୁ ବିଶାଲଙ୍କ ଝିଅ ତଥା ଏକ ପବ୍ଲିକ୍ ସ୍କୁଲର ଦଶମଶ୍ରେଣୀରେ ପଢୁଥିବା ଛାତ୍ରୀ ଇନଷ୍ଟାଗ୍ରାମ୍ ଫଲୋଅର୍ ବୃଦ୍ଧି ପାଇଁ ନା ପ୍ରକୃତରେ କେଉଁଥି ପାଇଁ କଥିତମତେ ଥର ଥରକରି ଲଳିତ ୧୧ ଲକ୍ଷ ଟଙ୍କା ଦେଇଥିଲା , ଏହା ଅଜବ୍ ଲାଗୁଛି  !  ତେବେ ଏସବୁ କଥା ପ୍ରଥମେ ପ୍ରମୋଦ ଜୈନ କାହିଁକି ଲୁଚାଇଥିଲେ , ରହସ୍ୟଜନକ ନୁହେଁ କି  ? ସାଂପ୍ରତିକ କାଳରେ ରାଜ୍ୟ ବାହାରର ସାଇବର ଠକମାନେ ସ୍କୁଲ୍ କଲେଜର ଛାତ୍ରଛାତ୍ରୀଙ୍କୁ ବିଭିନ୍ନ ଆଳରେ ଜାଲରେ ଫସାଉଥିବା ପ୍ରକାଶ ପାଇଛି । ତେଣୁ ଏହି ଏତେପରିମାଣର ଟଙ୍କା ଦେଣନେଣର ଚେର ରାଜସ୍ଥାନୀ ସାଇବର ଠକମାନଙ୍କ ପର୍ଯ୍ୟନ୍ତ ଲମ୍ବିଥିବା ଆଶଙ୍କା ଅସମ୍ଭବ ନୁହେଁ ବୋଲି ଚର୍ଚ୍ଚା ମଧ୍ୟ ହେଉଛି । ଏଣୁ ପୁଲିସ୍ ସେ ଦିଗରେ ତଦନ୍ତ କରିବାକୁ ଦାବି ହେଉଛି ।

ଏସ୍ ପି ଙ୍କ ନିର୍ଦ୍ଦେଶରେ ଓ ଅତିରିକ୍ତ ଏସପି ଙ୍କ ପ୍ରତ୍ୟେକ୍ଷ ତତ୍ତ୍ୱାବଧାନରେ ଆଇ ଆଇସି ରଶ୍ମିତା ବେହେରାଙ୍କୁ ଏହାର ବିଶେଷ ତଦନ୍ତଦାୟିତ୍ୱ ମଦିଆଯାଇଥିବା ବେଳେ , ମୃତ ନାବାଳକର ପିତା ତଥା ଅନ୍ୟମାନେ ତାଙ୍କ ପୂର୍ବ କାର୍ଯ୍ୟକଳାପରେ ଅସନ୍ତୋଷ ପ୍ରକାଶ କରି '  'ଏହା ଦୁଧହାଣ୍ଡିକି ବିଲେଇ ସାକ୍ଷୀ ' ପରି କଥା ହେଲା ବୋଲି କଟାକ୍ଷ କରି କଣ୍ଟାବାଞ୍ଜି ପୁଲିସ୍ ପରିବର୍ତ୍ତେ କୌଣସି ସ୍ବତନ୍ତ୍ର ତଦନ୍ତକାରୀ ଅଧିକାରୀଙ୍କ ଦ୍ୱାରା ତଦନ୍ତ ପାଇଁ ଅନୁରୋଧ କରିଛନ୍ତି  । କେତେକ ସଂଗଠନ ପକ୍ଷରୁ ତହସିଲଦାରଙ୍କ ମାର୍ଫତ୍ ରେ ଏହି ମାମଲାର ଉଚ୍ଚସ୍ତରୀୟ ତଦନ୍ତ ସକାଶେ ମୁଖ୍ୟମନ୍ତ୍ରୀଙ୍କୁ ଦାବିପତ୍ର ପ୍ରଦାନ କରାଯାଇଥିବା ପ୍ରକାଶ ।