19-Jul-2023

ବଲାଙ୍ଗୀର ( ମଳୟ ମିଶ୍ରଙ୍କ ରିପୋର୍ଟ  )  କଣ୍ଟାବାଞ୍ଜି ସହରର ଛାତ୍ର ନାବାଳକ ଲଳିତ ଜୈନ ମୃତ୍ୟୁମାମଲାରେ ହତ୍ୟା ଅଭିଯୋଗ ହୋଇଥିଲା । ତେବେ ଏହାକୁ ଆରମ୍ଭରୁ ଜିଆରପି ଓ ନିଖୋଜ ମାମଲା ଋଜୁ କରି ଆତ୍ମହତ୍ୟାର ରୂପ ଦେଇ ପୋଷ୍ଟମର୍ଟମ୍ କରାଇ ନଥିବା ପୁଲିସ୍ ଶେଷରେ ଗଣମାଧ୍ୟମ ଓ ସ୍ଥାନୀୟ ବିଭିନ୍ନ ସଂଗଠନର ଚାପ ଏବଂ  ମୃତନାବାଳକର ବାପ ପ୍ରମୋଦ ଜୈନଙ୍କ ହତ୍ୟାଅଭିଯୋଗ କ୍ରମେ ଏସ୍ ପିଙ୍କ ନିର୍ଦ୍ଦେଶରେ  ଘଟଣାରେ ଜଡିତ ୨ ଜଣ ଅଭିଯୁକ୍ତଙ୍କୁ ଗିରଫ କରି ଆଜି କୋର୍ଟଚାଲାଣ କରିଛି । ଏହି ଅଭିଯୁକ୍ତମାନେ ହେଲେ କଣ୍ଟାବାଞ୍ଜି ସହରର ବ୍ୟବସାୟୀ ବିଶାଲ ମିତ୍ତଲ ଅଗ୍ରବାଲ ଓ ତାଙ୍କ ଭାଇ ବିକାଶ ମିତ୍ତଲ ଅଗ୍ରବାଲ । ମୃତ ନାବାଳକ ଛାତ୍ର ଲଳିତ ଜୈନଙ୍କ ବାପା ପ୍ରମୋଦ ଜୈନ ପ୍ରଥମେ ଥାନାରେ ନିଖୋଜଏତଲା ଓ ପରେ ପୁଅର ରେଳଧାରଣାରୁ ମୃତଦେହ ଉଦ୍ଧାର ପରେ  ଅଭିଯୋଗ କରିଥିଲେ ଯେ ତାଙ୍କ ପୁଅକୁ ହତ୍ୟା କରାଯାଇଛି । ଏହାପୂର୍ବରୁ ଗତ ୧୨ ତାରିଖରେ ଲଳିତକୁ ତା' ସହ ସ୍ଥାନୀୟ ଲାୟନ୍ସ ପବ୍ଲିକ୍ ସ୍କୁଲ୍ ରେ ସହପାଠିନୀ ଜଣେ ଛାତ୍ରୀର ବାପା ବିଶାଲ ମିତ୍ତଲ ଅଗ୍ରବାଲ ଡକାଇ ନେଇ ତାଙ୍କ ସାମ୍ନାରେ ସ୍ଥାନୀୟ ଆଲିଶାନ ଲାଇଫ୍ ଷ୍ଟାଇଲ୍ ହୋଟେଲରେ ଏକ କୋଠରୀରେ ଅଟକ ରଖି ମାଡମାରି ତାର ମୋବାଇଲ୍ ଲୁଟି ରଖି ୩ ଲକ୍ଷଟଙ୍କା ଦେବାକୁ ଚୁକ୍ତି ଲେଖାଇନେବା ପରଦିନଠାରୁ ଲଳିତ ନିଖୋଜ ଥିଲା । 
ସବୁଠାରୁ ବିଚିତ୍ର କଥା ଯେ , ଗତ ୧୩ ତାରିଖରେ କୁକୁଡାହାଡ ଗ୍ରାମ ନିକଟସ୍ଥ ରେଳଲାଇନରୁ ଲଳିତର ମୃତଦେହକୁ ଜିଆରପି ଉଦ୍ଧାର ବିନା ପୋଷ୍ଟମର୍ଟମ୍ ରେ ସେହିଦିନ ତରବରିଆ ଭାବେ କାହାକୁ ନ ଜଣାଇ ପୋତିଦେଇଥିଲା । ସେହିପରି ଥାନାରେ ସେ ଦେଇଥିବା ନିଖୋଜ ଏତଲା ସତ୍ତ୍ୱେ ପୁଲିସ୍ ନୀରବ ଥିବା ଓ ପରେ ହଲ୍ଲାହେବାରୁ ବାଧ୍ୟ ହୋଇ ମାଜିଷ୍ଟ୍ରେଟ୍ ଙ୍କ ଉପସ୍ଥିତିରେ ମାଟିଖୋଳି ପୁଣିଥରେ ଶବ ଉଦ୍ଧାର କଲାପରେ ଶବ ଦେହରେ ଚଡି ପିନ୍ଧିଥିବା ଦେଖି ମଧ୍ୟ ପୋଷ୍ଟମର୍ଟମ୍  ନ କରି ପୋଡିବାକୁ ନିର୍ଦ୍ଦେଶ ଦେଇଥିଲା । ଏହାପଛରେ ଜିଆରପି , ପୁଲିସ୍ ଓ ଜାଲ୍ ଶବବ୍ୟବଚ୍ଛେଦ ରିପୋର୍ଟ ଦେଇଥିବା ଡାକ୍ତରମାନେ କେତେକ ସ୍ଥାନୀୟ ରାଜନେତା ବା ପ୍ରଭାବଶାଳୀ ବ୍ୟକ୍ତିବିଶେଷଙ୍କ ଚାପରେ ଏକ ବ୍ଲାକ୍ ଡିଲ୍ କରାଯାଇଥିବା ଅଭିଯୋଗ ପ୍ରକାଶ ପାଇଥିଲା । 
ଏହି ଘଟଣାରେ 'ପ୍ରେରଣା ' ସମେତ ଅନ୍ୟ ଏକ ଇଲେକ୍ଟ୍ରୋନିକ୍ସ ଗଣମାଧ୍ୟମ ଘନ ଘନ ଖବର ଓ  ଅଭିଯୋଗ ପ୍ରକାଶ କରିବାରୁ  ଏବଂ 'ପ୍ରେରଣା 'ର ସବିଶେଷ ତଥ୍ୟ ପ୍ରକାଶ ନିମନ୍ତେ ବଲାଙ୍ଗୀର ଏସ୍ ପି  ଅତିରିକ୍ତ ଏସପିଙ୍କ ପ୍ରତ୍ୟେକ୍ଷ ତତ୍ତ୍ୱାବଧାନରେ ପୁଲିସ୍ କୁ ଏହାର ଆଉଥରେ ତଦନ୍ତ ନିମନ୍ତେ ନିର୍ଦ୍ଦେଶ ଦେଇଥିଲେ । ଏହି ଅନୁଯାୟୀ , ଆଜି କଣ୍ଟାବାଞ୍ଜି ଥାନାରେ ପୁଲିସ୍ ଉକ୍ତ ଝିଅର ବାପା ବିଶାଲ ମିତ୍ତଲ ଅଗ୍ରବାଲ ଓ ତାଙ୍କ ଭାଇ ବିକାଶ ମିତ୍ତଲ ଅଗ୍ରବାଲଙ୍କୁ ଥାନାକୁ ଆଣି ଜେରା କରାଯାଇ ଶେଷରେ ଅପହରଣ , ଧମକଚମକ ଓ  ଆତ୍ମହତ୍ୟା ପାଇଁ ପ୍ରବର୍ତ୍ତାଇବା ଦଫାରେ  ଗିରଫ କରି କୋର୍ଟଚାଲାଣ କରିଥିବା ପ୍ରକାଶ ।  
ଏହାପଛର କାରଣ ସ୍ବରୂପ , ପ୍ରଥମେ 'ପ୍ରେରଣା ' ପ୍ରକାଶ କରିଥିବା ଉକ୍ତ ଛାତ୍ରୀଙ୍କ ଇନଷ୍ଟାଗ୍ରାମ୍ ଫଲୋଅର୍ ବୃଦ୍ଧି ପାଇଁ ସହପାଠୀ ଛାତ୍ର ମୃତ ନାବାଳକ ଲଳିତଜୈନକୁ ୧୧ ଲକ୍ଷ ଟଙ୍କା ପର୍ଯ୍ୟାୟକ୍ରମେ ଦେଇଥିବା ଓ ଟଙ୍କା ଅସୁଲି କରିବାକୁ ଅଭିଯୁକ୍ତମାନେ ରକ୍ତମୁହାଁ ହୋଇ ଉଠିଥିବା ଚର୍ଚ୍ଚା ପ୍ରକାଶ ପାଇଥିଲା । ଏଣୁ ଲୋକେ ଏହାକୁ 'ପ୍ରେରଣା ' ସମେତ ଅନ୍ୟାନ୍ୟ ଗଣମାଧ୍ୟମ ଓ ସ୍ଥାନୀୟ ବିଭିନ୍ନ ସଂଗଠନର ପ୍ରଭାବ ବୋଲି କହୁଥିବା ପ୍ରକାଶ ।କିନ୍ତୁ ପୁଲିସ୍ ବିନା ଶବବ୍ୟବଚ୍ଛେଦ ଓ ହତ୍ୟା ଅଭିଯୋଗକୁ ଏଡାଇ ଏଭଳି ଦଫାରେ ଗିରଫ କରି ଦାୟିତ୍ୱ ସାରିଦେବା ଘଟଣାକୁ ଲୋକେ ନାପସନ୍ଦ କରି ଏହି ମାମଲାରେ ଅନ୍ୟମାନଙ୍କ ସମ୍ପୃକ୍ତି ଓ ପ୍ରକୃତ ଘଟଣାର ଅଧିକ ତଦନ୍ତ ଦାବି କରିଛନ୍ତି ।