17-Apr-2023

ଭୁବନେଶ୍ୱର: - ଦୀର୍ଘ ତିନି ଦଶନ୍ଧିରୁ ଉର୍ଦ୍ଧ୍ୱକାଳ ଧରି କଳା ଓ ସଂସ୍କୃତିର ଉନ୍ନତି, ଏହାର ପ୍ରଚାର ପ୍ରସାର, ଜନଜାଗରଣ ତଥା ସଂସ୍କୃତିର ମଧୁର ଡୋରିରେ ସମସ୍ତଙ୍କୁ ବାନ୍ଧି ରଖିପାରିଥିବାର ନିରବିଚ୍ଛିନ୍ନ ପ୍ରୟାସ ପାଇଁ ରାଜ୍ୟର ଅଗ୍ରଣୀ ସାମାଜିକ ତଥା ସାଂସ୍କୃତିକ ଅନୁଷ୍ଠାନ ନୀଳାଦ୍ରି ବିହାର ଯୁବ ଓ ସାଂସ୍କୃତିକ ସଂଘ କୁ ପବିତ୍ର ଓଡିଆ ନବବର୍ଷ ପାଳନ ଅବସରରେ ସୁଯୋଗ୍ୟ ଓଡିଆ ସମ୍ମାନରେ ସମ୍ମାନୀତ କରାଯାଇଛି । ଏହି ଉପଲକ୍ଷେ ଓଡିଆ ଭାଷା ସାହିତ୍ୟର ଜାଗ୍ରତ ପ୍ରହରୀ ନମାମୀ ମନ୍ଦାକିନୀ ଆନୁକୁଲ୍ୟରେ ବରିଷ୍ଠ ସାମ୍ବାଦିକ ତଥା ଓଡିଆ ପ୍ରାଣ ପ୍ରଦ୍ୟୁମ୍ନ ଶତପଥୀଙ୍କ ପୌରହିତ୍ୟରେ ରବିନ୍ଦ୍ର ମଣ୍ଡପ ଠାରେ ଆୟୋଜିତ ଏକ ବର୍ଣ୍ଣାଢ୍ୟ ଉତ୍ସବରେ ମୁଖ୍ୟ ଅତିଥି ପୂର୍ବତନ ମନ୍ତ୍ରୀ ତଥା ବରିଷ୍ଠ ବିଧାୟକ ପ୍ରଫୁଲ୍ଲ ସାମଲ, ସମ୍ମାନୀତ ଅତିଥି ସ୍ୱାଧୀନତା ସଂଗ୍ରାମୀ ପର୍ଶୁରାମ ଦ୍ୱିବେଦୀ, ଶିଶୁ ସାହିତ୍ୟିକ ଦାଶ ବେନୁହୁର୍‌, ପ୍ରଫେସର କୈଳାସ ଚନ୍ଦ୍ର ଟିକାୟତ, ବାଗ୍ମୀ ଆର୍ଯ୍ୟ କୁମାର ଜ୍ଞାନେନ୍ଦ୍ର, ଆର୍‌ଏମ୍‌ଆର୍‌ସିର ନର୍ଦ୍ଦେଶିକା ଡ. ସଂଘମିତ୍ରା ପତି ପ୍ରମୁଖ ଯୋଗ ଦେଇ ସଂଘକୁ ଉପଢୌକନ, କଳାକୃତି ପୁଷ୍ପଗୁଚ୍ଛ ଓ ଉତ୍ତରୀୟ ପ୍ରଦାନ କରି ସମ୍ବର୍ଦ୍ଧିତ କରିବା ସହ ଆହୁରି ଜନାଭିମୁଖି ହେବାକୁ ପରାମର୍ଶ ଦେଇଥିଲେ । ସୂଚନାଯୋଗ୍ୟ ୧୯୯୪ ମସିହାରେ ପ୍ରତିଷ୍ଠିତ ଏହି ସଂଘ କଳା ଓ ସଂସ୍କୃତି ସହ ବିଭିନ୍ନ ଜନକଲ୍ୟାଣ କାର୍ଯ୍ୟକ୍ରମ ଯଥା ବିପଦ ଆପଦରେ ସାହାଯ୍ୟ, ଅନାଥ, ଦିବ୍ୟାଙ୍ଗ ତଥା ଦୁରାରୋଗରେ ପିଡିତଙ୍କୁ ତଥା ପ୍ରାକୃତିକ ବିପର୍ଯ୍ୟୟ ଇତ୍ୟାଦି ସମୟରେ ସହାୟତାର ହାତ ବଢାଇବା ସହ ଦୀର୍ଘ ୨୯ ବର୍ଷ ଧରି ସ୍ଥାନୀୟ କଳାକାର ମାନଙ୍କୁ ନେଇ ଦୁଇଟି ଅହୋରାତ୍ର ନାଟକ (ଯାତ୍ରା) ପରିବେଷଣ କରି ଏକ ଅନନ୍ୟ ମାଇଲ୍‌ଖୁଣ୍ଟ ସ୍ଥାପନ କରିଛି । ସମ୍ବର୍ଦ୍ଧନା ସମାରୋହରେ ସଂଘର ସଭାପତି ଡ. ପ୍ରକାଶ ଚନ୍ଦ୍ର ପାଣିଗ୍ରାହୀଙ୍କ ନେତୃତ୍ୱରେ ସାଧାରଣ ସଂପାଦକ ବିଶ୍ୱଜିତ୍ ପଟ୍ଟନାୟକ, ସାଂସ୍କୃତିକ ସଂପାଦକ ବଟକୃଷ୍ଣ ପଣ୍ଡା, ସହ ସଂପାଦକ ଗଦାଧର ପ୍ରସାଦ ରଥ, ଉପସଭାପତି କୁମର ବାରିକ, ବରିଷ୍ଠ ସଭ୍ୟ ନିରଞ୍ଜନ ସାହୁ, ଗୋବିନ୍ଦ ବିଶ୍ୱାଳ ପ୍ରମୁଖ ଉପସ୍ଥିତ ରହି ସଂଘ ତରଫରୁ ସମ୍ବର୍ଦ୍ଧନା ଗ୍ରହଣ କରିଥିଲେ । ସମ୍ବର୍ଦ୍ଧନାର ଉତ୍ତରରେ ଏହି ସମ୍ମାନ ଦୀର୍ଘ ତିନି ଦଶନ୍ଧି ଧରି ସମାଜର ବିଭିନ୍ନ ବର୍ଗର ଜନସାଧାରଣଙ୍କ ସହ ରହିବାର ସଫଳତା ବୋଲି ଅଭିହିତ କରିବା ସହ ସଂଘକୁ ଆହୁରି ଆଗକୁ ନେବାରେ ସାହାଯ୍ୟ କରିବ ବୋଲି ମତବ୍ୟକ୍ତ କରିଥିଲେ । ସଂଘର ଏହି ଆଭିମୁଖ୍ୟ ତଥା ସଫଳତାରେ ସ୍ଥାନୀୟ ବୁଦ୍ଧିଜିବୀ, ଜନପ୍ରତିନିଧି ତଥା ଅଞ୍ଚଳବାସୀ ଉଚ୍ଚ ପ୍ରସଂଶା କରିଛନ୍ତି ।