06-Apr-2023

ବୀରମହାରାଜପୁର,(ବିନୋଦ ପାଣ୍ଡେ): ସୁବର୍ଣ୍ଣପୁର ଜିଲ୍ଲା ବୀରମହାରାଜପୁର ଉପଖଣ୍ଡର ଅଷ୍ଟମ ଲୋକ ମହୋତ୍ସବ 'ମାଲେଶ୍ରୀ-୨୦୨୩ ' ସ୍ଥାନୀୟ ବିଜୁ ପଟ୍ଟନାୟକ ମିନି ଷ୍ଟାଡିୟମରେ ଉଦଘାଟିତ ହୋଇଯାଇଛି। ବୀର ମାଟି ବୀରମହାରାଜପୁର ଆଜି ଦୁଲୁକି ଥିବା ବେଳେ ୨ ଶିଶୁ କନ୍ୟାଙ୍କ ମୃତ୍ୟୁ ଉତ୍ସବକୁ ଫିକା କରିଛି। ସେମାନଙ୍କର ଆତ୍ମାର ସଦଗତି ପାଇଁ ନୀରବ ପ୍ରାର୍ଥନା କରାଯାଇଛି। ବୀରମହାରାଜପୁର ଲୋକ ମହୋତ୍ସବ କମିଟି, ଓଡ଼ିଶା ସଂସ୍କୃତି ବିଭାଗ ଓ ଜିଲ୍ଲା ସଂସ୍କୃତି ପରିଷଦ ତଥା ଓରମାସର ସହଯୋଗରେ ଆୟୋଜିତ ମାଲେଶ୍ରୀ ମହୋତ୍ସବ ଉଦଘାଟନୀ ଉତ୍ସବକୁ ସ୍ଥାନୀୟ ବିଧାୟକ ପଦ୍ମନାଭ ବେହେରା ଉଦଘାଟନ କରିଥିଲେ। ସୁବର୍ଣ୍ଣପୁର ଜିଲ୍ଲା ଆରକ୍ଷୀ ଅଧିକ୍ଷକ ଅମରେଶ ପଣ୍ଡା ଓ ଅତିରିକ୍ତ ଜିଲ୍ଲାପାଳ ସୂର୍ଯ୍ୟନାରାୟଣ ଦାଶ (ରାଜସ୍ୱ) ପ୍ରମୁଖ ଅତିଥି ଭାବେ ଯୋଗଦେଇ ସାଂସ୍କୃତିକ ବାର୍ତ୍ତା ପ୍ରଦାନ କରିଥିଲେ। ମହୋତ୍ସ କମିଟିର ଅଧ୍ୟକ୍ଷ ତଥା ସ୍ଥାନୀୟ ଉପଜିଲ୍ଲାପାଳ ଅଶୋକ କୁମାର ଭୋଇ ଏଥିରେ ଅଧ୍ୟକ୍ଷତା କରିଥିଲେ।‌ପ୍ରଭାସ ଦାସ ଓ ସାଥୀ ' ଆଇଲା ମାଲେଶିରି ତିହାର' ସ୍ବାଗତ ସଙ୍ଗୀତ ଗାନ କରିଥିଲେ। ମହୋତ୍ସବର ପରିଚାଳନା କମିଟି ସମ୍ପାଦକ ସ୍ବୟମ୍ଭୁନାଥ ଖଣ୍ଡଗିରି ସ୍ବାଗତ ଭାଷଣ ଦେଇଥିଲେ। ହୃଷିକେଶ ଚାନ୍ଦ ସଭାର ସଂଯୋଜନା କରିଥିବା ବେଳେ କିଶୋର ହୋତା ଧନ୍ୟବାଦ ଅର୍ପଣ କରିଥିଲେ। କଣ୍ଠଶିଳ୍ପୀ ଶତୃଘ୍ନ ଲୁହାଙ୍କ ଦ୍ବାରା ପ୍ରଥମେ ମାଲେଶ୍ରୀ ବନ୍ଦନା 'ତୋର ପାଦେ ଜନାନ' ଗାନ କରାଯାଇଥିଲା। ଓଡ଼ିଆ ଭାଷା, ସାହିତ୍ୟ ଓ ସଂସ୍କୃତି ବିଭାଗ ପକ୍ଷରୁ ଶଶିମଣି ଓ ସାଥୀ ଓଡ଼ିଶୀ ନୃତ୍ୟ, ସୁବର୍ଣ୍ଣପୁର ଜିଲ୍ଲା ସଂସ୍କୃତି ପରିଷଦ ପକ୍ଷରୁ ବିନିକାର ମାହେଶ୍ୱରୀ ଅନୁଷ୍ଠାନ ପକ୍ଷରୁ ସମ୍ବଲପୁରୀ ନୃତ୍ୟ, ସମ୍ବଲପୁରର ଲହରୀ ଅନୁଷ୍ଠାନ,ବରଗଡ ନୁପୁର କଳା ପରିଷଦ ସମ୍ବଲପୁରୀ ନୃତ୍ୟ ସାଙ୍ଗକୁ ସ୍ଥାନୀୟ କଳାକାର ଙ୍କ କରମସାନୀ ଓ ଶବର- ଶବରୀ ନୃତ୍ୟ ପରିବେଷଣ କରାଯାଇଥିଲା। ପ୍ରୀତିମୟୀ ମିଶ୍ର , ଅବିନାଶ ହୋତା ଓ ଲକ୍ଷ୍ମୀନାରାୟଣ ସାହୁ ସାଂସ୍କୃତିକ କାର୍ଯ୍ୟକ୍ରମ ସଂଯୋଜନା କରିଥିବା। ବିଭିନ୍ନ ଷ୍ଟଲରେ ପଲ୍ଲୀଶ୍ରୀ ମେଳା ଓ ଉନ୍ନୟନ ପ୍ରଦର୍ଶନୀ ଉତ୍ସବର ଅନ୍ୟତମ ଆକର୍ଷଣ