06-Mar-2023

ବଲାଙ୍ଗିର : କାନ୍ଦ ବୋବାଳିରେ ଫାଟି ପଡୁଛି ହସ୍ପିଟାଲା ପରିସର । ବାହୁନି ବାହୁନି କାନ୍ଦୁଛି ମାଁ । ବାପା ଆଖିରେ ବି ଲୁହ l ଏହି ଦୃଶ୍ୟ ହେଉଛି ବଲାଙ୍ଗୀର ଭୀମ ଭୋଇ ହସ୍ପିଟାଲର ସର୍ଜରୀ ୱାର୍ଡର । ଏଠାରେ କାର୍ଯ୍ୟରତ ଡାକ୍ତର ଓ ନର୍ସଙ୍କ ଅବହେଳା ଯୋଗୁଁ ମୋ ପୁଅର ଜୀବନ ଗଲା ବୋଲି ସିଧାସଳଖ ଅଭିଯୋଗ କରିଛନ୍ତି ମୃତ ବାଳକ ର ବାପା କାର୍ତ୍ତିକ ସାହୁ । ଖବରରୁ ଜଣାପଡିଛି, ଲୋଇସିଂହାର କାର୍ତ୍ତିକ ସାହୁ ସିକ୍‌ଲିନ୍‌ରେ ପୀଡିତ ନିଜ ୧୫ ବର୍ଷର  ପୁଅ ଦିନେଶକୁ ଗତକାଲି ସଂଧ୍ୟାରେ ବଲାଙ୍ଗୀର ଭୀମ ଭୋଇ ମେଡିକାଲରେ ଭର୍ତ୍ତି କରିଥିଲେ । ତେବେ ସଂଧ୍ୟା ପର୍ଯ୍ୟନ୍ତ ନା ଡାକ୍ତର ନା ନର୍ସ ଙ୍କ ଦେଖା ଥିଲା । ତେବେ ବାଳକର ଅବସ୍ଥା ଗୁରୁତର ହେବା ପରେ ଡାକ୍ତର ଆଜି ସଂଧ୍ୟାରେ ରୋଗୀର ପାଖରେ ପହଂଚି ରୋଗୀର ୬ ପରସେଣ୍ଟ ବ୍ଲଡ୍ ଅଛି ବୋଲି କହିଥିଲେ । ସେତେବେଳେ ବାଳକର ପ୍ରାଣବାୟୁ ଉଡିଯାଇ ସାରିଥିଲା । ଏହି ଘଟଣା ପରେ ହସ୍ପିଟାଲ ପରିସରରେ ଉତ୍ତେଜନା ପ୍ରକାଶ ପାଇଥିଲା । ଡାକ୍ତରଙ୍କ ସଂର୍ପୂର୍ଣ୍ଣ ଅବହେଳା ଯୋଗୁଁ ମୋ ପୁଅର ଜୀବନ ଗଲା ବୋଲି ମୃତ ବାଳକଙ୍କ  ବାପା କାର୍ତ୍ତିକ ଆମ ପ୍ରତିନିଧି ଆଗରେ ପ୍ରକାଶ କରିଛନ୍ତି । ମୋ ପୁଅକୁ ମାରିଥିବା ଡାକ୍ତର ଓ ନର୍ସଙ୍କୁ  ସସ୍‌ପେଣ୍ଡ କରାଯାଉ ବୋଲି ମୃତକଙ୍କ ପିତା କାର୍ତ୍ତିକ ସାହୁ କୋହଭରା କଣ୍ଠରେ କହିଛନ୍ତି । ସବୁଠାରୁ ଦୁଃଖର ବିଷୟ ହେଲା, ଆମ ପ୍ରତିନିଧି ଓ ଅନ୍ୟ କିଛି ଗଣମାଧ୍ୟମର ପ୍ରତିନିଧି ମାନେ ଘଟଣା ସଂପର୍କରେ ଜାଣିବା ପାଇଁ ସେଠାକୁ ଯିବାରୁ ସେମାନଙ୍କୁ ମଧ୍ୟ ପ୍ରବେଶ କରିବା ପାଇଁ ବାରଣ କରାଯାଇଥିଲା ।  
ଅନେକ ସମୟରେ ବଲାଙ୍ଗୀର ହସ୍ପିଟାଲରେ କାର୍ଯ୍ୟରତ ଡାକ୍ତରଙ୍କ ବେପରୁଆ ମନୋଭାବ ଯୋଗୁଁ ଅନେକ ନିରୀହ ଲୋକଙ୍କ ଜୀବନ ଯାଉଛି । ଆଜି ଏପରି ଏକ ଦୁଃଖଦ ଘଟଣାର ପୁନରାବୃତ୍ତି ଘଟିଛି । ଏହାର ଏକ ଉଚ୍ଚସ୍ତରୀୟ ତଦନ୍ତ ହୋଇ ଦୋଷୀ ଡାକ୍ତର ଓ ନର୍ସ ବିରୁଦ୍ଧରେ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ମତପ୍ରକାଶ ପାଇଛି ।