23-Feb-2023

ବଲାଙ୍ଗୀର(ପ୍ରେରଣା ଖବର)- ଅବିଭକ୍ତ ବଲାଙ୍ଗିର ଜିଲ୍ଲା ସହ ପଡୋଶୀ ଜିଲ୍ଲାର ଛାତ୍ରଛାତ୍ରୀଙ୍କୁ ହାତପାଆନ୍ତାରେ ଉଚ୍ଚ ଶିକ୍ଷା ଯୋଗାଇ ଦେବା ଉଦ୍ଦେଶ୍ୟରେ ରାଜେନ୍ଦ୍ର କଲେଜକୁ ବିଶ୍ୱ ବିଦ୍ୟାଳୟରେ ପରିଣତ କରାଗଲା ବୋଲି ରାଜ୍ୟ ସରକାର ଡିମ୍‌ଡିମି ପିଟୁଥିବା ବେଳେ ବାସ୍ତବରେ ଅଧ୍ୟାପକ ଓ କର୍ମଚାରୀ ଅଭାବ ଯୋଗୁଁ ପାଠପଢାରୁ ବଂଚିତ ହେଉଛନ୍ତି । ଆମେ ସମସ୍ତ ଜାଣୁ ଅଧ୍ୟାପକ ବିନା ଉନ୍ନତଧରଣର ପାଠପଢା ସମ୍ଭବ ନୁହେଁ । ତା ସାଙ୍ଗକୁ ଲାଇବ୍ରେରି, ବିଜ୍ଞାନ ଡେମୋଷ୍ଟ୍ରେଟର ଅଭାବ ସହ ଅନେକ ସମସ୍ୟା ଭିତରେ ବିଶ୍ୱବିଦ୍ୟାଳୟ ଗତି କରୁଛି । ଗଣମାଧ୍ୟମରେ ବିଜ୍ଞାପନ ଦେଇ ରାଜ୍ୟ ସରକାର ବାହା ବାହା ନେଉଥିବା ବେଳେ ସମସ୍ତ ବିଶ୍ୱ ବିଦ୍ୟାଳୟ ଓ ମହାବିଦ୍ୟାଳୟମାନଙ୍କରେ ଅଧ୍ୟାପକ ଓ କର୍ମଚାରୀ ମରୁଡି ଯୋଗୁଁ ପାଠପଢା ବିପର୍ଯ୍ୟସ୍ତ ହୋଇ ପଡିଛି । ଶିକ୍ଷାପ୍ରେମୀ ମହଲରୁ ଦାବି ଜଣାଉଥିଲେ ମଧ୍ୟ ସରକାର କର୍ଣ୍ଣପାତ କରୁନାହାନ୍ତି ତେଣୁ ରାଜେନ୍ଦ୍ର ବିଶ୍ୱ ବିଦ୍ୟାଳୟରେ ଅଧ୍ୟାପକ କର୍ମଚାରୀ ପଦବି ତୁରନ୍ତ ପୁରଣ କରିବା ସହ ପିଏଚ୍‌ଡି ଖୋଳାଯାଉ ନ ହେଲେ ଆଗାମୀ ଦିନରେ ଦୁର୍ବାର ଛାତ୍ର ଆନ୍ଦୋଳନ କରାଯିବ ବୋଲି ଏଆଇଡିଏସ୍‌ଓ ବଲାଙ୍ଗିର ଜିଲ୍ଲା କମିଟି ପକ୍ଷରୁ ଜିଲ୍ଲା ସଂପାଦକ ମଧୁସୁଦନ ବାଗ ଓ ରାଜ୍ୟ ଉପ-ସଭାପତି ସୁନିଲ ଭୋଇ ଏକ ପ୍ରେସ ବିବୃତିରେ ଜଣାଇଛନ୍ତି ।