23-Feb-2023

ବଲାଙ୍ଗୀର(ମଳୟ ମିଶ୍ରଙ୍କ ରିପୋର୍ଟ)  ବଲାଙ୍ଗୀର ବନଖଣ୍ଡରେ ବିଗତ ୩ ବର୍ଷ ମଧ୍ୟରେ ବିଭିନ୍ନ ସରକାରୀ ଯୋଜନାରେ ୨ କୋଟିରୁ ଉର୍ଦ୍ଧ୍ବଟଙ୍କାର ଦୁର୍ନୀତି ଅଡିଟ୍ ରେ ଧରାପଡିବା ପରେ ବିଭାଗୀୟ ଅତିରିକ୍ତ ସଚିବଙ୍କ ନିର୍ଦ୍ଦେଶରେ ଡିଏଫଓ ନୀତିଶକୁମାର ସମ୍ପୃକ୍ତ ପୂର୍ବତନ ଡିଏଫଓ ସମୀର ଶତପଥୀ ଓ  ତତ୍କାଳୀନ ଏସି ଏଫ୍ ବାବାଜୀ ଚରଣ ରାଉଳ , ଅବସରପ୍ରାପ୍ତ କନିଷ୍ଠ ବିତ୍ତ ଅଧିକାରୀ ଶତୃଘନ ପାଣିଗ୍ରାହୀଙ୍କ  ସମେତ ୧୬ ଜଣ ଅଧିକାରୀଙ୍କ ଠାରୁ ସେହି ଅର୍ଥ ଭରଣା ପାଇଁ ଗତ ଜାନୁଆରୀ ୨୦ ତାରିଖରେ  ଚିଠି କରିଥିବା ପ୍ରକାଶ । ଏହା ଆଜି ଗଣମାଧ୍ୟମରେ ପ୍ରକାଶ ପାଇବାପରେ ସମ୍ପୃକ୍ତ ବନକର୍ମଚାରୀ ଛାନିଆ ହୋଇପଡିଛନ୍ତି  ।  ତେବେ ଏତେବଡ ଦୁର୍ନୀତି ବିଷୟ ବିଧାନସଭାରେ ପ୍ରସଙ୍ଗ ନହେବା ଓ  ଥାନାରେ ଏହି ଅସାଧୁ କର୍ମଚାରୀଙ୍କ ବିରୁଦ୍ଧରେ ଅପରାଧିକ ମାମଲା ଋଜୁ କରା ନ ଯାଇଥିବାରୁ ଲୋକେ ଆଶ୍ଚର୍ଯ୍ୟ ପ୍ରକାଶ କରିଛନ୍ତି ।  କେତେକ ଏହାକୁ ଏତେଦିନ ହେଲା ଚପାଇ ରଖି ଏଠାରେ ମ୍ୟାନେଜ୍ କରାଯିବାକୁ ଭିତିରିଆ ଷଡଯନ୍ତ୍ର ଉଦ୍ୟମ କରାଯାଇଥିବା  ଓ ଶେଷରେ ବିଧାନସଭା ଅଧିବେଶନ ଆରମ୍ଭ ହୋଇଯାଇଥିବାରୁ  ଚପାଇ ରଖିବା ସମ୍ଭବ ହୋଇ ନଥିବାରୁ ବାଧ୍ୟ ହୋଇ ପ୍ରକାଶ କରିବାକୁ ଦିଆଯାଇଥିବା  ଚର୍ଚ୍ଚା ହେଉଛି ।

ସେ ଯାହା ହେଉ, ଏବେ ଏହି ଦୁର୍ନୀତିପ୍ରବଣ ଜିଲ୍ଲାର ଇତିହାସରେ ଏହା ଆଉ ଏକ ବଡ ଦୁର୍ନୀତିର ଫର୍ଦ୍ଦ ଯୋଡିହେଲା ବୋଲି କୁହାଯିବା ସହିତ ଅନ୍ୟାନ୍ୟ ପ୍ରସଙ୍ଗରେ ବାହାସ୍ଫୋଟ ମାରିଆସୁଥିବା ଜିଲ୍ଲାର ଟାଣୁଆ ବିରୋଧୀଦଳର ବିଧାୟକମାନେ ନ ଜାଣିଲା ପରି ତୁଣ୍ଡରେ ତୁଣ୍ଡି ବାନ୍ଧି ବସିଥିବା ଲୋକେ କଟାକ୍ଷ କରିଛନ୍ତି । ସେହିପରି କୌଣସି ଛୋଟମୋଟ ଖବରକୁ ତୁମ୍ବିତୋଫାନ କରୁଥିବା  ସ୍ଥାନୀୟ ମିଡିଆ ମଧ୍ୟ ଏ ସମ୍ପର୍କରେ ଜାଣିପାରିନାହିଁ ଅଥବା କୌଣସି ଉଦ୍ଦେଶ୍ୟରେ ନୀରବଦ୍ରଷ୍ଟା ପାଲଟିଛି  !  ଏହା ଜଣାପଡ଼ିବା ପରେ ଏହି ଦୁର୍ନୀତିଖବରକୁ ଘନଘନ ପ୍ରଚାର ପ୍ରସାର କରି ଜନସ୍ୱାସ୍ଥ୍ୟ ଜାଗ୍ରତ କରିବାକୁ ଅଭିଯାନ ଚଳାଇବା ଆବଶ୍ୟକ ଜରୁରୀ ହୋଇପଡିଛି ।  

ଏଠାରେ ପ୍ରକାଶଯୋଗ୍ୟ ଯେ , ଗତ କିଛିବର୍ଷ ଧରି ବଲାଙ୍ଗୀର ବନଖଣ୍ଡର ଉପରୋକ୍ତ ଅଧିକାରୀ ଓ କର୍ମଚାରୀଙ୍କ ବିରୁଦ୍ଧରେ କ୍ରମାଗତ ଭାବେ ଦୁର୍ନୀତି କରୁଥିବାର ଅଭିଯୋଗ ପ୍ରକାଶ ପାଇ ଆସୁଥିଲା । ଆଶ୍ଚର୍ଯ୍ୟର କଥା ଯେ ତଥାପି ବିଭାଗ ବା ସରକାର ନୀରବ ରହିଆସୁଥିଲେ ।  କେବଳ ଯେ ୨୦୧୭ରୁ ୨୦୨୦ ତିନିବର୍ଷରେ ଏତିକି ଯୋଜନାରେ ଏତିକି ମାତ୍ର ଆର୍ଥିକ ଅନିୟମିତତା ହୋଇଛି , ତା' ନୁହେଁ  ; ପୂର୍ବବର୍ଷଗୁଡିକର ପ୍ରକୃତ ଯାଞ୍ଚ କରାଗଲେ , ଆହୁରି କୋଟି କୋଟି ଟଙ୍କାର ଦୁର୍ନୀତି ପଦାକୁ ଆସିବ ! ଏଥିଲାଗି ବିଭାଗୀୟ ବ୍ୟବସ୍ଥାରେ ଗୁରୁତର ତ୍ରୁଟିବିଚ୍ୟୁତି ରହିଛି । ଗାର୍ଡରୁ ପଦୋନ୍ନତି ପାଇଥିବା ଜିଲ୍ଲାର ବହୁ ଅସାଧୁ ଚିହ୍ନା କର୍ମଚାରୀ ଏସିଏଫ , ରେଞ୍ଜର ଓ ଫରେଷ୍ଟର ହୋଇଯାଇ ଦୀର୍ଘକାଳ ଧରି ଏଠୁ ସେଠିକି ହେଇ ଜିଲ୍ଲାରେ ଅବସ୍ଥାପିତ ହୋଇ ରହିଆସିଥିବା ଏପରି ଦୁର୍ନୀତିପରାୟଣ ହୋଇପଡିବାର ମୁଖ୍ୟ କାରଣ । ଯେଉଁ ଅଧିକାରୀ / କର୍ମଚାରୀଙ୍କ ଠାରୁ ଏହି ଅର୍ଥଭରଣାର ତାଲିକା ପ୍ରକାଶ ପାଇଛି , ସେମାନଙ୍କ ସମ୍ପର୍କରେ ଲୋକେ ଭଲଭାବରେ ଅବଗତ ଅଛନ୍ତି ।  ତେଣୁ  ବଲାଙ୍ଗୀର ବନଖଣ୍ଡ ସମେତ ବଲାଙ୍ଗୀର କେନ୍ଦୁପତ୍ର ବିଭାଗର ବିଭିନ୍ନ ଡିଭିଜନ ସମେତ ସୋନପୁର ବନଖଣ୍ଡର ମଧ୍ୟ ଏହିପରି ଅଡିଟ୍ କରାଯିବାକୁ ଜନସାଧାରଣ ଦାବି ଉଠାଇଥିବା ଜଣାଯାଇଛି ।