23-Feb-2023

ବୀରମହାରାଜପୁର, (ବିନୋଦ ପାଣ୍ଡେ): ସୁବର୍ଣ୍ଣପୁର ଜିଲ୍ଲା ବୀରମହାରାଜପୁର ବ୍ଲକ ଜଟେସିଂହା ପଞ୍ଚାୟତ ଅନ୍ତର୍ଗତ ରୁଗୁଡିସାହି ଛକ ଠାରୁ ବଡଖମାରମଠ କୁ ସଂଯୋଗ କରୁଥିବା ରାସ୍ତା ଏବେ ମରଣଯନ୍ତା ପାଲଟିଛି। ଗ୍ରାମ୍ୟ ଉନ୍ନୟନ ବିଭାଗ ଅଧୀନରେ ରୁଗୁଡିସାହି ଛକ ଆରଡି ରାସ୍ତା ଠାରୁ ଆନନ୍ଦପୁର ପର୍ଯ୍ୟନ୍ତ ପ୍ରଧାନମନ୍ତ୍ରୀ ସଡ଼କ ଯୋଜନାରେ ୨୦୧୫ ମସିହାରେ ନିର୍ମାଣ ହୋଇଥିଲା। ପରେ ରାସ୍ତାଟି ଶୋଚନୀୟ ଅବସ୍ତା ହୋଇଥିବାରୁ ବିଭାଗୀୟ ପକ୍ଷରୁ  ମରାମତି କାର୍ଯ୍ୟ କରାଯାଇଥିଲା। ଏହି ରାସ୍ତାରେ ଭାରୀଯାନ ଚଳାଚଳ କରୁନଥିବା ବେଳେ ରାସ୍ତାଟି ଅନେକ ସ୍ଥାନରେ ଭୂଶୁଡି ପଡ଼ିଥିବା ଦେଖିବାକୁ ମିଳିଛି। ବିଭାଗୀୟ ଅଧିକାରୀ ଓ ଠିକାଦାର ଙ୍କ ମଧୁଚନ୍ଦ୍ରିକା ଯୋଗୁଁ ନିମ୍ନମାନର ମରାମତି କାମ ଯୋଗୁଁ ଦୁଇ ମାସ ଭିତରେ ରାସ୍ତା  ଶୋଚନୀୟ ଅବସ୍ତା ପାଲଟିଗଲା। ଏହି ରାସ୍ତା ଦେଇ ପ୍ରେତେକ ଦିନ ବହୁ ସଂଖ୍ୟକ ଲୋକ ବିଭିନ୍ନ ସ୍ଥାନକୁ ଯିବା ଆସିବା କରୁଥିବା ବେଳେ ତିନିଗୋଟି ପଞ୍ଚାୟତ ଲୋକେ ଏହି ରାସ୍ତା ଉପରେ ନିର୍ଭର କରିଥାନ୍ତି। ବିଶେଷ କରି ବଡ଼ଖମାର ସ୍ଥିତ ବରାହପଦର ମଠକୁ ଏହି ରାସ୍ତା ଦେଇ ପ୍ରେତେକ ଦିନ ବହୁ ଦୂରଦୁରାନ୍ତରୁ ଶ୍ରଦ୍ଧାଳୁ ମାନେ ଆସିଥାନ୍ତି। ହେଲେ ଏଭଳି ଦୟନୀୟ ରାସ୍ତା ଯୋଗୁଁ ନାହିଁ ନଥିବା ଅସୁବିଧାର ସମ୍ମୁଖୀନ ହେଉଥିବା ଅଭିଯୋଗ କରିଛନ୍ତି। ସରକାରଙ୍କ ରାଜସ୍ବରୁ ଲକ୍ଷାଧିକ ଟଙ୍କା ବ୍ୟୟରେ ନିର୍ମାଣ ହେଉଥିବା ରାସ୍ତାଘାଟ ଏବେ ବିଭାଗୀୟ ଅଧିକାରୀଙ୍କ ମନମୁଖୀ ଓ ଅବହେଳା ଯୋଗୁଁ ଠିକରେ ଲୋକଙ୍କ ସେବାରେ ଲାଗିପାରୁ ନାହିଁ। ଜିଲ୍ଲା ପ୍ରଶାସନ ଏଥିପ୍ରତି ଦୃଷ୍ଟି ଦେବା ସହ ତୁରନ୍ତ ଏହି ରାସ୍ତା ମରାମତି ପାଇଁ ବିଭିନ୍ନ ମହଲରେ ଦାବି ହୁଏ।