20-Feb-2023

ବଲାଙ୍ଗିର(ପ୍ରେରଣା ଖବର)-ବଲାଙ୍ଗୀର ରାଜେନ୍ଦ୍ର ବିଶ୍ୱବିଦ୍ୟାଳୟର ଯୁକ୍ତ ତିନିର ୩ୟ ସେମିଷ୍ଟାର ରେଜଲ୍ଟ ଗତ ଶୁକ୍ରବାର ପ୍ରକାଶ ପାଇଛି । ଏଥିରେ ୫୦% ରୁ ଉର୍ଦ୍ଧ୍ୱ ଛାତ୍ରଛାତ୍ରୀଙ୍କ ରେଜଲ୍ଟ ଖରାପ ହୋଇ ଫେଲ କରିଛନ୍ତି । ଫଳରେ ବିଶ୍ୱବିଦ୍ୟାଳୟ କତ୍ତୃପକ୍ଷଙ୍କ ଉପରେ ଛାତ୍ରଛାତ୍ରୀ ଅସନ୍ତୋଷ ବ୍ୟକ୍ତ କରିଛନ୍ତି । ଆଜି ଏହାର ପ୍ରତିବାଦରେ ଛାତ୍ରଛାତ୍ରୀମାନେ ବିଶ୍ୱବିଦ୍ୟାଳୟ କୁଳପତିଙ୍କ କାର୍ଯ୍ୟାଳୟର ଗେଟରେ ତାଲାପକାଇ ବିକ୍ଷୋଭ ପ୍ରଦର୍ଶନ କରିଛନ୍ତି । ପରୀକ୍ଷା ଖାତା ମୁଲ୍ୟାୟନରେ ତୃଟିଥିବା ଦର୍ଶାଇ ଛାତ୍ରଛାତ୍ରୀ ଆନ୍ଦୋଳନ କରିଛନ୍ତି । ତେବେ ବିଶ୍ୱବିଦ୍ୟାଳୟର ପରୀକ୍ଷା ନିୟନ୍ତ୍ରକ ଅକ୍ଷୟ ମିଶ୍ର ଛାତ୍ରଛାତ୍ରୀଙ୍କ ସହିତ ଆଲୋଚନା କରିଛନ୍ତି ଓ ଯେଉଁ ଖାତାର ମୁଲ୍ୟାୟନରେ ତୃଟିଥିବା ଅଭିଯୋଗ କରୁଛନ୍ତି ସେନେଇ ଆବେଦନ କଲେ ପୁଣିଥରେ ତାହାର ମୁଲ୍ୟାୟନ କରାଯିବ ବୋଲି ପ୍ରତିଶୃତି ଦେଇଛନ୍ତି । ସେହିପରି ଛାତ୍ରଛାତ୍ରୀ ବିଶ୍ୱବିଦ୍ୟାଳୟର କୁଳପତି ପ୍ରଫେସର ଉମାବଲ୍ଲଭ ମହାପାତ୍ରଙ୍କ ସହିତ ମଧ୍ୟ ଆଲୋଚନା କରି ସମସ୍ୟାର ସମାଧାନ କରିବାକୁ ଦାବି କରିଛନ୍ତି । ଗତ ଶୁକ୍ରବାର ଦିନ ଏହି ରେଜଲ୍ଟ ପ୍ରକାଶ ପାଇଥିଲା । ଏହି ରେଜଲ୍ଟ ଦେଖିଲା ପରେ ଛାତ୍ରଛାତ୍ରୀ ଆଜି ରାଜେନ୍ଦ୍ର ବିଶ୍ୱବିଦ୍ୟାଳୟରେ ସମ୍ମିଳିତ ହୋଇଥିଲେ । ଛାତ୍ର କଂଗ୍ରେସନେତା ଅଙ୍କିତ ସାହୁ ଓ ଛାତ୍ର ବିଜେଡିର ନେତା ସୁମନ ନନ୍ଦଙ୍କ ନେତୃତ୍ୱରେ ଛାତ୍ରଛାତ୍ରୀ କୁଳପତିଙ୍କ କାର୍ଯ୍ୟାଳୟର ସମ୍ମୁଖ ଗେଟରେ ତାଲା ପକାଇ ନାରାବାଜି କରିଥିଲେ ।

ଛାତ୍ରଛାତ୍ରୀଙ୍କୁ ନ୍ୟାୟ ପ୍ରଦାନ କରାଯାଉ ବୋଲି ଦାବି କରି ବିକ୍ଷୋଭ ପ୍ରଦର୍ଶନ କରିଥିଲେ । ଯଦି ବିଶ୍ୱବିଦ୍ୟାଳୟର ରେଜଲ୍ଟ ଏଭଳି ହେଉଛି ତାହେଲେ ବିଶ୍ୱବିଦ୍ୟାଳୟ ଅଧିନରେ ଥିବା କଲେଜ ଗୁଡିକରେ ଶିକ୍ଷାଦାନ ହେଉନି ବୋଲି ଅଭିଯୋଗ ଉଠୁଛି । ବିଶ୍ୱବିଦ୍ୟାଳୟରୁ ସୂଚନା ନେବାରୁ ଜଣାପଡିଛି ଯେ,୩ୟ ସେମିଷ୍ଟାରରେ ମୋଟ କଳା,ବିଜ୍ଞାନ ଓ ବାଣିଜ୍ୟ ବିଭାଗରେ ୭୨୬୧ ଜଣା ଛାତ୍ରଛାତ୍ରୀ ପରୀକ୍ଷା ଦେଇଥିଲେ । କିନ୍ତୁ ସେଥିରୁ ମାତ୍ର ୩୮୫୪ଜଣ ପାସ କରିଥିବା ବେଳେ ୩୪୦୭ଜଣ ଛାତ୍ରଛାତ୍ରୀ ଫେଲ କରିଛନ୍ତି । କଳାରେ ୫୫.୦୬ % ,ବିଜ୍ଞାନରେ ମାତ୍ର ୩୮.୫୫% ଓ ବାଣିଜ୍ୟରେ ୬୪.୩୨% ଛାତ୍ରଛାତ୍ରୀ ପାସ କରିଥିବା ଜଣାଯାଇଛି । ତେବେ ଛାତ୍ରଛାତ୍ରୀମାନେ କରୋନା ବେଳେ ଅନଲାଇନରେ ପରୀକ୍ଷା ଦେଉଥିଲେ । କରୋନା ପରେ ପ୍ରଥମ କରି ଅଫଲାଇନରେ ପରୀକ୍ଷା ଦେଲେ । ସେଥିପାଇଁ ରେଜଲ୍ଟରେ ଏଭଳି ହୋଇଥିବା ବିଶ୍ୱବିଦ୍ୟାଳୟ କତ୍ତୃପକ୍ଷ କହିଛନ୍ତି । ଏହି ଛାତ୍ରଛାତ୍ରୀଙ୍କୁ ଆଉଥରେ ଆସନ୍ତା ମାର୍ଚ୍ଚରେ ପରୀକ୍ଷା ଦେବାକୁ ପଡିବ ବୋଲି ପରୀକ୍ଷା ନିୟନ୍ତ୍ରକ ଶ୍ରୀ ମିଶ୍ର କହିଛନ୍ତି ।