20-Feb-2023

ବଲାଙ୍ଗିର(ପ୍ରେରଣା ଖବର)-ବଲାଙ୍ଗୀର ପୌରପାଳିକାରେ ନରସିଂହଙ୍କ ପ୍ରଭୁତ୍ୱ ଚାଲୁଥିଲା । ଏବେ ନିର୍ବାଚିତ କାଉନସିଲ ଆସିଲା ପରେ ନରସିଂହ ଓ କାଉନସିଲ ମଧ୍ୟରେ ତୁତୁ ମେମେ ଚାଲିଛି । ବଲାଙ୍ଗୀର ପୌରାପାଳିକାରେ ବିଜେଡିର ଅଧ୍ୟକ୍ଷା ଲିକା ସାହୁ ବିପୁଳ ଭୋଟରେ ଜିଣିବା ସହିତ ୨୧ଟି କାଉନସିଲରଙ୍କ ମଧ୍ୟରୁ ୧୬ଟିରେ ଶାସକ ବିଜେଡିଦଳ ଜିଣିଛି । ମୁଖ୍ୟତଃ ବସ୍ତିବାସିନ୍ଦା ବହୁମାତ୍ରାରେ ବିଜେଡିକୁ ଭୋଟ ଦେଇଛନ୍ତି । ତେଣୁ ନରସିଂହ ମିଶ୍ର ବଲାଙ୍ଗୀର ସହରରେ ବିକାଶ ନାମରେ ବସ୍ତିବାସିନ୍ଦାଙ୍କୁ ଉଚ୍ଛେଦ କରି ହଇରାଣ କରିବାକୁ ହୀନ ଉଦ୍ୟମ କରୁଛନ୍ତି ବୋଲି ବିଜେଡି ଅଭିଯୋଗ କରିଛି । ବଲାଙ୍ଗୀର ଇନ୍ଦିରାନଗର ଓ ଇଚ୍ଛାପଡାରେ ବସ୍ତାବାସିନ୍ଦାଙ୍କୁ ଉଚ୍ଛେଦ ପାଇଁ ନରସିଂହ ରାଜ୍ୟସରକାର ଉପରେ ବାରମ୍ବାର ଚାପ ପ୍ରୟୋଗ କରୁଥିବା ଅଭିଯୋଗ ହୋଇଛି । ଏପରିକି ନିର୍ବାଚିତ କାଉନସିଲକୁ ଭାଙ୍ଗିଦେବାକୁ ଧମକ ମଧ୍ୟ ଦେଉଛନ୍ତି । ତେଣୁ ଆଜି ବସ୍ତିବାସିନ୍ଦାଙ୍କୁ ସାଙ୍ଗରେ ନେଇ ବିଜେଡି ବଲାଙ୍ଗୀରରେ ବିଶାଳ ଶୋଭାଯାତ୍ରା କରି ନିଜର ଶକ୍ତି ପ୍ରଦର୍ଶନ କରିଛି । ହଜାର ହଜାର ସଂଖ୍ୟାରେ ମହିଳା ଏହି ଶୋଭାଯାତ୍ରାରେ ସାମିଲ ହୋଇ ନରସିଂହଙ୍କୁ ଖୋଲା ଆହ୍ୱାନ କରିଛନ୍ତି । ବିଜେଡି ଦାବି କରିଛି ଯେ,ବଲାଙ୍ଗୀର କ୍ଲବପଡାର ଲକ୍ଷ୍ମୀନାରାୟଣମନ୍ଦିର ଓ ସ୍କୁଲର ଜମିକୁ ଡିମାରକେସନ କରାଯାଉ । ଏହା ସହିତ ଗତ ୯ବର୍ଷରେ କ୍ଷମତାର ଅପବ୍ୟବହାର କରାଯାଇ ଏସସି/ଏସଟି ଜମିକୁ ସାଧାରଣଲୋକଙ୍କୁ ହସ୍ତାନ୍ତର କରାଯାଇଛି । ଏହାର ଏକ ଉଚ୍ଚସ୍ତରୀୟ ତଦନ୍ତ କରାଯାଇ ଘଟଣା ପଛର ଖଳନାୟକଙ୍କୁ ଖୁଲାସା କରାଯାଉ । ସେହିପରି ଗତ କିଛିଦିନ ତଳେ ସର୍ବ ସମ୍ମୁଖରେ ନିର୍ବାଚିତ କାଉନସିଲକୁ ଭାଙ୍ଗିଦେବାକୁ ନରସିଂହ ଧମକ ଦେଇଥିଲେ ।

ଏପରିକି ବଲାଙ୍ଗୀର ପୌରାଧ୍ୟକ୍ଷା ଲିକା ସାହୁ ଓ ମହିଳା କାଉନସିଲରଙ୍କୁ ନରସିଂହଙ୍କ ଗୁଣ୍ଡାମାନେ ଦୁର୍ବ୍ୟବହାର କରିଥିଲେ । ଏହାର ଉଚିତ ତଦନ୍ତ କରାଯାଉ ବୋଲି ମୁଖ୍ୟମନ୍ତ୍ରୀଙ୍କ ଉଦ୍ଦେଶ୍ୟରେ ଜିଲ୍ଲାପ୍ରଶାସନ ଜରିଆରେ ଦିଆଯାଇଥିବା ଦାବିପତ୍ରରେ ଉଲ୍ଲେଖ କରାଯାଇଛି । 
      ସ୍ଥାନୀୟ କୋସଳକଳାମଣ୍ଡଳ ପଡିଆଠାରୁ ବିଜେଡିର କାର୍ଯ୍ୟକାରୀ ସଭାପତି ଅଶୋକ ମହାନ୍ତି ଓ ବିଜୁମହିଳା ଜନତାଦଳର ଜିଲ୍ଲା ସଭାନେତ୍ରୀ ପୌରପରିଷଦର ପୂର୍ବତନ ଅଧ୍ୟକ୍ଷା ଦମୟନ୍ତି ବାଘଙ୍କ ନେତୃତ୍ୱରେ ଅନୁଷ୍ଠିତ ଏହି ଶୋଭାଯାତ୍ରା ସହର ପରିକ୍ରମା କରି ଜିଲ୍ଲାପାଳଙ୍କ କାର୍ଯ୍ୟଳୟ ସମ୍ମୁଖରେ ବିକ୍ଷୋଭ ପ୍ରଦର୍ଶନ କରିଛି । ଏହି ବିକ୍ଷୋଭରେ ଭଟଲି ବିଧାୟକ ତଥା ବଲାଙ୍ଗୀର ବିଜେଡି ପର୍ଯ୍ୟବେକ୍ଷକ ସୁଶାନ୍ତ ସିଂ ଯୋଗଦେଇ କଂଗ୍ରେସ ବିଧାୟକ ନରସିଂହଙ୍କୁ ଟାର୍ଗେଟ କରିଛନ୍ତି । ସୁଶାନ୍ତ ସିଂ କହିଛନ୍ତି ଯେ,ରାଜ୍ୟରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ଜନହିତକାରୀ ଯୋଜନା ଯୋଗୁଁ ବସ୍ତିବାସିନ୍ଦା ଖୁସି ରହିଛନ୍ତି । ମହିଳାମାନଙ୍କ ପାଇଁ ମଧ୍ୟ ଅନେକ ଯୋଜନା କରିଛନ୍ତି । ତେଣୁ ମୁଖ୍ୟମନ୍ତ୍ରୀଙ୍କ ଲୋକପ୍ରିୟତା ବଢୁଛି । କିନ୍ତୁ ବିରୋଧି ଏହାକୁ ସହ୍ୟ କରିପାରୁନାହାଁନ୍ତି । ଗତ କିଛିଦିନ ତଳେ ସମ୍ବଲପୁରରେ ବିରୋଧିଦଳର ନେତା ଜୟନାରାୟଣ ମିଶ୍ର ଜଣେ ମହିଳା ପୋଲିସ ଅଧିକାରୀଙ୍କୁ ଦୁର୍ବ୍ୟବହାର କରିଥିବା ବେଳେ ବଲାଙ୍ଗୀର ସଂସ୍କୃତିଭବନ ଉଦଘାଟନ ବେଳେ ବଲାଙ୍ଗୀର ବିଧାୟକ ନରସିଂହ ମିଶ୍ର ଜଣେ ମହିଳା କାଉନସିଲରଙ୍କୁ ଦୁର୍ବ୍ୟବହାର କରୁଛନ୍ତି । ଏଥିରୁ ବିରୋଧି କଂଗ୍ରେସ ଓ ଭାଜପାର ଅସଲ ଚରିତ୍ର ପ୍ରକାଶ ପାଉଛି ବୋଲି ଶ୍ରୀ ସିଂ କହିଥିଲେ । ପୁରାଣ ଉପରେ ଯାଇ ସୁଶାନ୍ତ କହିଥିଲେ ଯେ,ସିତାଙ୍କୁ ଅପମାନିତ କରି ରାବଣର ଲଙ୍କା ଧ୍ୱଂସହେଲା,ଦ୍ରୋପଦିଙ୍କୁ ଅପମାନିତ କରି କୌରବବଂଶ ଧ୍ୱଂସ ହେଲା ।ଏବେ ଉଭୟ ବିଜେପି ଓ କଂଗ୍ରେସର ନେତା ମହିଳାଙ୍କୁ ଅପମାନିତ କରି ଧ୍ୱଂସ ହେବ ବୋଲି କହିଥିଲେ । ବଲାଙ୍ଗୀର ସମେତ ରାଜ୍ୟର ସବୁ ଅଞ୍ଚଳରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ବିକାଶ କାମ କରାଉଛନ୍ତି । ଏଣୁ ନରସିଂହ ଏଥିରେ ବିଚଳିତ ହେଉଛନ୍ତି ବୋଲି ଶ୍ରୀ କହିଛନ୍ତି । ସେହିପରି ବଲାଙ୍ଗୀର ଜିଲ୍ଲା ପରିଷଦ ଅଧ୍ୟକ୍ଷା ଦେବକୀ ସାହୁ,ପୌରାଧ୍ୟକ୍ଷା ଲିକା ସାହୁ,ଉପାଧ୍ୟକ୍ଷା ଗାୟତ୍ରୀ ଭୋଇ,ଅଶୋକ ମହାନ୍ତି,କୈଳାସ ମହାନ୍ତି,ବିଡିସିସି ବ୍ୟାଙ୍କର ପୂର୍ବତନ ସଭାପତି ଲକ୍ଷ୍ମଣକୁମାର ମେହେର,ପ୍ରଦ୍ୟୁତ ମିଶ୍ର,ଭଗବାନ ବଗର୍ତ୍ତି,ପୂର୍ବତନ ପୌରାଧ୍ୟକ୍ଷ ପ୍ରଦୀପ ସାହୁ,ଯୁବବିଜେଡି ସଭାପତି ରାଜେନ୍ଦ୍ର ହୋତା,ମହିଳା ବିଜେଡି ସଭାନେତ୍ରୀ ଦମୟନ୍ତି ବାଗ,ସଦର ବ୍ଲକର ପୂର୍ବତନ ଅଧ୍ୟକ୍ଷ ଗୁଲାବ ବାଗ,କାଉନସିଲରଗଣ ଓ ଅନ୍ୟାନ୍ୟ ନେତୃତ୍ୱଗଣ ନରସିଂହଙ୍କ ବିରୁଦ୍ଧରେ ବର୍ଷିଥିଲେ । ଅନ୍ୟମାନଙ୍କ ମଧ୍ୟରେ ନରସିଂହ ବାଗ,ମହେନ୍ଦ୍ର ବାଘ,ଟୁନା ସ୍ୱାଇଁ,ବିଭୁତିଭୂଷଣ ମିଶ୍ର,ଛାତ୍ରବିଜେଡିର ଗୁଞ୍ଜ ଖାନ,ପ୍ରଦ୍ୟୁମ୍ନ ହୋତା ପ୍ରମୁଖ ନେତୃବୃନ୍ଦ ଏହି ଶୋଭାଯାତ୍ରାରେ ସାମିଲ ଥିଲେ ।