12-Feb-2023

ବୀରମହାରାଜପୁର, (ବିନୋଦ ପାଣ୍ଡେ): ସୁବର୍ଣ୍ଣପୁର ଜିଲ୍ଲା ବୀରମହାରାଜପୁର ମୁଖ୍ୟ ଡାକ୍ତରଖାନାରେ ନିର୍ମାଣ ହୋଇଥିବା ରକ୍ତ ସଂରକ୍ଷଣ କେନ୍ଦ୍ର ଆଜି କୁ ୨୩ ବର୍ଷ ବିତିଯାଇଥିଲେ ମଧ୍ୟ ତାହା କାର୍ଯ୍ୟକ୍ଷମ ହୋଇପାରୁନାହିଁ। ପ୍ରଶାସନିକ ଓ ରାଜନୈତିକ ଇଚ୍ଛାଶକ୍ତିର ଅଭାବରୁ ଏହି ରକ୍ତ ସଂରକ୍ଷଣ କେନ୍ଦ୍ର ଲକ୍ଷାଧିକ ଟଙ୍କା ବିୟରେ ନିର୍ମାଣ ହୋଇଥିଲେ ମଧ୍ୟ ଦିନକ ପାଇଁ ବି କାର୍ଯ୍ୟରେ କାର୍ଯ୍ୟରେ ଲାଗିପାରିନାହିଁ। ପୂର୍ବତନ ଢେଙ୍କାନାଳ ସାଂସଦ କାମାକ୍ଷ ପ୍ରସାଦ ସିଂହଦେଓ ତାଙ୍କ କ୍ଷେତ୍ର ଉନ୍ନୟନ ପାଣ୍ଠିରୁ ବିଭିନ୍ନ ପର୍ଯ୍ୟାୟରେ ଏଥିପାଇଁ ୯ ଲକ୍ଷ ୫୮ ହଜାର ଟଙ୍କାର ଅନୁଦାନ ଯୋଗାଇ ଦେଇଥିଲେ।‌ ମନ୍ଥର କାର୍ଯ୍ୟ ଯୋଗୁଁ ଉକ୍ତ ରକ୍ତ ସଂରକ୍ଷଣ କେନ୍ଦ୍ର କୋଠାର ନିର୍ମାଣ ସରିବାକୁ ପ୍ରାୟ ୮ ବର୍ଷ ସମୟ ଲାଗିଥିଲା। ଚଳିତ ବର୍ଷ ମଧ୍ୟ ଲକ୍ଷାଧିକ ଟଙ୍କା ବ୍ୟୟରେ ଏହି ରକ୍ତ ଭଣ୍ଡାର ମରାମତି କରାଯାଇଛି। ତେବେ  ସୁବୁଠାରୁ ଉଦବେଗ ବିଷୟ ଉକ୍ତ ରକ୍ତ ସଂରକ୍ଷଣ କେନ୍ଦ୍ର ଆଜି ସୁଦ୍ଧା କାର୍ଯ୍ୟ ରେ ଲାଗିପାରିନାହିଁ।‌ ବାରମ୍ବାର ଅଞ୍ଚଳବାସୀ ଦାବି ପରେ ଏଥିପାଇଁ ଫ୍ରିଜର ଓ ଅନ୍ୟାନ୍ୟ ଯନ୍ତ୍ରାଂଶ କିଣାଯାଇଥିଲା। ମାତ୍ର କେତେବେଳେ ଫ୍ରିଜର ଅକାମୀ ତ କେତେବେଳେ କର୍ମଚାରୀ ଅଭାବ ଆଦିର ଆଳ ଦେଖାଇ ଏହି କେନ୍ଦ୍ରକୁ କାର୍ଯ୍ୟକ୍ଷମ କରାଯାଉନାହିଁ। ଫଳରେ ଏଠାରେ ରକ୍ତ ସଂରକ୍ଷଣ କେନ୍ଦ୍ର ଥାଇ ବି ରକ୍ତ ଆବଶ୍ୟକ ପଡୁଥିବା ରୋଗୀ ବାଧ୍ୟ ହୋଇ ଅଧିକ ଖର୍ଚ୍ଚାନ୍ତ ହେବା ସତ୍ତ୍ୱେ ସୋନପୁର, ବୁର୍ଲା, ରେଢ଼ାଖୋଲ, ଆଦି ଡାକ୍ତରଖାନାକୁ ଯାଉଛନ୍ତି। ଅନ୍ୟପକ୍ଷରେ ଏ ଅଞ୍ଚଳରେ ବିଭିନ୍ନ ରକ୍ତଦାତା ସଂଗଠନ ବହୁ ସମୟରେ ରକ୍ତଦାନ ଶିବିରମାନ ଆୟୋଜନ କରୁଥିଲେ ହେଁ ସେମାନଙ୍କୁ ମଧ୍ୟ ଏହି କାର୍ଯ୍ୟ ସମ୍ପାଦନ ପାଇଁ ଅନ୍ୟ ଚିକିତ୍ସାଳୟ ଉପରେ ନିର୍ଭର କରିବାକୁ ପଡୁଛି।  ଏହି ପରିପ୍ରେକ୍ଷୀରେ ଏହାକୁ ଶିଘ୍ର ଚାଲୁ କରିବା ନେଇ ସ୍ଥାନୀୟ ଯୁବଗୋଷ୍ଠୀ ମିଳିତ ଭାବେ ଆନ୍ଦୋଳନାତ୍ମକ ପନ୍ଥା ଅବଲମ୍ବନ କରିବାକୁ ସ୍ଥିର କରିଥିବା ଜଣାଯାଇଛି। ଜିଲ୍ଲା ପ୍ରଶାସନ ଏଥିପ୍ରତି ଦୃଷ୍ଟି ଦେବା ସହ ତୁରନ୍ତ ଏହା କାର୍ଯ୍ୟକ୍ଷମ ପାଇଁ ସାଧାରଣ ରେ ଦାବ ହେଉଛି