07-Feb-2023

ପାଟଣାଗଡ଼ (ପୂର୍ଣ୍ଣ ଶଶୀ ଶେଖର ରାଓ): ଗତ କିଛି ଦିନ ହେଲା ପାଟଣାଗଡ଼ ଉପଖଣ୍ଡରେ ଚୋରି, ଡକାୟତି, ହିଂସା, ହତ୍ୟା, ବେଆଇନ କାରବାର ବଢ଼ି ଚାଲୁଥିବା ବେଳେ ସାଧାରଣ ଜନତା ନିଜକୁ ସୁରକ୍ଷିତ ମନେ କରୁନାହାଁନ୍ତି। ଏପଟେ ପୋଲିସ ପ୍ରଶାସନ ଛୋଟ ଛୋଟିଆ ଅପରାଧୀଙ୍କୁ ଗିରଫ କରି ନିଜର କର୍ତ୍ତବ୍ୟ ସାରିଦେଇ ନିଘୋଡ଼ ନିଦରେ ଶୋଇଛନ୍ତି । ପାଟଣାଗଡ଼ ଉପଖଣ୍ଡରେ ବହୁତ ଗୁଡ଼ିଏ ହତ୍ୟାକାଣ୍ଡ ଘଟଣା ଲୁଚି ରହିଯାଇଛି ଯାହାର ପର୍ଦ୍ଦାଫାଶ ହୋଇପାରିନାହିଁ। ଗତ ବର୍ଷ ଜୁନ ମାସ ୬ ତାରିଖ ଦିନ ପାଟଣାଗଡ଼ ବ୍ଳକରେ

କାର୍ଯ୍ୟରତ କନିଷ୍ଠ ଯନ୍ତ୍ରୀ ସୁରେଶ ଚନ୍ଦ୍ର ସାହୁଙ୍କୁ ହତ୍ୟା କରାଯାଇଥିବା ଘଟଣାର ଆଜି ୮ ମାସ ପୁରିଥିଲେ ସୁଦ୍ଧା ଆଜି ପର୍ଯ୍ୟନ୍ତ କାର୍ଯ୍ୟନୁଷ୍ଠାନ ଶୂନ୍ୟ। କନିଷ୍ଠ ଯନ୍ତ୍ରୀ ହତ୍ୟାକାଣ୍ଡର ଅପରାଧୀ ମାନେ ଖୁଲମଖୁଲା ବୁଲୁଥିବା ବେଳେ ପୋଲିସ ପ୍ରଶାସନ ସେମାନଙ୍କ ପାଖକୁ ପହଞ୍ଚି ପାରୁନଥିବା ଏକ ଆଶ୍ଚର୍ଯ୍ୟଜନକ ବିଷୟ । ପୋଲିସ କାହା ଚାପରେ ରହି କନିଷ୍ଠ ଯନ୍ତ୍ରୀଙ୍କ ହତ୍ୟାକାଣ୍ଡର ତଦନ୍ତ ନକରିବା ଏହା ଜନସାଧାରଣରେ ପ୍ରଶ୍ନବାଚୀ ସୃଷ୍ଟି କରୁଛି। ଏଭଳି ବେଲପଡା ଥାନା ବେଲପଡା ଗାଆଁର ପୁରୁଣା ବନ୍ଧ ଠାରେ ଗତ କିଛି ଦିନ ତଳେ ଖଲିପଥର ଗାଁ ର ଜଣେ ଯୁବକଙ୍କ ମୃତଦେହ ଉଦ୍ଧାର କରାଯାଇଥିଲା। କିନ୍ତୁ ତାହା କିଏ ମାରିଥିଲେ ନାଁ ଅନ୍ୟ କୌଣସି କାରଣରୁ ମୃତ୍ୟୁବରଣ କରିଥିଲା ତାର ମଧ୍ୟ ଠେର ପାଉନି ପୋଲିସ। ଏବେ କିଛିଦିନ ତଳେ ପାଟଣାଗଡ଼ ସହରର ମଧ୍ୟସ୍ଥରେ ଥିବା ସୁନା କଳସ ଦୋକାନରୁ ଦିନ ଦ୍ବିପହରରେ ବନ୍ଧୁକ ଦେଖାଇ ଲୁଟ କରିଥିବା ବେଳେ  କେତେ ଜଣଙ୍କୁ ଗିରଫ କରି କୋର୍ଟ ଚାଲାଣ କରାଯାଇଛି କିନ୍ତୁ ସେଥିରେ ସମ୍ପୃକ୍ତ ଥିବା ଆଉ କେତେ ଜଣ ବ୍ୟକ୍ତିଙ୍କ ପାଖରେ ପୋଲିସ ପହଞ୍ଚି ପାରୁନାହିଁ ବୋଲି ଜନସାଧାରଣରେ ଚର୍ଚ୍ଚା ହୁଏ। ଏବେ ଏବେ ରାମପୁର ଦୁଇ ଜଣ ବ୍ୟକ୍ତିଙ୍କ ଠାରୁ ସାଢେ଼ ତିନି ଲକ୍ଷ ଟଙ୍କା ବିଚ୍ ରାସ୍ତା ଉପରେ ଲୁଟ୍  କରି ଫେରାର ମାରିଥିଲେ। ଏମିତି ଅନେକ ଅପରାଧିକ କାର୍ଯ୍ୟକଳାପ ବଢି ଚାଲିଛି ଯେ ରୋକିବା ପାଇଁ ଚେଷ୍ଟା କରୁନାହିଁ ପୋଲିସ ପ୍ରଶାସନ। ଏଭଳି ପରିସ୍ଥିତି ‌ଦେଖି ପାଟଣାଗଡ଼ ନିର୍ବାଚନ ମଣ୍ଡଳୀର ପୂର୍ବତନ ବିଧାୟକ କନକ ବର୍ଦ୍ଧନ ସିଂହଦେଓଙ୍କ ନେତୃତ୍ବରେ ଗତକାଲି ସକାଳ ୧୦ ଟାରୁ  ଆଜି ପର୍ଯ୍ୟନ୍ତ ଶହ ଶହ ବିଜେପି କର୍ମୀ ଉପଖଣ୍ଡ ପୋଲିସ ଅଧିକାରୀଙ୍କ କାର୍ଯ୍ୟାଳୟ ସମ୍ମୁଖରେ ଧାରଣାରେ ବସିଥିଲେ। ଗତକାଲି ଅପରାହ୍ନ ସମୟରେ ଉପଖଣ୍ଡ ପୋଲିସ ଅଧିକାରୀ ଜ୍ୟୋତିର୍ମୟ ଭୁକ୍ତା  ପୂର୍ବତନ ମନ୍ତ୍ରୀ କନକବର୍ଦ୍ଧନ ସିଂହଦେଓ ଙ୍କୁ ବୁଝାଇବା ସହ ଛାଇରେ ରହିବାକୁ ଅନୁରୋଧ କରିଥିଲେ ସୁଦ୍ଧା ପୂର୍ବତନ ମନ୍ତ୍ରୀ ଏକଜିଦ୍ ରେ ରହି ଧାରଣା ରେ ବସିଥିଲେ। ଯେପର୍ଯ୍ୟନ୍ତ ଜିଲ୍ଲା ଆରକ୍ଷୀ ଅଧିକ୍ଷକ  ଆଲୋଚନା କରି ଅପରାଧିକ କାର୍ଯ୍ୟକଳାପ ଉପରେ ନିୟନ୍ତ୍ରଣ ରଖିବାକୁ ପ୍ରତିଶ୍ରୁତି ନ ଦେଇଛନ୍ତି ସେ ପର୍ଯ୍ୟନ୍ତ ଧାରଣା ବସିବେ ବୋଲି ପୂର୍ବତନ ମନ୍ତ୍ରୀ କନକବର୍ଦ୍ଧନ ସିଂହଦେଓ କହିଥିଲେ। ଗତକାଲି ସକାଳୁ ସନ୍ଧ୍ୟା ପର୍ଯ୍ୟନ୍ତ ଧାରଣା ଦେଇ ସନ୍ଧ୍ୟା ସମୟରେ ମୃଦଙ୍ଗ,ଗିନି ଧରି ପୋଲିସ ସାମ୍ମାନାରେ କିର୍ତନ କରି ସମୟ ଅତିବାହିତ କରିଥିଲେ।ଏହା ଦେଖି ବୁଦ୍ଧିଜୀବୀ ମାନେ କହିଥିଲେ ଯେ ନିଘୋଡ଼ ନିଦରେ ଶୋଇଛନ୍ତି ପାଟଣାଗଡ଼ ଉପଖଣ୍ଡ ପୋଲିସ ଭଜନ କୀର୍ତ୍ତନ କରି ଉଠାଉଛନ୍ତି ବିଜେପି କର୍ମୀ । ଆଜି ପୁଣି କନକ ବର୍ଦ୍ଧନ ସିଂହଦେଓଙ୍କ ସହ ଶହ ଶହ ମାତ୍ରାରେ ବିଜେପି

କର୍ମୀ ଏକତ୍ରିତ ପୁଣି ଆନ୍ଦୋଳନ ରେ ବସିଥିବା ବେଳେ ଅପରାହ୍ନ ୨ ଟା ବେଳକୁ ବଲାଙ୍ଗିର ଜିଲ୍ଲା ଆରକ୍ଷୀ ଅଧିକ୍ଷକ ନିତିନ କୁମାର କୁଶଳର ଘଟଣା ସ୍ଥଳରେ ପହଞ୍ଚିଥିଲେ। ପାଟଣାଗଡ଼ ଉପଖଣ୍ଡ ବେଲପଡା, ଖପ୍ରାଖୋଲ, ପାଟଣାଗଡ଼,ଲାଠୋର, ଲରମ୍ଭା ଥାନା ରେ ଯେଉଁ ମକଦ୍ଦମା ଗୁଡ଼ିକ ପଡ଼ିରହିଛି ସେସବୁକୁ ପୁନଃ ତଦନ୍ତ କରି ଦୃଢ଼ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ପ୍ରତିଶ୍ରୁତି ଦେବା ପରେ ଧାରଣ ରୁ ଉଠିଥିଲେ କନକ ବର୍ଦ୍ଧନ ସିଂହଦେଓ ଓ ବିଜେପି କର୍ମୀ।