01-Feb-2023

ବଲାଙ୍ଗୀର (ମଳୟ ମିଶ୍ରଙ୍କ ରିପୋର୍ଟ )  ବଲାଙ୍ଗୀର ଜିଲ୍ଲାର ବିଭିନ୍ନ ଥାନା ଅଞ୍ଚଳରୁ ସେଠ୍ ଓ ସର୍ଦ୍ଦାରଙ୍କ ଠାରୁ ମୋଟାଅଙ୍କର ବଇନା ନେଇ ହଜାର ହଜାର ଶ୍ରମିକ ସପରିବାର ଆନ୍ଧ୍ର ପ୍ରଦେଶ , ତେଲେଙ୍ଗାନା , ତାମିଲନାଡୁ , କର୍ଣ୍ଣାଟକ ଓ ରାଜ୍ୟବାହାରକୁ ତଥା ରାଜ୍ୟ ଭିତରେ ଅନ୍ୟାନ୍ୟ ଜିଲ୍ଲାକୁ ଇଟାଭାଟିରେ କାମ କରିବାକୁ ଦାଦନଶ୍ରମିକ ଭାବରେ ଯିବାପରେ ଏବେ ଆରମ୍ଭ ହୋଇଛି ସେଠାରୁ ଖସି ଆସିବାର ଯୋଜନା ।  କଳେ ବଳେ କୌଶଳରେ ଗୋଟିଏ ଦଳର ଜଣେ ଦି'ଜଣ ବାହାରର ଇଟାଭାଟିରୁ ଲୁଚି ପଳାଇଆସିବା ପରେ ଏଠାରେ କେତେକ ପେଶାଦାର ଉଦ୍ଧାରକାରୀ ପାଲଟିଥିବା ଠକ ସମାଜସେବୀଙ୍କ ଜରିଆରେ ପୁଲିସ୍ , ପ୍ରଶାସନ ଓ ଶ୍ରମବିଭାଗରେ ମିଛନିର୍ଯାତନା କାହାଣୀ ଫାନ୍ଦି ଇଟାଭାଟିରେ ଅଟକଥିବା ପରିବାରବର୍ଗ ବା ସାଥୀଶ୍ରମିକମାନଙ୍କୁ ମୁକୁଳାଇବାର ନାଟକ କରୁଛନ୍ତି ।  ଏଥିରେ ଏହି ତଥାକଥିତ ନକଲିସମାଜସେବୀମାନେ ସେମାନଙ୍କଠାରୁ ଲକ୍ଷାଧିକଟଙ୍କା ନେଇ ସହାୟତା କରୁଥିବା ସମ୍ପର୍କୀୟ ଚାଞ୍ଚଲ୍ୟକର ତଥ୍ୟ ଜଣାପଡିଛି । ଗତ କିଛିବର୍ଷ ହେଲା ଏପରି ଜାଲିଆତି କାରବାରରେ ଜିଲ୍ଲାର ବିଭିନ୍ନ ଥାନାରେ ଅନେକ ଦାଦନଉଦ୍ଧାର ମାମଲା ଋଜୁ ହୋଇ ଅନେକ ସେଠ୍ ଓ ସର୍ଦ୍ଦାରମାନେ ଏପରି ମିଥ୍ୟା ଅଭିଯୋଗରେ ଗିରଫ ହୋଇଥିବା ଜଣାପଡିଛି । 

ସବୁଠାରୁ ଗୁରୁତ୍ୱପୂର୍ଣ୍ଣ କଥା ଯେ , ଏହି ତଥାକଥିତ ସମାଜସେବୀମାନେ ନିଜକୁ କୌଣସି ସଂଗଠନର କର୍ମକର୍ତ୍ତା , ମାନବାଧିକାର କର୍ମୀ , ଡକ୍ଟର ଉପାଧୀଧାରୀ ଇତ୍ୟାଦି କହି ବଇନାହଡପକାରୀ ଦାଦନଶ୍ରମିକଙ୍କର ତ୍ରାଣକର୍ତ୍ତା ମସିହା ବନିଛନ୍ତି  ! ବର୍ଷ ବର୍ଷ ଧରି ଏବେ ଏହା ଏକପ୍ରକାର ନିୟମିତ ଧନ୍ଦାରେ ପରିଣତ ହେଲାଣି । ଏହି ଉଦ୍ଧାରକର୍ତ୍ତା ନକଲି ସମାଜସେବୀଙ୍କ ସହ କେତେକ ଅସାଧୁ ପୁଲିସ୍ ଅଧିକାରୀ ,ଶ୍ରମଅଧିକାରୀ ଓ ସାମ୍ବାଦିକ ମଧ୍ୟ ସାମିଲ୍ ରହୁଥିବା  ଜଣାଯାଇଛି । ଏମାନେ ମିଳିତଭାବେ ସରକାରଙ୍କର ଦାଦନଶ୍ରମିକ ଉଦ୍ଧାର ମିଶନର ଅନୁଚିତ ଫାଇଦା ନେଇ ଲକ୍ଷ ଲକ୍ଷ ଟଙ୍କା ଫାଇଦା ମାରିନେଉଛନ୍ତି । ଆଗ ଅପେକ୍ଷା ଏବେ ଦାଦନଶ୍ରମିକମାନେ ବହୁତ ଚାଲାକ୍ ହେଇଗଲେଣି । ସେମାନେ ଯୋଜନାବଦ୍ଧ ଭାବେ କୌଣସି ସେଠ୍ ବା ସର୍ଦ୍ଦାରମାନଙ୍କଠାରୁ ଇଟାଭାଟିରେ କାମକରିଯିବାକୁ ବାହାରି ଲକ୍ଷ ଲକ୍ଷ ଟଙ୍କା ଅଗ୍ରୀମ ନେଇଥା'ନ୍ତି ।  ସେହିଦଳର ଜଣେ ଦି'ଜଣ ଘରକୁ ଟଙ୍କା ରଖିବାକୁ ଆସି ଏହି ତଥାକଥିତ ସମାଜସେବୀ ବା ସାମ୍ବାଦିକଙ୍କ ଜରିଆରେ ଥାନାପୁଲିସ୍ ରେ ଅଭିଯୋଗ କରି ସର୍ଦ୍ଦାର ପାଖରେ ଦିନେଅଧେ ରହିଥିବା

ବାକିମାନଙ୍କୁ ଛଡାଇ ଆଣନ୍ତି । ଅଥବା ବାଟରେ ନିଜକୁ ଧରାଇ ଦିଅନ୍ତି । ଏବଂ ଯଦି ସେହି ଶ୍ରମିକଙ୍କୁ ଇଟାଭାଟିକି ପହଞ୍ଚାଇ ଦିଆଯାଏ , କିଛିଦିନ ପରେ ସେଠାରେ ନିର୍ଯ୍ଯାତନା ଅଭିଯୋଗ କରାଯାଇ ଉଦ୍ଧାରର ନାଟକ କରାଯାଇଥାଏ । ଫଳରେ ସେଠ୍ ଓ ସର୍ଦ୍ଦାରମାନଙ୍କର ଲକ୍ଷ ଲକ୍ଷ ବଇନାଟଙ୍କା ସେମାନେ ହଡପ କରନ୍ତି ଓ  ଏହି ତଥାକଥିତ ସମାଜସେବୀମାନଙ୍କୁ ଭାଗ ଦେଇଥାନ୍ତି । ଏଭଳି ପେଶାଦାର ଠକ ଉଦ୍ଧାରକାରୀମାନଙ୍କର ଗାଁ ଗାଁ ରେ ଏଜେଣ୍ଟମାନେ ରହିଥାନ୍ତି ଓ  ଏହି ଉଦ୍ଧାରକର୍ତ୍ତାମାନଙ୍କର ବିଭିନ୍ନ ଥାନାପୁଲିସ୍ ସହ ଯୋଗାଯୋଗ ରହିଥାଏ । ବିଶେଷକରି ପାଟଣାଗଡ , ବେଲପଡା ଓ କଣ୍ଟାବାଞ୍ଜି ଅଞ୍ଚଳରେ ଏ ଧରଣର ଠକେଇ କାରବାର ଚାଲିଆସୁଛି । ବେଲପଡା ଥାନା ଅନ୍ତର୍ଗତ ଖଲିପଥର ଗାଁର କେତେକ ଅଭ୍ୟାସଗତ ବଇନାହଡପକାରୀ ଠକଶ୍ରମିକ ଏହି କାରଣରୁ କିଛିଦିନ ହେଲା ଏଭଳି ତଥାକଥିତ ଉଦ୍ଧାରହେଲା ପରେ ସର୍ଦ୍ଦାରର ଟଙ୍କା ଅସୁଲି ଭୟରେ ଗାଁ ଘରକୁ ନଯାଇ ଜଙ୍ଗଲରେ ଲୁଚିରହିଥିବା ପ୍ରକାଶ ପାଇଥିଲା । ତେବେ  ଏହାକୁ ସେଠ୍ ଓ ସର୍ଦ୍ଦାରମାନଙ୍କ ବିରୋଧରେ ନିର୍ଯାତନାର କାହାଣୀ ବୋଲି ଅତିରଞ୍ଜିତ ଭାବରେ ଜନମାନସକୁ ବିଭ୍ରାନ୍ତିକର ଖବର ପ୍ରକାଶ ପାଇଥିଲାବେଳେ , ଏହା ପଛର ପ୍ରକୃତ ସତ୍ୟ ଭିନ୍ନପ୍ରକାରର ଥିଲା ।

ସଂପ୍ରତି ତୁରେକେଲା ଓ କଣ୍ଟାବାଞ୍ଜି ଅଞ୍ଚଳରେ ଏପରି ଏକ ଠକେଇର ଯୋଜନା ଆରମ୍ଭ ହୋଇଥିବାର ସୂଚନା ମିଳିଛି । ଏଣୁ ଏଭଳି ମିଛ ଦାଦନଶ୍ରମିକ ଉଦ୍ଧାର ଓ ସମାଜସେବୀଙ୍କ କାର୍ଯ୍ୟକଳାପ ପ୍ରତି ଜିଲ୍ଲାର ଗୋଇନ୍ଦାପୁଲିସ୍ ର ସତର୍କ ଦୃଷ୍ଟି ପଡୁ ବୋଲି ବୁଦ୍ଧିଜିବୀ ମହଲରୁ ଦାବି ହେଉଛି ।