24-Jan-2023

ବଲାଙ୍ଗିର(ପ୍ରେରଣା ଖବର),-ବଲାଙ୍ଗୀର ସହରର ମଧ୍ୟଭାଗରେ ଥିବା ଐତିହାସିକ କୋସଳକଳାମଣ୍ଡଳ ପଡିଆର ସୁରକ୍ଷା ଆମସମସ୍ତଙ୍କର ଦାୟୀତ୍ୱ । ଲୋକଉତ୍ସବର ମଞ୍ଚରେ ସମସ୍ତେ ବିକାଶ ପାଇଁ ଏକ ହୁଅନ୍ତୁ କିନ୍ତୁ ମଞ୍ଚରୁ ରାଜନୀତି କରାନଯାଉ ବୋଲି ବଲାଙ୍ଗୀର ଲୋକଉତ୍ସବ-୨୦୨୩ର ୪ର୍ଥ ସଂଧ୍ୟାରେ ମୁଖ୍ୟଅତିଥି ଭାବରେ ଯୋଗଦେଇ ବଲାଙ୍ଗୀର ବିଧାୟକ ନରସିଂହ ମିଶ୍ର ମତ ଦେଇଛନ୍ତି । ସେ ଆହୁରି କହିଛନ୍ତି ଯେ,ଜିଲ୍ଲାପାଳ ଲୋମହୋତ୍ସବକୁ ସଫଳତାର ସହିତ କରିଛନ୍ତି । ରାଜ୍ୟସରକାର ଜିଲ୍ଲାକୁ ଅନେକ ଅନୁଦାନ ଦେଇଛନ୍ତି କିନ୍ତୁ ତାହା ଖର୍ଚ୍ଚ ନହୋଇ ପଡିରହିଛି । ଜିଲ୍ଲାର ବିକାଶପ୍ରକଲ୍ପକୁ ଅଟକାନଯାଉ ବୋଲି ଶ୍ରୀ ମିଶ୍ର କହିଛନ୍ତି । ଜିଲ୍ଲା ଉନ୍ନୟନଅଧିକାରୀ ସୁଶାନ୍ତ ସିଂଙ୍କ ସଭାପତିତ୍ୱ ଓ ଅଭ୍ୟର୍ଥନା କମିଟିର ସହଅଧ୍ୟକ୍ଷ ଚିତ୍ତରଂଜନ ଦାସଙ୍କ ସଂଯୋଜନାରେ ଅନୁଷ୍ଠିତ ଏହି କାର୍ଯ୍ୟକ୍ରମରେ ସମ୍ମାନୀତ ଅତିଥି ଭାବରେ  ୧୮୯ ସିଆରପିଏଫ ବାଟାଲିଅନର କମାଣ୍ଡାଣ୍ଟ ପୱନ ତିୱାରୀ,ବିଶିଷ୍ଟ ନାଟ୍ୟ ନିର୍ଦ୍ଦେଶକ ବ୍ରଜମୋହନ ମିଶ୍ର,ଅତିଥି କଳାକାର ଭାବରେ ଲୋକଗିତିକାର ଭୀକାରୀଚରଣ ମିଶ୍ର ଯୋଗଦେଇଥିଲେ । ନାଟ୍ୟକାର ବ୍ରଜମୋହନ କୋସଳକଳାମଣ୍ଡଳ ପଡିଆର ଆଇନଗତ

ଲଢେଇରେ ସ୍ୱର୍ଗତ ଶରତଚନ୍ଦ୍ର ପାଣିଗ୍ରାହୀ ନେଇଥିବା ଭୂମୀକାକୁ ସ୍ମରଣ କରାଇଥିଲେ । ସେହିପରି ସିଆରପିଏଫ କମାଣ୍ଡାଣ୍ଟ ଶ୍ରୀ ତିୱାରୀ ତାଙ୍କ ବକ୍ତବ୍ୟରେ ବଲାଙ୍ଗୀରର କଳାସଂସ୍କୃତିକୁ ମହାନ ବୋଲି କହିଥିଲେ । ଲୋକସଂସ୍କୃତିର ସୁରକ୍ଷା ଆମର ପ୍ରାଥମିକତା ରହିଛି ବୋଲି ଅଧ୍ୟକ୍ଷତା କରୁଥିବା ଜିଲ୍ଲା ଉନ୍ନୟନ ଅଧିକାରୀ ସୁଶାନ୍ତ ସିଂ କହିଥିଲେ । ଏହି ଅବସରରେ ବିଶିଷ୍ଟ ବଂଶୀବାଦକ ରଞ୍ଜନ ପଟ୍ଟନାୟକଙ୍କୁ ଲୋକଉତ୍ସବ ସମିତି ପକ୍ଷରୁ ସମ୍ବର୍ଦ୍ଧିତ କରାଯାଇଥିଲା । ସେହିପରି ହକି ବିଶ୍ୱକପ ପାଇଁ କରାଯାଇଥିବା ବିଭିନ୍ନ ପ୍ରତି ଯୋଗୀତାରେ କୃତୀତ୍ୱ ହାସଲ କରିଥିବା ପ୍ରତିଯୋଗୀଙ୍କୁ ମଧ୍ୟ ପୁରସ୍କୃତ କରାଯାଇଥିଲା ।  ଲୋକମହୋତ୍ସବ କମିଟିର ସଂଗୀତା ଦାସ ସ୍ୱାଗତ ଅଭିଭାଷଣ ପ୍ରଦାନ କରିଥିବା ବେଳେ ଶେଷରେ ଜିଲ୍ଲା ସଂସ୍କୃତି ଅଧିକାରୀ ରଶ୍ମୀରଂଜନ ମିଶ୍ର ଧନ୍ୟବାଦ ଅର୍ପଣ କରିଥିଲେ । ସଭା ପୂର୍ବରୁ ସ୍ଥାନୀୟ କଳାକାରମାନଙ୍କ ଦ୍ୱାରା ସାଂସ୍କୃତିକ ବିଚିତ୍ର କାର୍ଯ୍ୟକ୍ରମ କରାଯାଇଥିଲା ।

ରାତି ୮ଟାରୁ ସାଂସ୍କୃତିକ କାର୍ଯ୍ୟକ୍ରମ ଅନୁଷ୍ଠିତ ହୋଇଥିଲା ଯେଉଁଥିରେ ରାଜ୍ୟ ତଥା ରାଜ୍ୟ ବାହାରର କଳାକାର ଯୋଗଦେଇଥିଲେ । ଏଥିରେ ବଲାଙ୍ଗୀରର ନଟରାଜ କଳାପରିଷଦ,ଦୁଲଦୁଲି କଳାପରିଷଦ,ଜୟ ଦୁର୍ଗା କଳାପରିଷଦ,କଳାଧାମ,ରାଜସ୍ଥାନର ଫଗ ନୃତ୍ୟ,ଆସାମର ତିଆ,ପଞ୍ଜାବର ଭାଙ୍ଗଡା,ପାଟଣାଗଡର ସାତକୁଆଁରି,ତୁଷୁରାର କୃଷ୍ଣପ୍ରୀୟା କଳାପରିଷଦ,ଜିଲ୍ଲା ସଂସ୍କୃତି ପରିଷଦ ସୁବର୍ଣ୍ଣପୁରର କଳାକାର ଯୋଗଦେଇ ତାଙ୍କର କଳାପ୍ରଦର୍ଶନ କରିଥିଲେ ।

ଆଜି ଅର୍ଥାତ ୨୪ ତାରିଖ ଦିନ କଳାମଣ୍ଡଳ ପଡିଆରେ ଅନୁଷ୍ଠିତ ହେବାକୁ ଥିବା ଷ୍ଟାର୍ ନାଇଟ୍‌କୁ ଦର୍ଶକ ଉପଭୋଗ କରିବେ ବୋଲି ଆଶା କରାଯାଉଛି । କଣ୍ଠ ଶିଳ୍ପି ଅସୀମା ପଣ୍ଡା ଓ ପଙ୍କଜ ଜାଲଙ୍କ ଗୀତ ଓ ସଙ୍ଗୀତ କାର୍ଯ୍ୟକ୍ରମ ଆଜି ସଂଧ୍ୟାର ମୁଖ୍ୟ ଆକର୍ଷଣ ହେବ ।