22-Jan-2023

ସମ୍ବଲପୁର,( ସଂଜୀବ ପାଣିଗ୍ରାହୀ)
 ସମ୍ବଲପୁରର ଅଗ୍ରଣୀ ସାହିତ୍ୟ ଅନୁଷ୍ଠାନ ‘ଅନ୍ୟା’ ପକ୍ଷରୁ ଆଜି ସମ୍ବଲପୁର କଳାକେନ୍ଦ୍ର ସଭାକକ୍ଷଠାରେ ପ୍ରଥମ ମଙ୍ଗଳୁ ଚରଣ ବିଶ୍ୱାଳ ସ୍ମାରକୀ ବକ୍ତୃତାମାଳା ଆୟୋଜିତ ହୋଇ ଯାଇଛି। ପ୍ର. ପ୍ରଦୀପ କୁମାର ପଣ୍ଡାଙ୍କ ସଭାପତିତ୍ୱରେ ଆୟୋଜିତ ଏହି ସଭାରେ ମୁଖ୍ୟବକ୍ତା ଭାବରେ ଯୋଗଦେଇ ପ୍ରଫେସର କେଶରଂଜନ ପ୍ରଧାନ ମଙ୍ଗଳୁ ଚରଣ ବିଶ୍ୱାଳଙ୍କୁ ଏକ ମାନବବାଦୀ ସାହିତ୍ୟିକ ଭାବରେ ଅବିହିତ କରି ତାଙ୍କ ନାଟକରେ କିଭଳି ମାନବୀୟ ମୂଲ୍ୟବୋଧର ସାତ୍ତ୍ୱିକ ଦୃଷ୍ଟି ରହିଛି ସେ ସମ୍ପର୍କରେ ଆଲୋଚନା କରି କହିଥିଲେ ଯେ, ନାଟକର ଅନ୍ତଃସ୍ୱରକୁ ନିର୍ଦେଶକଙ୍କ ଋଚି ଅନୁସାରେ ଦିଗ ପରିବର୍ତ୍ତନ କରିପାରେ।‘ଭୁଖା’ ନାଟକର ଅନ୍ତଃସ୍ୱର ଏକମାତ୍ର ଲୋକ ସଂସ୍କୃତି ନୁହେଁ ତା ମଧ୍ୟରେ ନିଖୁଣ ଭାବରେ ସମାଜ ଚେତନା ଭରି ରହିଛି।ମଣିଷକୁ ଭଲପାଉଥିବା ସାହିତ୍ୟିକ ମଣିଷର କଥା କହେ ଏବଂ ସେଠାରେ ଜାତିବାଦ ଭଳି ପ୍ରସଙ୍ଗ ଗୁରୁତ୍ତ୍ବପୂର୍ଣ୍ଣ ହୋଇ ରହେନାହିଁ ବୋଲି ସେ ବିଭିନ୍ନ ଦୃଷ୍ଟାନ୍ତ ଉଦ୍ଧାର କରି ମତବ୍ୟକ୍ତ କରିଥିଲେ। ଉଭୟ ଓଡିଆ ଓ ସମ୍ବଲପୁରୀ ସାହିତ୍ୟରେ ଉଚ୍ଚାଙ୍ଗ ସାହିତ୍ୟ ସୃଷ୍ଟି କରିଥିବା ସତ୍ତ୍ୱେ ଉଭୟ ସାହିତ୍ୟ ଜଗତରେ ସେ ଯେଭଳି ସମ୍ମାନ ପାଇବା କଥା ସେଥିରୁ ସେ ବଂଚିତ ବୋଲି ମତ ପ୍ରକାଶ କରିଥିଲେ।ସଭାରେ ମଙ୍ଗଳୁ ଚରଣ ସାହିତ୍ୟ ଗବେଷକ ଡ. ଗୌରିଦାସ ପ୍ରଧାନ ତାଙ୍କ ବକ୍ତବ୍ୟରେ କହିଥିଲେ ଯେ, ମଙ୍ଗଳୁ ଚରଣଙ୍କ ସାହିତ୍ୟର ପ୍ରତ୍ୟେକ ଦିଗ ଉପରେ ବ୍ୟାପକ ଆଲୋଚନା କରାଯାଇ ପାରିବ।କେବଳ ନାଟକ କାହିଁକି ତାଙ୍କର  ପ୍ରବନ୍ଧ,କଥାସାହିତ୍ୟ, କବିତା,ଆତ୍ମଜୀବନୀ ଭଳି ଯେତେକ ସାହିତ୍ଯ ସର୍ଜନା ରହିଛି ସବୁ ଉଚ୍ଚାଙ୍ଗ ଓ ପ୍ରାଣବନ୍ତ ସୃଷ୍ଟି। ସଭାରେ ଡ.ଶ୍ୟାମସୁନ୍ଦର ଧର ମଧ୍ୟ ମଙ୍ଗଳୁ ଚରଣଙ୍କ ‘ଭୁଖା’ ଓ ଏହାର ସଫଳତା ଉପରେ ଆଲୋଚନା କରିବା ସହ ଏହି ନାଟକର ଏକ ଗୀତ ଗାନ କରିଥିଲେ।

ସଭା ପ୍ରାରମ୍ଭରେ ସମ୍ବଲପୁରର ଲୋକପ୍ରିୟ କଳାକାର ଚନ୍ଦ୍ରଶେଖର ଦୁବେ(ପିଣ୍ଟୁ) ଓ ବରିଷ୍ଠ ବଂଶୀବାଦକ ନବୀନ ଚନ୍ଦ୍ର ବୋଷ ଙ୍କ ଅମର ଆତ୍ମାର ସଦ୍‌ଗତି କାମନା କରି ନିରବ ପ୍ରାର୍ଥନା କରାଯାଇଥିଲା। ଡ. ସିଦ୍ଧାର୍ଥ ପଣ୍ଡା ପ୍ରାରମ୍ଭିକ ସୂଚନା ପ୍ରଦାନ ସହ ଧନ୍ୟବାଦ ଅର୍ପଣ କରିଥିଲେ। ସଭାରେ ଡ. ଦ୍ୱାରିକାନାଥ ନାୟକ,ସୌଭାଗ୍ୟବନ୍ତ ମହାରଣା,ପ୍ର. ସୁଦର୍ଶନ ପୂଜାରୀ, ଚିତ୍ରସେନ ମିଶ୍ର,ସଂଜୟ ମିଶ୍ର,ସରୋଜ ଦାଶ,ଦୁର୍ଗାପ୍ରସାଦ ପଣ୍ଡା,ସରୋଜ ମହାନ୍ତି,ସୁଶୀଲ ତ୍ରିପାଠୀ,କାଳିନ୍ଦୀ ପ୍ରତାପ ସିଂ,ପ୍ରଶାନ୍ତ ମାଝୀ ପ୍ରମୁଖ ମାନ୍ୟଗଣ୍ୟ ବକ୍ତି ଉପସ୍ଥିତ ଥିଲେ। ବୃନ୍ଦାବନ ମିଶ୍ର,କମଳଲୋଚନ ପଣ୍ଡା କାର୍ଯ୍ୟକ୍ରମରେ ସହଯୋଗ କରିଥିଲେ।