04-Dec-2020

(ପ୍ରେରଣା ଖବର)  ମୁମ୍ବାଇ :  ଏନଫୋର୍ସମେଣ୍ଟ ଡାଇରେକ୍ଟରେଟ୍ ବା ଇଡି ପକ୍ଷରୁ ପଳାତକ ମଦ ବ୍ୟବସାୟୀ ବିଜୟ ମାଲ୍ୟାର ଫ୍ରାନ୍ସରେ ଥିବା  ୧.୬ ନିୟୁତ ୟୁରୋ ମୂଲ୍ୟର ସମ୍ପତ୍ତିକୁ ଜବତ କରାଯାଇଛି ।ଇଡି ପକ୍ଷରୁ କୁହାଯାଇଛି ଯେ, ଫ୍ରାନ୍ସର ୩୨ ଆଭେନ୍ୟୁ, ଏଫଓସିଏଚରେ ଥିବା ଏକ କୋଠାକୁ ଫ୍ରାନ୍ସ ସରକାରଙ୍କ ପକ୍ଷରୁ ଜବତ କରାଯାଇଛି । ଇଡିର ଅନୁରୋଧ କ୍ରମେ ଫ୍ରାନ୍ସ ସରକାରଙ୍କ ପକ୍ଷରୁ ଏହି ପଦକ୍ଷେପ ନିଆଯାଇଛି । ଜବତ ହୋଇଥିବା ଏହି ସମ୍ପତ୍ତିର ମୂଲ୍ୟ ୧.୬ ନିୟୁତ ୟୁରୋ (ପ୍ରାୟ ୧୪ କୋଟି ଟଙ୍କା ) ହେବ ବୋଲି ଆକଳନ କରାଯାଇଛି ।ଇଡି ପକ୍ଷରୁ କୁହାଯାଇଛି ଯେ, ଏପର୍ଯ୍ୟନ୍ତ ବିଜୟ ମାଲ୍ୟାର ମୋଟ ପ୍ରାୟ ୧୧,୨୩୧ କୋଟିର ସମ୍ପତ୍ତିକୁ ଜବତ କରାଯାଇଛି ।ଏଠାରେ ଉଲ୍ଲେଖଯୋଗ୍ୟ ଯେ, ବ୍ୟାଙ୍କରୁ ପ୍ରାୟ ୯ ହଜାର କୋଟିର ଋଣ ଖିଲାପ କରି ବିଜୟ ମାଲ୍ୟା ଭାରତରୁ ଫେରାର ହୋଇଯାଇଛି । ସେ ୨୦୧୬ ମାର୍ଚ୍ଚ ମାସରୁ ଲଣ୍ଡନରେ ରହୁଛି । ଲଣ୍ଡନରୁ ଭାରତକୁ ପ୍ରତ୍ୟାର୍ପଣ କରିବାକୁ ଭାରତ ସରକାର ଲଣ୍ଡନରେ ଆଇନଗତ ମାମଲା ଲଢୁଛନ୍ତି । ବ୍ରିଟିଶ କୋର୍ଟ ମାଲ୍ୟାଙ୍କୁ ଭାରତ ପ୍ରତ୍ୟାର୍ପଣ ପାଇଁ ନିର୍ଦ୍ଦେଶ ଦେଇସାରିଥିବା ସତ୍ତ୍ବେ କେତେକ ଆଇନଗତ ଓ ପ୍ରକ୍ରିୟାଗତ ଜଟିଳତା ପାଇଁ ଏପର୍ଯ୍ୟନ୍ତ ପ୍ରତ୍ୟାର୍ପଣ ହୋଇପାରିନାହିଁ । ଏହି ଆଇନଗତ ଜଟିଳତାର ସମାଧାନ ନ ବାହାରିବା ପର୍ଯ୍ୟନ୍ତ ମାଲ୍ୟାକୁ ପ୍ରତ୍ୟାର୍ପଣ କରାଯାଇପାରିବ ନାହିଁ ବୋଲି ବ୍ରିଟିଶ ସରକାର କହିଛନ୍ତି ।