09-Jan-2023

ସୋନପୁର (ମଳୟ ମିଶ୍ରଙ୍କ ରିପୋର୍ଟ ) ସୁବର୍ଣ୍ଣପୁର ଜିଲ୍ଲାର ବିନିକା ନିକଟସ୍ଥ ଅରିଗାଁର ଏକ ଘରୋଇଉଦ୍ୟୋଗର ଗୋଦାମରେ ୧୦ ହଜାରରୁ ଉର୍ଦ୍ଧ୍ବ କୁଇଣ୍ଟାଲ ସରକାରୀ ଚାଉଳ ସର୍ଟେଜ୍ ଅନିୟମିତତାକୁ ଢାଙ୍କିବାକୁ ଜାଣିଶୁଣି ଗୋଦାମର ଚାଉଳରେ ନିଆଁ ଲଗାଇ ପୋଡିଦିଆଯିବା ଓ ତନାଘନା ପରେ ସଙ୍ଗେ ସଙ୍ଗେ ଉକ୍ତ ଚାଉଳର ଭରଣା କରିଦିଆଯିବା ସହ ବିଳମ୍ବରେ ଯୋଗାଣ ବିଭାଗର ଥାନାରେ ଏତଲା ସହ ଗୋଦାମମାଲିକ ଗୋଦାମ ଜାଗାକୁ ବିକିଦେଇ ଫେରାର୍ ହୋଇଯିବା ଇତ୍ୟାଦି କାଣ୍ଡକାରଖାନା ସତ୍ତ୍ୱେ ଜିଲ୍ଲାପାଳ ସଫେଇ ଦେଲାପରି ପ୍ରକାଶ କରିବା ଘଟଣାରେ ଜନସାଧାରଣଙ୍କ ମଧ୍ୟରେ ସନ୍ଦେହ ସୃଷ୍ଟି ହେବା ସ୍ବାଭାବିକ୍ ।  ଏହା ପଛରେ ସେଠାରେ ନିୟମିତ ଭାବରେ ସରକାରୀ ଯୋଜନାର ଚାଉଳର ରିସାଇକ୍ଲିଂ ହୋଇଆସୁଥିବା ଓ ଏହା ରାଜନୈତିକ ପୃଷ୍ଠପୋଷକତାରେ ଯୋଗାଣ ବିଭାଗ ସମେତ ଜିଲ୍ଲାପ୍ରଶାସନର ସମ୍ପୂର୍ଣ୍ଣ ଜ୍ଞାତସାରରେ ହୋଇଚାଲିଥିବା ଜନସନ୍ଦେହର ଏକ ନିରପେକ୍ଷ ଉଚ୍ଚସ୍ତରୀୟ ତଦନ୍ତ ଆବଶ୍ୟକ ବୋଲି ଜନସାଧାରଣ ଦାବି କରନ୍ତି । ତେବେ ବିରୋଧୀଦଳଗୁଡିକ ଦୁର୍ବଳ ହୋଇପଡିଥିବାରୁ ଜିଲ୍ଲାରେ ବର୍ଷ ବର୍ଷ ଧରି ଏପରି ନିରଙ୍କୁଶ ଦୁର୍ନୀତି ସମ୍ଭବ ହେଉଛି । 

କିପରି ଜଣେ ବାହାର ଜିଲ୍ଲାର ବ୍ୟକ୍ତି ଆସି ଏଠାରେ ଏଭଳି ଦୁର୍ନୀତି କରିବା ଉଦ୍ଦେଶ୍ୟରେ ଏକ ପିଇଜି ଗୋଦାମ କରିଥିଲେ ଓ ସେଠାରେ  ମିଲ୍ ମାନଙ୍କର ସହଯୋଗରେ ବିଭିନ୍ନ ସ୍ଥାନକୁ ଚାଉଳ ପଠାଇବାର ଦାୟିତ୍ୱ ତାଙ୍କୁ ପ୍ରଦାନ କରାଯାଇଥିବା ସତ୍ତ୍ୱେ  ସମୟାନୁଯାୟୀ ଆଦୌ ଯାଞ୍ଚ ତଦାରଖ କରାଯାଉ ନଥିଲା , ଯୋଗାଣ ବିଭାଗ ବା ପ୍ରଶାସନର ଏପରି ଦାୟିତ୍ୱହୀନତା ଆଶ୍ଚର୍ଯ୍ୟଜନକ ! କଥିତ ଅନୁଯାୟୀ ପ୍ରାୟ ସାଢେ ୩ କୋଟିଟଙ୍କା ମୂଲ୍ୟର ୧୦ହଜାର କୁଇଣ୍ଟାଲରୁ ଉର୍ଦ୍ଧ୍ବ ସରକାରୀ ଚାଉଳର ସର୍ଟେଜ୍ ଓ ଏହାକୁ ଢାଙ୍କିବାକୁ ସରକାରୀ ଚାଉଳଥିବା ଗୋଦାମରେ ନିଆଁ ଲଗାଇଦେବା ଭଲି ଅପରାଧିକ କାର୍ଯ୍ୟକଳାପ ସହ ମୁଣ୍ଡରୁ ଦୋଷ ଖସାଇବାକୁ ସ୍ଥାନ ବିକ୍ରିକରି ପଳାଇବା ଠକେଇର ତଦନ୍ତ ପାଇଁ ସ୍ଥାନୀୟ ପ୍ରଶାସନ ଓ ରାଜନେତାଙ୍କ ସମ୍ପୃକ୍ତି ସନ୍ଦେହ ଯୋଗୁଁ ଉଚ୍ଚସ୍ତରୀୟ ତଦନ୍ତକାରୀ ସଂସ୍ଥା ସିବିଆଇକୁ ସରକାର ଦାୟିତ୍ୱ ଦେବା ଆବଶ୍ୟକ ବୋଲି ଜନମତ ପ୍ରକାଶ ପାଇଛି । ଏଥିରେ ଜିଲ୍ଲାପାଳ ଓ ସ୍ଥାନୀୟ ବିଧାୟକ ତଥା ମନ୍ତ୍ରୀଙ୍କ ଭୂମିକା ମଧ୍ୟ ଜନସାଧାରଣଙ୍କ ଆଲୋଚନାରୋ ସନ୍ଦେହ ଘେରକୁ ଆସିଯାଇଛି । ସୁବର୍ଣ୍ଣପୁର ଜିଲ୍ଲାର ବିରୋଧୀଦଳଗୁଡିକ ପକ୍ଷରୁ ଏହାର ଉପଯୁକ୍ତ ତଦନ୍ତ ଦାବିରେ ଜନସାଧାରଣଙ୍କ ସହଯୋଗରେ ଆନ୍ଦୋଳନର ଆବଶ୍ୟକତା ରହିଛି ।