14-Dec-2022

ବଲାଙ୍ଗିର,(ପ୍ରେରଣା ଖବର)-ମଙ୍ଗଳବାର ଦିନ ପୁଇଁତଳା ବ୍ଲକଅଞ୍ଚଳର ପେକ୍ସମାନଙ୍କୁ ପରଦର୍ଶନ ସମୟରେ ବିଜେଡିଦଳର କର୍ମୀ ମାନେ ଲୋଇସିଂହା ବିଧାୟକ ଡ.ମୁକେଶ ମହାଲିଙ୍ଗଙ୍କୁ ଅଣ୍ଡାମାଡ କରିବା ସହିତ ଦୁଇଜଣ ବିଜେପିକର୍ମିଙ୍କୁ ମାଡମାରିଥିଲେ । ଏନେଇ ପୁଇଁତଳା ଥାନାରେ ଏତଲା ହୋଇଥିଲା । ଦୁଇଜଣ ଅଭିଯୁକ୍ତ ଗିରଫ ମଧ୍ୟ ହୋଇଥିଲେ । ତେବେ ଜଣେ ନିର୍ବାଚିତ ବିଧାୟକ ଲୋକଙ୍କ ସମସ୍ୟା ବୁଝିବା ପାଇଁ ଯାଇଥିବା ବେଳେ ବିଜେଡିଦଳର ଜଣେ ପେକ୍ସ ସଭାପତି ତାଙ୍କ ସମର୍ଥକଙ୍କୁ ଧରି ବିଧାୟକଙ୍କୁ ଆକ୍ରମଣ କରିବା ଘଟଣାକୁ ଭାଜପା ତୀବ୍ର ନିନ୍ଦା କରିଛି । ଆଜି ବଲାଙ୍ଗୀର ସହରରେ ଜିଲ୍ଲା ଭାଜପା ପକ୍ଷରୁ ଏକ ରାଲି କରାଯାଇ ଏସପି ନୀତିନ କୁସଲକରଙ୍କୁ ଭେଟି ଏକ ଦାବିପତ୍ର ପ୍ରଦାନ କରିଛି । ବିଧାୟକଙ୍କୁ ଆକ୍ରମଣ କରିଥିବା ସମସ୍ତ ଅଭିଯୁକ୍ତଙ୍କୁ ଗିରଫ କରିବା ଓ ତାଙ୍କ ବିରୁଦ୍ଧରେ ୩୦୭ ଦଫାରେ ମାମଲା ରୁଜୁ କରାଯିବାର ଦାବି କରାଯାଇଛି । ଆଜି ଦିନ ୧୨ଟା ସମୟରେ ଭାଜପା ଜିଲ୍ଲା ସଭାପତି ଶୀବାଜୀ ମହାନ୍ତିଙ୍କ ନେତୃତ୍ୱରେ ଅନୁଷ୍ଠିତ ଏହି ପ୍ରତିବାଦ ରାଲିରେ ଲୋଇସିଂହା ବିଧାୟକ ଡ.ମୁକେଶ ମହାଲିଙ୍ଗ,ମହିଳାମୋର୍ଚ୍ଚା ସଭାନେତ୍ରୀ ପଙ୍କଜୀନି ପଣ୍ଡା,ବରିଷ୍ଠନେତା ପ୍ରଭାସ ପାଣିଗ୍ରାହୀ,ଅନନ୍ତ ଦାସ,ମାଧବ ସାଏ,ଟିଟିଲାଗଡ ନିର୍ବାଚନମଣ୍ଡଳିର ମହେନ୍ଦ୍ର ଠାକୁର,ନବୀନ ଜୈନ,ମୁକେଶ ଜୈନ,ନରସିଂ ସିଂ,ଅଜିତ ପଣ୍ଡା,ରଂଜିତା ପାଣିଗ୍ରାହୀ,ପିତାମ୍ବର ଖମାରୀ,ରାଜକିଶୋର ନାଏକ,ମନୋଜ ପଟେଲ,ଗୌରାଙ୍ଗ ନାଏକ,ଅନୀଳ ପାଣିଗ୍ରାହୀ,ସୁନିଳ ମିଶ୍ର ପ୍ରମୁଖଙ୍କ ନେତୃତ୍ୱରେ ଶତାଧିକ କାର୍ଯ୍ୟକର୍ତ୍ତା ଯୋଗଦେଇଥିଲେ । ଜିଲ୍ଲା ଭାଜପା ସଭାପତି ତାଙ୍କ ପ୍ରତିକ୍ରୀୟାରେ କହିଛନ୍ତି ଯେ,ଶାସକ ବିଜେଡିଦଳ ମିଲର୍ସମାନଙ୍କ ସହିତ ମଧୁଚନ୍ଦ୍ରୀକା କରି ଚାଷିଙ୍କୁ ଶୋଷଣ କରୁଛନ୍ତି । ମଣ୍ଡି ହ୍ୟାଣ୍ଡଲିଂ,ଅଖା,ସୁତୁଲି ତଥା ମଣ୍ଡି କଟନୀ ଇତ୍ୟାଦି ଦୁର୍ନିତୀରେ ବିଜେଡିଦଳ ଭାଗ ଖାଉଛି । ସେଥିପାଇଁ ଜଣେ ନିର୍ବାଚିତ ଭାଜପା ବିଧାୟକ ମଣ୍ଡି ପରିଦର୍ଶନ କଲାବେଳେ ତାଙ୍କର ଅସଲ ମୁଖା ଖୋଲିଯାଉଛି । ତେଣୁ ଜଣେ ପେକ୍ସ ସଭାପତି ଗୁଣ୍ଡାଧରି ବିଧାୟକଙ୍କୁ ତାଙ୍କ ସାମ୍ବିଧାନୀକ ଅଧିକାରରୁ ବଞ୍ଚିତ କରିବାକୁ ହୀନ ପ୍ରୟାସ କରିଛନ୍ତି ବୋଲି କହି ବିଧାୟକଙ୍କୁ ଆକ୍ରମଣ କରିଥିବା ଅଭିଯୁକ୍ତଙ୍କ ବିରୁଦ୍ଧରେ କାର୍ଯ୍ୟାନୁଷ୍ଠାନ ଦାବି କରିଛନ୍ତି ।