10-Dec-2022

ନୂଆଦିଲ୍ଲୀ: ଦିଲ୍ଲୀରେ ରାଜନୈତିକ ଡ୍ରାମ ଆରମ୍ଭ ହୋଇଯାଇଛି । ଦିଲ୍ଲୀ ଏମସିଡି ଫଳାଫଳ ଆସିବା କିଛି ସମୟ ପରେ କଂଗ୍ରେସର ୨ଜଣ ପାର୍ଷଦ ସବିଲା ବେଗମ ଓ ନାଜିଆ ଖାତୁନ ଆପରେ ମିଶିଥିଲେ । ଫଳରେ ଆପର ସଂଖ୍ୟା ୧୩୬ରେ ପଂହଚି ଯାଇଥିଲା । ତେବେ ଏହାର କିଛି ଘଂଟା ପରେ ଉକ୍ତ ୨ ପାର୍ଷଦ ଏବଂ ଦିଲ୍ଲୀ କଂଗ୍ରେସ ଉପାଧ୍ୟକ୍ଷ ଅଲୀ ମେହେଦି କ୍ଷମା ମାଗି ନିଜ ଦଳକୁ ପ୍ରତ୍ୟାବର୍ତନ କରିଛନ୍ତି । ମେହେଦି କହିଛନ୍ତି, ମୁଁ ରାହୁଲ ଗାନ୍ଧୀ ଓ ପ୍ରିୟଙ୍କା ଗାନ୍ଧୀଙ୍କ କାର୍ଯ୍ୟକର୍ତା ଥିଲି ଏବଂ ରହିବି । ଦିଲ୍ଲୀରେ ତାଙ୍କର ଏହି ନିଷ୍ପତିକୁ ଦଳର କର୍ମକର୍ତାମାନେ ତୀବ୍ର ବିରୋଧ କରିଥିଲେ । ଫଳରେ ଦଳକୁ ଫେରିବା ବ୍ୟତୀତ ସେମାନଙ୍କ ପାଖରେ କୌଣସି ବିକଳ୍ପ ନ ଥିଲା । ଏପରିକି ସେ ଭିଡିଓ ମାଧ୍ୟମରେ ସର୍ବସମ୍ମୁଖରେ କ୍ଷମା ମାଗିଥିଲେ ।

ସେମାନେ ଫେରି ଆସିବା ପରେ ଆପ ସିଟ ପୁନର୍ବାର ୧୩୪କୁ ଖସି ଆସିଥିଲା । ସୂଚନାଯୋଗ୍ୟ, ଦିଲ୍ଲୀ ନଗର ନିଗମରେ ୧୫ ବର୍ଷ ଧରି ରାଜୁତି କରୁଥିବା ବିଜେପି ହଟେଇ ଆପ କ୍ଷମତାକୁ ଆସିଛି । ୨୫୦ ସିଟରୁ ଆପକୁ ୧୩୪, ବିଜେପି ୧୦୪ ଓ କଂଗ୍ରେସ ୯ ସିଟ ହାସଲ କରିଥିଲେ । ୩ଟି ସିଟ ନିର୍ଦ୍ଦଳୀୟଙ୍କ ହାତକୁ ଯାଉଛି । ଆଗକୁ ମେୟର ନିର୍ବାଚନ ଥିବାରୁ ଆପ ଅଧିକରୁ ଅଧିକ ପାର୍ଷଦ ନିଜ ଆଡକୁ ଆଣିବାକୁ ଚେଷ୍ଟା କରୁଛି । ଅପରପକ୍ଷରେ ବିଜେପି ମଧ୍ୟ କିଛି ଅସମ୍ଭବ ନୁହେଁ ବୋଲି କହିଛି ।