02-Dec-2020

ଭୁବନେଶ୍ୱର,(ପ୍ରେରଣା ଖବର) :  ଆୟ ବର୍ହିଭୂତ ସମ୍ପତ୍ତି ଠୁଳ ଅଭିଯୋଗରେ ଗିରଫ ଆଇଏଫଏସ ଅଭୟକାନ୍ତ ପାଠକଙ୍କ ଅମାପ ସମ୍ପତ୍ତିର ଖୋଳତାଡ଼ କରୁଛି ଭିଜିଲାନ୍ସ ।  ଧୀରେ ଧୀରେ ପାଠକ ଓ ଗୋପାଳପୁର ବିଧାୟକ ପ୍ରଦୀପ ପାଣିଗ୍ରାହୀ ଙ୍କ ପେଡ଼ି ମଧ୍ୟ ଖୋଲୁଛି ।  ତେବେ  ଏହା ଭିତରେ ଏକ ବଡ଼ ଖବର ସାମନାକୁ ଆସିଛି । ତାହା ହେଲା ଅଭୟକାନ୍ତ ପାଠକଙ୍କ ପୁଅ ଆକାଶଙ୍କ ସହ ଚାର୍ଟର ପ୍ଲେନରେ ଉଡ଼ିଥିଲେ  ଓଡ଼ିଶା ମୋ ପରିବାର ମୁଖ୍ୟ ତଥା ବିଜେଡି ନେତା ଅରୂପ ପଟ୍ଟନାୟକ ।  ଏକଥା ଆମେ କହୁନାହୁଁ ।  ଏକଥା କହିଛନ୍ତି ନିକଟରେ ବିଜେଡିରୁ ବହିଷ୍କୃତ ହୋଇଥିବା  ଗୋପାଳପୁର ବିଧାୟକ ତଥା ପୂର୍ବତନ ମନ୍ତ୍ରୀ ପ୍ରଦୀପ ପାଣିଗ୍ରାହୀଙ୍କ ପତ୍ନୀ ସୁଜାତା ପାଣିଗ୍ରାହୀ ।
ଶ୍ରୀମତୀ ପାଣିଗ୍ରାହୀ କହିଛନ୍ତି ଯେ, ଜୁଲାଇ ୧୧ ତାରିଖ ଦିନ ଆକାଶଙ୍କ ସହ ଅରୂପ ପଟ୍ଟନାୟକ ଚାର୍ଟରରେ ଯାଇଥିଲେ ।  ଭୁବନେଶ୍ୱରରୁ ପୁନେ ପର୍ଯ୍ୟନ୍ତ ସମସ୍ତେ ଏକାଠି  ଯାତ୍ରା କରିଥିଲେ ।  ପୁନେରୁ ମୁମ୍ବାଇ ଉକ୍ତ ଚାର୍ଟର ପ୍ଲେନରେ ଅରୂପ  ଏକା ଯାଇଥିଲେ ।  ଆମେ ଚାର୍ଟର ପ୍ଲେନରେ ଗଲୁ, ତାହା ହେଲା ଜନବିରୋଧୀ ।  ଅରୂପ  ପଟ୍ଟନାୟକ ଗଲେ, ସେ କ’ଣ ଜନବିରୋଧୀ ନୁହନ୍ତି ବୋଲି ଶ୍ରୀମତୀ ପାଣିଗ୍ରାହୀ ପ୍ରଶ୍ନ କରିଛନ୍ତି ।  ସେ ସରକାରରେ ଅଛନ୍ତି ବୋଲି ଜନବିରୋଧୀ ନୁହନ୍ତି କି ବୋଲି ଶ୍ରୀମତୀ ପାଣିଗ୍ରାହୀ ପ୍ରଶ୍ନ କରିଛନ୍ତି ।  ସରକାରରୁ ବାହାରିଗଲା ଆମେ ଜନବିରୋଧୀ ହୋଇଗଲୁ ବୋଲି କି ସେ ପ୍ରଶ୍ନ କରିଛନ୍ତି । ତେବେ ସୁଜାତା ପାଣିଗ୍ରାହୀଙ୍କ ଅଭିଯୋଗ ନେଇ ଅରୂପ ପଟ୍ଟନାୟକଙ୍କ ପ୍ରତିକ୍ରୟା ମିଳିପାରିନାହିଁ ।
 ପ୍ରକାଶ ଯେ, ଗୋପାଳପୁର ବିଧାୟକ ତଥା ପୂର୍ବତନ ମନ୍ତ୍ରୀ ପ୍ରଦୀପ ପାଣିଗ୍ରାହୀଙ୍କୁ ବିଜେଡିରୁ ବହିଷ୍କୃତ କରାଯାଇଛି । ବିଜେଡିର ପ୍ରାଥମିକ ସଦସ୍ୟ ପଦରୁ ତାଙ୍କୁ ବହିଷ୍କୃତ କରାଯାଇଛି ।  ପାଠକ ବାପା ପୁଅଙ୍କ ସମ୍ପର୍କକୁ ନେଇ ବିବାଦରେ ଥିବା ଶ୍ରୀ ପାଣିଗ୍ରାହୀଙ୍କୁ ଜନବିରୋଧୀ କାର୍ଯ୍ୟ ପାଇଁ ବିଜେଡିରୁ ବହିଷ୍କୃତ କରାଯାଇଛି ।  ତେବେ ବହିଷ୍କୃତ ପରେ ଦୀର୍ଘ ଅନୁଭୂତିରୁ  ସେ ଦଳର ପରିଚାଳନା ସମ୍ପର୍କରେ ଅନେକ ଗୁମର ଖୋଲିଛନ୍ତି ।