12-Nov-2022

ବଲାଙ୍ଗୀର,-ବାପା ଚାଲିଯିବା ପରେ ଜଣେ ୧୩ବର୍ଷର ଛାତ୍ର ବୁଲିବୁଲି ଖବରକାଗଜ ବାଣ୍ଟି ପରିବାର ବୋଝ ଉଠାଉଥିବା ଖବର ବିଭିନ୍ନ ଗଣମାଧ୍ୟମରେ ପ୍ରକାଶନ ଓ ପ୍ରସାରଣ ପରେ ପ୍ରଶାସନ ଚେତିଛି । ଗତକାଲି ଜିଲ୍ଲା ଶିଶୁ ଅଧିକାର ସୁରକ୍ଷା ୟୁନିଟ ପକ୍ଷରୁ ସେହି ଛାତ୍ରର ପରିବାରକୁ ଭେଟି ତଦନ୍ତ କରିଥିବା ବେଳେ ଆଜି ପୌରାଧ୍ୟକ୍ଷା ଲିକା ସାହୁ ତାଙ୍କ କାଉନସିଲରଙ୍କୁ ଧରି ଛାତ୍ରର ଘରେ ପହଞ୍ଚି ସହାୟତା ପ୍ରଦାନ କରିଛନ୍ତି । ଶ୍ରୀମତି ଲିକା ସାହୁ ଓ ଅନ୍ୟ କାଉନସିଲରମାନେ ନିଜେ ଡୁଙ୍ଗୁରିପଡାର ଉକ୍ତଛାତ୍ରଙ୍କ ଘରେ ପହଞ୍ଚି ତାଙ୍କ ମାଆଙ୍କ ସହିତ ଆଲୋଚନା କରି ୧୦ହଜାର ଟଙ୍କାର ଆର୍ôଥକ ସହାୟତା ଓ ଆଗକୁ ପାଠପଢାଇବାର ପ୍ରତିଶୃତି ଦେଇଛନ୍ତି । ସୂଚନାରୁ ପ୍ରକାଶ ଯେ,ବଲାଙ୍ଗୀର ପୌରପାଳିକାର ୩ନମ୍ବର ୱାର୍ଡର ଡୁଙ୍ଗୁରିପଡାରେ ସିଭିଲ ରାଓ ତାଙ୍କ ପରିବାର ନେରଇ ରହୁଥିଲେ । କିନ୍ତୁ ରୋଗାକ୍ରାନ୍ତ ହୋଇ ସେ ଅରପାରିକୁ ଚାଲିଗଲେ । ଏପଟେ ପରିବାର ଚଳାଇବାର ଚିନ୍ତାରେ ବିଧବାପତ୍ନୀ ସୁନେମିୟା(ଚୁମକି)ମଧ୍ୟ ରୋଗାକ୍ରାନ୍ତ ହୋଇ ଶର୍ଯ୍ୟାଶାୟୀ ହୋଇଗଲେ । ଘରେ ଦୁଇଜଣ ଛୁଆ ଚୁମନ ଓ ଚନ୍ଦନ । ଖାଇବାକୁ ଅନ୍ନ ଯୋଗାଡ ଚିନ୍ତାରେ ପରିବାର ରହିଥିଲେ । ସରକାରଙ୍କ ତରଫରୁ ମାସକୁ ବିଧବାଭତ୍ତା ୫୦୦ଟଙ୍କା ଓ ୧୫କିଲୋ ଚାଉଳ ମିଳୁଛି । ଏଥିରେ ଘର ଚଳାଇବା ସହିତ ପିଲାଙ୍କ ପାଠପଢା ହୋଇପାରିଲା ନାହିଁ । ବାପା ବଞ୍ଚିଥିବା ବେଳେ ବଡ ପୁଅ ଚୁମନ କନଭେଣ୍ଟ ସ୍କୁଲରେ ପଢୁଥିôଲା । ହେଲେ ବାପା ଚାଲିଯିବା ପରେ ସ୍କୁଲର ଫିଦେଇ ପାଠପଢାଇବା ସମ୍ଭବ ହେଲାନାହିଁ । ଶେଷରେ ସରକାରୀ ଟାଉନ ବାଳକ ହାଇସ୍କୁଲରେ ନାମଲେଖା ହେଲା । କିନ୍ତୁ ତଥାପି ଘର ଚଳାଇବା ତଥା ରୋଗିଣା ମାଆର ଚିକିତ୍ସା ପାଇଁ ଅଣ୍ଟା ଭିଡିଲା ୧୩ବର୍ଷର ବଡପୁଅ ଚୁମନ । ଜଣେ ହକରସାଙ୍ଗରେ କଥାବାର୍ତ୍ତା କରି ସକାଳ ୫.୩୦ରୁ ସାଇକେଲରେ ବାହାରି ଘରଘର ବୁଲି ୮ଟା ଯାଏଁ ଖବରକାଗଜ ବାଣ୍ଟିଲା । ପୁଣି ୧୦ଟାରେ ସ୍କୁଲଯାଇ ପାଠପଢା ଓ ସ୍କୁଲରୁ ଫେରିଲା ପରେ ଏକ ସାଇକେଲ ଦୋକାନରେ ସଂଧ୍ୟା ପର୍ଯ୍ୟନ୍ତ କାମ କଲା । ସେଥିରୁ ପ୍ରାୟ ୨୦୦୦ ଟଙ୍କା ରୋଜଗାର କରି ପରିବାର ପୋଷଣ କରୁଛି । ପେପର ବୟ ଚୁମନ ରାଓ(୧୩)ର ଏହି ସଂଘର୍ଷ କାହାଣୀ ବିଭିନ୍ନ ଗଣମାଧ୍ୟମରେ ପ୍ରସାରଣ ଓ ପ୍ରକାଶନ ପରେ ବିଭିନ୍ନ ବଦାନ୍ୟ ବ୍ୟକ୍ତି ଚୁମନ ଓ ଚନ୍ଦନର ପାଠପଢା ଦାୟୀତ୍ୱ ନେବାକୁ ଆଗେଇ ଆସିଛନ୍ତି । ଆଜି ପୌରାଧ୍ୟକ୍ଷା ବରିଷ୍ଠ କାଉନସିଲର ଶମ୍ଭୁ ନାଗ,ସରିତା ଦାସ,ପିଙ୍କି କବାଟ,ଗଙ୍ଗା ଚାନ୍ଦ,ନଳୀନୀ ପୋଢ ପ୍ରମୁଖ ଚୁମନର ଘରକୁ ପହଞ୍ଚି ୧୦ହଜାର ଟଙ୍କାର ସହାୟତା ଦେବା ସହିତ ଆଗକୁ ଉଭୟଙ୍କର ପାଠପଢା ଦାୟୀତ୍ୱ ନେଇଛନ୍ତି । ରୋଗିଣା ଚୁମକିର ଚିକିତ୍ସା ପାଇଁ ମଧ୍ୟ ସିଡିଏମଓଙ୍କ ସହିତ ଆଲୋଚନା କରିବେ ବୋଲି ପ୍ରତିଶୃତି ଦେଇଛନ୍ତି ପୌରାଧ୍ୟକ୍ଷା ଲିକା ସାହୁ । ଚୁମନର ସଂଘର୍ଷ କାହାଣୀ ଜାଣିଲା ପରେ ପୌରାଧ୍ୟକ୍ଷା ତ୍ୱରିତ ପଦକ୍ଷେପ ନେଇଥିବାରୁ ତାଙ୍କର ଏଭଳି ମହାନ କାମକୁ ବିଭିନ୍ନ ମହଲରେ ପ୍ରଶଂସା କରାଯାଉଛି ।