01-Nov-2022

ବଲାଙ୍ଗିର (ପ୍ରେରଣା ଖବର) ବଲାଙ୍ଗୀର ଦିନ ଉତ୍ସବ ପାଇଁ ମଂଚ ପୂଜା ଓ ସାଂସ୍କୃତିକ ଶୋଭାତ୍ରାରେ ସାମିଲ ହେଲେ ଶତାଧିକ କଳାକାର, ସଂସ୍କୃତିପ୍ରେମୀ । ଜୟ ବଲାଙ୍ଗୀର ଧ୍ୱନୀରେ କଂପୁଥିଲା ସହରର ରାଜରାସ୍ତା । ବଲାଙ୍ଗୀର ଦିନ କମିଟି ନେତୃତ୍ୱରେ ଆଜି ସକାଳେ ଅନୁଷ୍ଠିତ ସାଂସ୍କୃତିକ ଶୋଭାଯାତ୍ରାକୁ ବଲାଙ୍ଗୀର ଏମ୍‌ପି ସଙ୍ଗୀତା ସିଂଦେଓ ପତାକା ଦେଖାଇ ଉଦ୍‌ଘାଟନ କରିଥିଲେ । ଘଂଟ, ଶଙ୍ଖ ଓ ଢ଼ୋଳ ମୁହରୀରେ କଂପୁଥିଲା କୋସଳ କଳାମଣ୍ଡଳ ପଡିଆ । କମିଟିର ମୁଖ୍ୟ ସଂଯୋଜକ ଗୋପାଳଜୀ ପାଣିଗ୍ରାହୀଙ୍କ ଆବାହକତ୍ୱରେ ସାଂସ୍କୃତିକ ଶୋଭାଯାତ୍ରା କଳାମଣ୍ଡଳ ପଡିଆରୁ ବାହାରି  ରମାଇ ଟକିଜ୍ ରୋଡ, ସମଲେଶ୍ୱରୀ ମନ୍ଦିର, ପାଟଣେଶ୍ୱରୀ ମନ୍ଦିର, ପୁରୁଣା ବସଷ୍ଟାଣ୍ଡ ଦେଇ ପୁଣି କଳାମଣ୍ଡଳ ପଡିଆରେ ପହଂଚି ଥିଲା । ସମଲେଶ୍ୱରୀ ମନ୍ଦିରରେ ମାଁ ଙ୍କୁ ପୂଜାଅର୍ଚ୍ଚନା ପରେ ଦୀପ ଧରି ବଲାଙ୍ଗୀର ପୌରାଧ୍ୟକ୍ଷା ଲିକା ସାହୁ ସାଂସ୍କୃତିକ ଶୋଭାଯାତ୍ରାରେ ସାମିଲ ହୋଇଥିଲେ । ପାଟଣେଶ୍ୱରୀ ମନ୍ଦିରରେ ମଧ୍ୟ ପୂଜା ଅର୍ଚ୍ଚନା କରାଯିବା ପରେ ମାଁ ଙ୍କ ଦୀପ ଧରି ଜିଲ୍ଲାପରିଷଦ ଅଧ୍ୟକ୍ଷା ଦେବକୀ ସାହୁ ସାଂସ୍କୃତିକ ଶୋଭାଯାତ୍ରାରେ ସହର ପରିକ୍ରମା କରିଥିଲେ । ସାସଂକୃତିକ ଶୋଭାତ୍ରାରେ ବଲାଙ୍ଗୀର ଦିନ ଆୟୋଜକ କମିଟିର ସମସ୍ତ ସଭ୍ୟ ସଭ୍ୟା, କଳାକାର, ବିଭିନ୍ନ ସ୍ୱେଚ୍ଛାସେବୀ ସଂଗଠନର କର୍ମକର୍ତ୍ତା, ସଂସ୍କୃତିପ୍ରେମୀ ଯୋଗ ଦେଇଥିଲେ । ସଂଧ୍ୟାରେ କୋଶଳ କଳାମଣ୍ଡଳ ପଡିଆର ନୂଆ ମଂଚରେ ସଭା ଓ ସାଂସ୍କୃତିକ କାର୍ଯ୍ୟକ୍ରମ ଆୟୋଜିତ ହେବ । ଏଥିରେ ବଲାଙ୍ଗୀର ଜିଲ୍ଲାର ଜନସାଧାରଣ ବହୁ ସଂଖ୍ୟାରେ ଯୋଗ ଦେବାକୁ ବଲାଙ୍ଗୀର ଦିନ୍ ଆୟୋଜକ କମିଟି ପକ୍ଷରୁ  ବିନମ୍ର ଅନୁରୋଧ କରାଯାଇଛି ।