03-Oct-2022

ବରଗଡ:-ସାହିତ୍ୟ, ସାଂସ୍କୃତିକ। ଚେତ୍'ନା ଜାଗରୁତ କରବାରେ ମୁଖିଆ ଭୂମିକା ନେଇଛେ ବରଗଡ଼ ଜିଲାର୍ ବିଜେପୁର ବାହିର ପଡା ଗାଁର ପ୍ରକାଶ୍ ସାଂସ୍କୃତିକ୍ ସଂସଦ୍ । ଚଲତି ବଛର୍ ରୌପ୍ୟ ଜୟନ୍ତୀ ଉଚ୍ଛବ୍ ପାଲନ କରବାକେ ଯାଉଛେ। ଇ ଉଧେଁ 'ପଡା' ଗାଁଥି ସଂସଦର୍ ସଭାପତି ପ୍ରଦୀପ୍ ପଧାନକଁର୍ ଅଧ୍ଯକ୍ଷତାଥିଁ ସଭା ହେଇଥିଲା। ସଂସଦର ସଂପାଦକ୍ ଦିଲ୍ଲୀପ୍ କୁମାର ଦେବତା ଉଦ୍ଦେଶ୍ଯ ଜ୍ଞାପନ୍ କରବାର୍ ସାଗେଁ ରୌପ୍ୟ ଜୟନ୍ତୀ ଉଚ୍ଛବ୍ ବିଷେଥି ସୂଚନା ଦେଇ କହିଥିେଲ ଯେ, ଭାରତୀୟ ଭାଷା ସାହିତ୍ୟଥି  ମଞ୍ଚ୍ ନାଟକର୍ ପଛାପୋଛ୍ କବିତା ଦେଖନହାରୀକଁର୍ ମନ୍ ମୁହି ନେଉଛେ। ସାହିତ୍ୟର୍ ଭିନ୍ ଭିନ୍ ବିଭାଗକେ ଜୁରି କରି ୨୪ ଘଣ୍ଟିଆଁ କାର୍ଯ୍ୟକ୍ରମ୍ ହେଉଛେ। ହେଲେ ଏକ୍-ଧରସିଆ କବିତାକେ ନେଇ ନାମଯଜ୍ଞ ମିତାର୍ ଚୋବିଶ୍ ଘଣ୍ଟିଆ କାର୍ଯ୍ୟକ୍ରମ କରବାକେ ଠିକବନ୍ ହେଇଛେ। ଯେନଟାକି ଆମର୍ ପଶ୍ଚିମ୍ ଓଡିଶାର୍ ଭାଷା ସାହିତ୍ୟ ଲାଗି ଗୁଟେ ମାଇଲଖୁଟା ହେବା। ଇ କବିତାର୍ ନାମଯଜ୍ଞଥିଁ ଆମର୍ ପଶ୍ଚିମ୍ ଓଡିଶାର୍ ଭିନ୍ ଭିନ୍ ଇଲାକାର୍ କବି, କବୟିତ୍ରୀ ସାମିଲ୍ ହେବେ।  ଉଦଘାଟନୀ ଉଚ୍ଛବଥିଁ ରାଜ୍ୟ ହସ୍ତତନ୍ତ ଓ ବୟନ ଶିଳ୍ପ ମନ୍ତ୍ରୀ ରୀତା ସାହୁ ଆର୍ ଉଦଯାପନୀ ସମାରୋହଥିଁ

ବରଗଡ଼ ସାଂସଦ ସୁରେଶ ପୁଜାରୀ ଯୋଗଦାନ୍ କରବାକେ  ଜନେଇଛନ। ଆଏବା ଦଶରା ଚତୁରଦଶୀ ଶନିବାର ବେଲହଉବେଲି ୩ ବଜେ ନୁ ଦଶରା ପୁନି ରବିବାର ବେଲହଉବେଲି ୪ ବଜେତକ୍ ରୌପ୍ୟ ଜୟନ୍ତୀ ଉଚ୍ଛବ୍ ପାଲନ୍ କରାଯିବା ବଲିଁ ସଂପାଦକ୍ ଦିଲ୍ଲୀପ୍ କୁମାର୍ ଦେବତା କହିଛନ୍। ପଦ୍ମଶ୍ରୀ ହଳଧର୍ ନାଗ୍, ନାଟ୍ୟକାର୍ ମୋହନସିଂ, ରେଡିଏସନ୍ କଲେଜର୍ ଡାଇରେକ୍ଟର ଅଜିତ୍ କୁମାର୍ ମେହେର଼, କ୍ରାନ୍ତିକବି ହରିଲାଲ୍ ସାହୁ, କଲାକାର ଜିତେନ୍ଦ୍ରିୟ ମେହେର, ରାଜେଶ୍ବର୍ ବେହେରା, ମକରଧ୍ୱଜ ସାହୁ, ତୁଳସୀରାମ୍ ମେହେର୍ ଯୋଗଦେଇଥିଲେ। ଟିକେଲାଲ ପଧାନ ଶେଷକେ ଧନ୍ଯବାଦ୍ ଦେଇଥିଲେ।