26-Sep-2022

ବଲାଙ୍ଗୀର ଜିଲ୍ଲା ସିନ୍ଧେକେଲା ଅଞ୍ଚଳର ଅଦ୍ଧିଷ୍ଠାତ୍ରୀ ଦେବୀ ମାଁ ଦ୍ବାରସେହ୍ନୀଙ୍କ ଦଶହରା ପର୍ବ ଆରମ୍ଭ ହୋଇଯାଇଛି। ମୁଳାଷ୍ଟମୀ ଠାରୁ ଆରମ୍ଭ ହୋଇଥିବା ଦଶହରା ପୂଜାରେ ବିଭିନ୍ନ ସମ୍ପ୍ରଦାୟର ସେବାୟତ ମାନଙ୍କ ମଧ୍ଯରୁ ଜାନୀ ସେବାୟତ ତିନିଦିନ ତଳୁ ମହଖଣ୍ଡ ନିକଟସ୍ଥ ଛତରଙ୍ଗ ଜଙ୍ଗଲରୁ ଛତ୍ରବାଉତି ଙ୍କ ପାଇଁ ଉଦ୍ଦିଷ୍ଟ (ଛତରଡାଣୀ) ବାଉଁଶ ଖୋଜିବାକୁ ଯାଇଥିଲେ। ପ୍ରକାଶ ଥାଉକି ଏହି ଛତରଙ୍ଗ ଜଙ୍ଗଲରେ ମାଁ ଛତ୍ରବାଉତି ଙ୍କ ପାଇଁ ଉଦ୍ଦିଷ୍ଟ ବାଉଁଶ ଜଙ୍ଗଲ ରହିଛି । ତା ମଧ୍ଯରୁ ଦେବୀଙ୍କ ଆଦେଶାନୁଯାଇ ଜାନୀ ଗୋଟିଏ ବାଉଁଶ ବାଛି ସେଠାରେ ପୂଜାର୍ଚ୍ଚନା କରି ବାଉଁଶ କାଟି ଚାଳି ଚାଳି ମନ୍ଦିର କୁ ଆସି ପହଞ୍ଚିଛନ୍ତି। ରବିବାର ମହାଳୟା ତିଥିରେ ଛତ୍ରଉଭା ଯାତ୍ରା ଅନୁଷ୍ଠିତ ହେବାକୁ ଥିବାରୁ ଜାନୀ ସେବାୟତ ସିନ୍ଧେକେଲା ସ୍ଥିତ ମାଁ ଦ୍ବାରସେହ୍ନୀଙ୍କ ମନ୍ଦିର କୁ (ଛତରଡାଣୀ) ବାଉଁଶ ଧରି ପହଞ୍ଚିଛନ୍ତି । ପ୍ରକାଶ ଯୋଗ୍ଯ କାହିଁ କେତେ ଆବାହମାନ କାଳରୁ ମହଖଣ୍ଡ ନିକଟସ୍ଥ ଛତରଙ୍ଗ ଜଙ୍ଗଲରୁ ସିନ୍ଧେକେଲା ପର୍ଯ୍ୟନ୍ତ ମଝିରେ ଯେତେ ଗାଁ ପଡିବ ସେମାନେ ଛତରଡାଣୀ ର ପୂଜାର୍ଚ୍ଚନା କରିବାସହ ଅଧିଆ ପଡନ୍ତି ଏଥିପାଇଁ ନିଜନିଜ ଗାଁ ମାନଙ୍କରେ ପାରମ୍ପରିକ ବାଦ୍ୟ ବଜାଇ ସ୍ବାଗତ କରି ଗାଁର ଠାକୁରାଣୀ ମନ୍ଦିର ଠାରେ ପୁଜାପାଠ ଆଦି ସମ୍ପନ୍ନ ହେବାପରେ ଗାଁ ମୁଣ୍ଡ ପର୍ଯ୍ୟନ୍ତ ପହଞ୍ଚାଇ ବିଦାୟ ନିଅନ୍ତି । ଯୋଉ ଗାଁ ଗୁଡିକ ଦେଇ ଛତରଡାଣୀ ଅତିକ୍ରମ କରନ୍ତି ସେ ଅଞ୍ଚଳର ଦଶହରା ପୂଜା ଶେଷ ହୋଇଯାଇଥାଏ। ହେଲେ ରବିବାର ସିନ୍ଧେକେଲାର ଘରେ ଘରେ ଆବାଳ ବୃଦ୍ଧ ବନିତା ସମସ୍ତେ ଛତ୍ରଉଭା ସମୟରେ ସତର୍କ ରହିବାକୁ ଘରର ମୁରବୀ ମାନେ ପରାମର୍ଶ ଦେଉଥିବା ଦେଖିବାକୁ ମିଳିଥିଲା । ବହୁ ପୂର୍ବରୁ ଏକ ମାନ୍ୟତା ରହିଛି ଯେ ସିନ୍ଧେକେଲା ଗାଁକୁ ଛତରଡାଣୀ ପହଞ୍ଚିବା ପରେ ଦୁରିଆ ସେବାୟତ ଏ.....ଏ.... ଶବ୍ଦ କରି ଲୋକଙ୍କୁ ଛତରଡାଣୀ ଯାଉଥିବା ସୁଚେଇ ଦେଇଥାନ୍ତି। ତେବେ ଛତରଡାଣୀ ଆସୁଥିବା ଖବର ପାଇବା ପରେ ଯୋଉ ରାସ୍ତାରେ ଛତରଡାଣୀ ଯାଉଥିଲା ସେହି ରାସ୍ତା ସ୍ବତଃ ପ୍ରବୃତ୍ତ ଭାବେ ଖାଳି ହୋଇ ଶୁନଶାନ ହୋଇ ଯାଇଥିବା ଦେଖିବାକୁ ମିଳିଥିଲା । ମନ୍ଦିରକୁ ଛତରଡାଣୀ ପହଞ୍ଚିବା ପରେ

ବିଳମ୍ବିତ ରାତିରେ ପୂଜାର୍ଚ୍ଚନା ପରେ ଛତର ତିଆରି କରାଯାଏ। ପରେ ଦିହାରୀ ଦେହରେ ମାଁ ଦ୍ବାରସେହ୍ନୀ ସବାର ହୋଇ ଛତ୍ରବାଉତି ଙ୍କ ଆହ୍ବାନ କରିଥାନ୍ତି ଓ ରିତିନୀତି ପୁଜାପାଠ ହୋଇ ଦେବୀ ରାଜା ଅରୁଣ ସିଂଦେଓ ଙ୍କୁ ଡେଙ୍ଗସର୍ଗୀ ଯାତ୍ରା ପାଇଁ ଆଦେଶ ଦିଅନ୍ତି। ଦେବୀ ଆଦେଶ ଦେଲେ ତା ଆରଦିନ ଡେଙ୍ଗସର୍ଗୀ ଯାତ୍ରା ଅନୁଷ୍ଠିତ ହୋଇଥାଏ। ଯାହାକି ରବିବାର ଦେବିଙ୍କ ଆଦେଶ ହେଲେ ଆଜି ସୋମବାର ଦେବୀ ଦ୍ବାରସେହ୍ନୀଙ୍କ ପୀଠରୁ ବୁଢାରଜା ବାହାରି ଇଚଗାଁ ପର୍ଯ୍ୟନ୍ତ ୯ କିଲୋମିଟର ଚାଳି ଚାଳି ଯାଇ ସେଠାରେ ବିବାହ ଉତ୍ସବ ସରିବାପରେ ପୁଣି ଦେବୀ ଦ୍ବାରସେହ୍ନୀ ସିନ୍ଧେକେଲା କୁ ପ୍ରତ୍ୟାବର୍ତ୍ତନ କରିବେ। ଏହି ଯାତ୍ରା ହେଲେ ଏଥର ନଅ କିଲୋମିଟର ରାସ୍ତା ଜନସମୁଦ୍ର ପାଳଟିବ ବୋଳି ମତପ୍ରକାଶ ପାଇଛି। ଦ୍ବାରସେହ୍ନୀ ଦେବୀଙ୍କ ବିନା ଛତର ର ସାମ୍ନା କରିବା ଶୁଭଙ୍କର ହୁଏନାହିଁ ବୋଳି ବୟସ୍କ ଲୋକେ ଚର୍ଚ୍ଚା କରୁଥିବା ଦେଖା ଯାଇଥିଲା ।