13-Aug-2022

ପଦ୍ମପୁର (ନରହରି ବଗର୍ତ୍ତୀ) / ଗଙ୍ଗାଧର ସାହିତ୍ୟ ସଂସଦ ଗାଇସିଲେଟ ଆନୁକୂଲ୍ୟରେ ସ୍ଵଭାବ କବି ଗଙ୍ଗାଧର ମେହେରଙ୍କ ଜୟନ୍ତୀ ପାଳନ ହୋଇଯାଇଅଛି । ଆଜି ପବିତ୍ର ଶ୍ରାବଣ ପୂର୍ଣ୍ଣିମା ଦିନ ସ୍ଥାନୀୟ ସରସ୍ଵତୀ ଶିଶୁ ବିଦ୍ୟାମନ୍ଦିର ଗାଇସିଲେଟଠାରେ ସଂସଦର ସଭାପତି ଶ୍ରୀଯୁକ୍ତ ଦିବାକର ଯୋଷୀଙ୍କ ଅଧ୍ୟକ୍ଷତାରେ ଅନୁଷ୍ଠିତ ସାରସ୍ବତ ସମାରୋହରେ ସୋହେଲା ମହାବିଦ୍ୟାଳୟର ଅବସରପ୍ରାପ୍ତ ଅଧ୍ୟକ୍ଷ ଶ୍ରୀ ଯୁକ୍ତ ଟେକଚାନ୍ଦ ଦୁଆନ ମୁଖ୍ୟ ଅତିଥିଭାବେ ଯୋଗଦେଇଥିଲେ ଏବଂ ପ୍ରଖ୍ୟାତ ଲେଖକ, ଗବେଷକ, ବାଗ୍ମୀ ପ୍ରବଚକ ଡାକ୍ତର କୃଷ୍ଣ କେଶବ ଷଡ଼ଙ୍ଗୀ ମୁଖ୍ୟ ବକ୍ତା ଓ ବରଗଡ଼ ମହିଳା ମହାବିଦ୍ୟାଳୟର ପ୍ରଧ୍ୟାପିକା ଡଃ ସଙ୍ଘମିତ୍ରା ମିଶ୍ର ସମ୍ମାନୀତ ବକ୍ତା ଭାବରେ ଯୋଗଦାନ କରିଥିଲେ । ସ୍ଥାନୀୟ ସରସ୍ଵତୀ ଶିଶୁ ବିଦ୍ୟାମନ୍ଦିରର ଛାତ୍ର ଛାତ୍ରୀମାନେ ଗଙ୍ଗାଧର ସଙ୍ଗୀତ ଗାନ କରିଥିଲେ ଓ ଶ୍ରୀ ଯୁକ୍ତ ମୋହନ ରଣା ଅତିଥି ମାନଙ୍କ ପରିଚୟ ପ୍ରଦାନ କରିଥିବା ବେଳେ ସଂସଦର ସମ୍ପାଦକ ଶ୍ରୀ ଯୁକ୍ତ ରୁକ୍ମଣ ଦିଶ୍ରୀ ବୀବରଣୀ ପଠନ କରିଥିଲେ । ଏହି ସମାରୋହରେ ସ୍ୱଭାବ କବିଙ୍କ କାବ୍ୟ କବିତାରେ ନାରୀ ଚରିତ୍ର ଓ ପୁରୁଷ ଚରିତ୍ର ବିଷୟରେ ବକ୍ତା ମାନଙ୍କର ବକ୍ତବ୍ୟ ସମସ୍ତ ଶ୍ରୋତାଙ୍କୁ ବିମୋହିତ କରିଥିଲା । ଗଙ୍ଗାଧର ସାହିତ୍ୟରେ ରାମଚନ୍ଦ୍ରଙ୍କୁ ରଘୁବୀର କୁହାଯାଇଥିବା ପ୍ରସଙ୍ଗକୁ ମୁଖ୍ୟ ବକ୍ତା ଡାକ୍ତର ଷଡଙ୍ଗୀ ଆଲୋଚନା କରି ଏକ ଭାବବିହ୍ଵଳ ପରିବେଶ ସୃଷ୍ଟି କରିଥିଲେ । ଏହି ଜୟନ୍ତୀ ସମାରୋହରେ ତିନି ଜଣ କୃତି ଶିକ୍ଷାର୍ଥୀ ସ୍ମୃତିରେଖା ସାହୁ , ଅଙ୍କିତା ସାହୁ ଓ ତସ୍ଳିମା ବରିହାଙ୍କୁ ଯାଜ୍ଞସେନୀ ଦୁର୍ଗାପ୍ରସାଦ ପ୍ରତିଭା ସମ୍ମାନ ପ୍ରଦାନ କରାଯାଇଥିଲା ଏବଂ ବିଭିନ୍ନ ପ୍ରତିଯୋଗିତାରେ କୃତିତ୍ୱ ହାସଲ କରିଥିବା ନଅଜଣ ଛାତ୍ର ଛାତ୍ରୀଙ୍କୁ ଟ୍ରଫି ଓ ପ୍ରସଂଶା ପତ୍ର ଦିଆଯାଇଥିଲା । ଏହି ସାରସ୍ବତ ଉତ୍ସବକୁ ଶ୍ରୀ ନବୀନ ଚନ୍ଦ୍ର ବରିହା ସଂଚାଳନ କରିଥିଲେ ଓ ପରିଶେଷରେ ଶ୍ରୀ ରୁକ୍ମଣ ଦିଶ୍ରୀ ସମସ୍ତଙ୍କୁ ଧନ୍ୟବାଦ ଅର୍ପଣ କରିଥିଲେ ।