14-Jul-2022

ବଲାଙ୍ଗୀର(ମଳୟ ମିଶ୍ରଙ୍କ ରିପୋର୍ଟ):ଏକଥା ସତ ଯେ, ଆଦିବାସୀ ବିଭାଗର ଆଶ୍ରମ ଓ ସେବାଶ୍ରମ ସ୍କୁଲର ହଷ୍ଟେଲରେ ପିଲାଙ୍କ ମେସ୍ ରୁ ନିୟମିତ ବାଟମାରଣା ଏଠାରେ ଅସାଧୁ ଶିକ୍ଷକ ଓ ବିଭାଗୀୟ ଅଧିକାରୀଙ୍କ ଅଭ୍ୟାସଗତ ପରମ୍ପରା ପାଲଟିଛି ।  ଏହାକୁ ଭିତ୍ତି କରି ଏସବୁ ସ୍କୁଲ୍ ଗୁଡିକରେ ଜିଲ୍ଲା ଆଦିବାସୀ କଲ୍ୟାଣ ଅଧିକାରୀଙ୍କ କାର୍ଯ୍ୟାଳୟରେ ସେବକ ବା ଶିକ୍ଷକ/ଶିକ୍ଷୟିତ୍ରୀ  ଓ ପ୍ରଧାନସେବକ ବା ପ୍ରଧାନଶିକ୍ଷକଙ୍କ ବଦଳି ନିର୍ଦ୍ଧାରିତ ହୋଇଥାଏ । ମୁଖ୍ୟତଃ ପିଲାଙ୍କ ଖାଦ୍ୟପେୟ ଓ ଅନ୍ୟାନ୍ୟ ଖର୍ଚ୍ଚରୁ ମାରି ଯିଏ ଯେତେ ନିୟମିତ ବଟି ଦେଇପାରିଛି, ସେ ହିଁ ସୁବିଧାଜନକ ଜାଗାରେ ବର୍ଷ ବର୍ଷ ଧରି ରହିପାରିଛି  ।  ଏବେ ବି ସେଇ ଏକା ସ୍କୁଲରେ ଜଣେ ଜଣେ ପ୍ରଧାନସେବକ ଦୀର୍ଘ ୫/୧୦/୧୫ ବର୍ଷ ହେଲା ଅବସ୍ଥାପିତ ରହିଆସିଛନ୍ତି । ମଝି

ମଝିରେ ବଦଳି କଥା ଉଠିଲେ, ଗଣ୍ଡଗୋଳିଆ ପରିସ୍ଥିତି ସୃଷ୍ଟିହୋଇ ପୁଣି ବାତିଲ୍ ହୋଇଯାଇଛି ।  ତୁରେକେଲା ହେଉ ବା ଖପ୍ରାଖୋଲ ବ୍ଲକର ବେନ୍ କେରା, ଦେଓଗାଁ ବ୍ଲକର ରାମଚନ୍ଦ୍ରପୁର ହେଉ ବା ଗୁଡଭେଲା ବ୍ଲକର ଗୁଡଙ୍ଗାମାଲ କିମ୍ବା ଅନ୍ୟ ଆଶ୍ରମ ଓ ସେବାଶ୍ରମ ସ୍କୁଲ୍ ମାନଙ୍କରେ ଏଭଳି ଘଟଣା ଦେଖାଯାଏ । ଏତଦ୍ ବ୍ୟତୀତ ସଇଁତଳା, ମାଲପଡା, ରିଷିଡା, ରାମପୁର, ଦଲଦଲି ମୁନାପାଲି, ତୁର୍ଲା ଓ ଅନ୍ୟାନ୍ୟ ସ୍ଥାନରେ ସେବକ ବା ଶିକ୍ଷକ/ଶିକ୍ଷୟିତ୍ରୀ ଏବଂ ପିଅନ, ରାନ୍ଧୁଣୀ, ସହାୟକ/ସହାୟିକା/ଅସ୍ଥାୟୀ କର୍ମଚାରୀ ଇତ୍ୟାଦି କର୍ମଚାରୀଙ୍କୁ ମଧ୍ୟ ଦୀର୍ଘବର୍ଷ ଧରି ଅବସ୍ଥାପିତ ରଖାଯାଇ ଆସିଛି । ଏହାଫଳରେ ଏଠାରେ ନିୟମିତ ବାଟମାରଣା ଅବ୍ୟାହତ ରହିଛି । 

ଏହିସବୁ ସ୍କୁଲରେ ପିଲାଙ୍କ ଖାଦ୍ୟପେୟରୁ ପ୍ରାୟ ପ୍ରତିମାସ ମିଥ୍ୟାବର୍ଦ୍ଧିତ ଛାତ୍ରଛାତ୍ରୀ, ମିଥ୍ୟା ଉପସ୍ଥାନ, ମିଥ୍ୟାପରିମାଣ, ମିଥ୍ୟା ଦାମ୍  ଓ ହଜାର ହଜାର ଟଙ୍କାର ମିଥ୍ୟାବ୍ୟୟ ଦର୍ଶାଯାଇଥାଏ । ଏଥିରେ ରାସନ ଯୋଗାଉଥିବା ଦୋକାନୀମାନେ କାର୍ପଟ୍ ଦାର୍ ପାଲଟିଥା'ନ୍ତି । ପିଲାଙ୍କ ଷ୍ଟାଇପେଣ୍ଡ୍ ଦେଲାବେଳେ ଅଫିସ୍ ରୁ  ଓ ପରେ ଅଧିକାରୀଙ୍କୁ ନିୟମିତ ବଟି ଦିଆଯାଉଥାଏ । ଶୁଣିବାକୁ ମିଳୁଛି, ଏଥର ସରକାର ସାମ୍ବାଦିକଙ୍କୁ ସ୍କୁଲ୍ ଭିତରେ ପ୍ରବେଶନିଷେଧ ଘୋଷଣା କରିବାରୁ ଏହି ବଟି ପରିମାଣ ବଢାଇବାକୁ ବିଭାଗୀୟ ଅଧିକାରୀମାନେ ଦାମ୍ ବଢାଇ ଦେଇଛନ୍ତି । ଜିଲ୍ଲା ଆଦିବାସୀ କଲ୍ୟାଣ ଅଧିକାରୀଙ୍କ କାର୍ଯ୍ୟାଳୟର ମୁଖ୍ୟତଃ ଜଣେ ଶିକ୍ଷାବିଭାଗୀୟ କିରାଣୀ ଏଥିର ବଟି ଆଦାୟକାରୀ ଗୁମାସ୍ତା । ଜିଲ୍ଲାପାଳ ଏସବୁ ଜାଣୁଛନ୍ତି କି ନାହିଁ, ଅସ୍ପଷ୍ଟ ରହିଛି । ତେବେ ନିର୍ଦ୍ଦିଷ୍ଟ ବ୍ୟବଧାନରେ କାହିଁକି ଏହି ବିଭାଗର ଶିକ୍ଷକ/ ଶିକ୍ଷୟିତ୍ରୀ/ରାନ୍ଧୁଣୀ/ ଚତୁର୍ଥଶ୍ରେଣୀ କର୍ମଚାରୀଙ୍କ ବଦଳି ହେଉନାହିଁ ; ଏହା ଏହି ଜିଲ୍ଲାରେ ରହସ୍ୟଜନକ ବିଷୟ ।