28-Jun-2022

ବଲାଙ୍ଗୀର (ମଳୟ ମିଶ୍ରଙ୍କ ରିପୋର୍ଟ)  ବଲାଙ୍ଗୀର ଜିଲ୍ଲା ଆଗଲପୁର ବ୍ଲକ୍ ର ଶିଶୁ ବିକାଶ ପ୍ରକଳ୍ପର ଜଣେ ସୁପରଭାଇଜର ବର୍ଷେତଳେ ଅବସର ଗ୍ରହଣ କରିଥିଲେ ହେଁ ,  ପ୍ରକଳ୍ପ ଅଫିସ୍ ର ଅହେତୁକ କାଳକ୍ଷେପଣ  ଏବଂ ଜିଲ୍ଲା ସମାଜ କଲ୍ୟାଣ ଅଧିକାରୀଙ୍କ ଅଫିସ୍ ର ମୁଖ୍ୟକିରାଣୀଙ୍କ ମନମାନୀ ଓ ଅନଭିଜ୍ଞତା ଯୋଗୁଁ  ସମସ୍ତ କାଗଜପତ୍ର ଦାଖଲ କରାଯାଇଥିବା ସତ୍ତ୍ୱେ ସେତେବେଳେ ଅନ୍ୟମାନଙ୍କର କରାଯାଇଥିଲେ ସୁଦ୍ଧା  ବିନାକାରଣରେ ତାଙ୍କର MACP ମଞ୍ଜୁର କରା ନଯାଇ ପକାଇ ରଖାଯାଇଥିବା ଓ ଆଉଥରେ ଛଅମାସ ପରେ ଯାଇ ଏଜିକୁ ପଠାଯିବ ବୋଲି କୁହାଯାଇ ନିରର୍ଥକ ହଇରାଣ କରାଯାଉଥିବା ଅଭିଯୋଗ କରାଯାଇଛି । ଏ ସମ୍ପର୍କରେ ଉକ୍ତ ଅବସରପ୍ରାପ୍ତ ମହିଳା କର୍ମଚାରୀଙ୍କ ପକ୍ଷରୁ ବଲାଙ୍ଗୀର ଜିଲ୍ଲାପାଳଙ୍କ ନିକଟରେ ଲିଖିତ ଅଭିଯୋଗ କରାଯାଇଥିବା ଜଣାଯାଇଛି । 

ଅଭିଯୋଗରୁ ପ୍ରକାଶ ଯେ , ଗତ ୩୧ .୫ . ୨୦୨୧ ତାରିଖରେ ଆଗଲପୁର ଶିଶୁ ବିକାଶ ପ୍ରକଳ୍ପର ଜଣେ ମହିଳା ସୁପରଭାଇଜର ବିନତୀ ଶତପଥୀ ଅବସର ଗ୍ରହଣ କରିଥିଲେ । ତାଙ୍କର ପେନସନ ସଂକ୍ରାନ୍ତୀୟ ସମସ୍ତ କାଗଜପତ୍ର ଗତ ୧୪ . ୩ . ୨୦୨୨ ତାରିଖରୁ ବଲାଙ୍ଗୀର ଜିଲ୍ଲା ସମାଜ କଲ୍ୟାଣ ଅଧିକାରୀ ଙ୍କ ଅଫିସ୍ କୁ ପଠାଯାଇସାରିଛି । ସେତେବେଳେ ଏହି ଅଫିସ୍ ରେ ତାଙ୍କର ସମସ୍ତ କାଗଜପତ୍ର ଥିଲେ ହେଁ , ଅନ୍ୟମାନଙ୍କର ଏମ୍ ଏ ସି ପି  (ତା  ୧୧ . ୫ . ୨୦୨୨ /  Lt no . ୧୦୯୧ ) ରେ ମଞ୍ଜୁର କରାଯାଇ AG କୁ  ପଠାଗଲା । କିନ୍ତୁ ତାଙ୍କର ପଠିଗଲା ନାହିଁ ।  ଏବେ ସେ ଏହା ଜାଣିପାରି ପଚାରିବାରୁ ଆଉ ଛଅମାସ ପରେ ପଠାଯିବ ବୋଲି କୁହାଯାଉଛି । ଫଳରେ ଅବସରର ଏକମାସ ମଧ୍ୟରେ କର୍ମଚାରୀଙ୍କ ସମସ୍ତ ଦେୟ ଦିଆଯିବାକୁ ସରକାରୀ ନିର୍ଦ୍ଦେଶ ରହିଥିବା ସତ୍ତ୍ୱେ ,ତାଙ୍କୁ ଏଯାବତ୍ ବର୍ଷେ ପରେ ମଧ୍ୟ ପେନସନ ମିଳିପାରୁ ନାହିଁ । 
ଅପରତଃ ଆଗଲପୁର ପ୍ରକଳ୍ପ ଅଫିସ୍ ରୁ ମିଳୁଥିବା ତାଙ୍କର ପ୍ରୋଭିଜନାଲ୍ ପେନସନ ମଧ୍ୟ ଠିକ୍ ସମୟରେ ମିଳୁନାହିଁ । ଗୋଟିଏ ମାସର ପେନସନ ମିଳୁ ମିଳୁ ଆରମାସ ଶେଷ ସପ୍ତାହ ଗଡିଯାଉଛି । କୌଣସି ଭୁଲ୍ ନଥାଇ ଜଣେ ଅବସରପ୍ରାପ୍ତ ମହିଳା କର୍ମଚାରୀ ତଥା ବୟସ୍କା ନାଗରିକଙ୍କୁ ଏଭଳି ଅହେତୁକ ହଇରାଣ ଦୁଃଖ ଓ ପରିତାପର ବିଷୟ ।

ଅନୁସନ୍ଧାନରୁ ଜଣାଯାଇଛି ଯେ , କିରାଣୀଙ୍କ ଅନଭିଜ୍ଞତା ଓ ମନୋମୁଖୀ କାର୍ଯ୍ୟକଳାପ ହିଁ ଏହାର ମୁଖ୍ୟକାରଣ । ଟିଟିଲାଗଡରୁ ଥଇଥାନଭିତ୍ତିକ ନିଯୁକ୍ତିରୁ ପଦୋନ୍ନତି ପାଇ ବଲାଙ୍ଗୀର ଜିଲ୍ଲା ସମାଜକଲ୍ୟାଣ ଅଧିକାରୀଙ୍କ ଅଫିସ୍ ରେ ମୁଖ୍ୟକିରାଣୀ ଥିବା ସତ୍ୟବତୀ ଚୋପଦାର ଏବେ ଏ ସମ୍ପର୍କରେ ପଚାରିବୁଝିବାକୁ ଚାହିଁଲେ ବି ଫୋନ୍ ଉଠାଉ ନଥିବା ଓ ଏଥିପାଇଁ ଅବସରପ୍ରାପ୍ତ ମହିଳା କର୍ମଚାରୀ ଜଣକ ଅଫିସ୍ କୁ ଦୌଡି ଦୌଡି ନିରାଶ ହୋଇପଡି ଶେଷରେ ଜିଲ୍ଲାପାଳଙ୍କଠାରେ ଲିଖିତ ଅଭିଯୋଗ କରିଥିବା ପ୍ରକାଶ ।