07-May-2022

                                                                     ବିନିକା(ହିମାଂଶୁ ଶେଖର ପୁଟେଲ) ସୁବର୍ଣ୍ଣପୁର ଜିଲ୍ଲାର ଭାତହାଣ୍ଡି କୁହାଯାଉଥିବା ବିନିକା ଓ ଡୁଙ୍ଗୁରିପାଲି ବ୍ଳକ ଅଞ୍ଚଳବାସୀଙ୍କୁ ବିଶୁଦ୍ଧ ପାନୀୟ ଜଳ ଯୋଗାଇ ଦେବା ପାଇଁ ସରକାରଙ୍କ ତରଫରୁ ମେଗା ଜଳଯୋଗାଣ ପ୍ରକଳ୍ପ କାମ ଆରମ୍ଭ ହୋଇଛି ସତ କିନ୍ତୁ ପରିତାପର ବିଷୟ ପ୍ରକଳ୍ପ ନିର୍ମାଣ କାମ ୩ବର୍ଷ ଭିତରେ ସରିବାର ଥିଲେ ମଧ୍ୟ ବିଗତ ଦୁଇ ବର୍ଷ ହେଲା ଚାଲିଥିବା ଏହାର ନିର୍ମାଣ କାର୍ଯ୍ୟ ସମ୍ପୂର୍ଣ୍ଣ ମନ୍ଥର ଗତିରେ ହେଉଥିବାରୁ ତାହା ନିର୍ଦ୍ଧାରିତ ସମୟରେ ସମ୍ପୂର୍ଣ୍ଣ ହେବ କି ନାହିଁ ସେନେଇ ସନ୍ଦେହ ସୃଷ୍ଟି କରିଛି ।ସୂଚନା ଯୋଗ୍ୟ ଯେ ୨୦୨୦/୨୧ ଆର୍ଥିକ ବର୍ଷରେ ସରକାରଙ୍କ ବସୁଧା ଯୋଜନାରୁ ୧୯୯କୋଟି ୭୬ଲକ୍ଷ ଟଙ୍କା ବ୍ୟୟ ଅଟକଳରେ ଏକ ମେଗା ଜଳଯୋଗାଣ ପ୍ରକଳ୍ପ କାମ ବିନିକା ବ୍ଳକ ଅନ୍ତର୍ଗତ ସିନ୍ଦୂରପୁର ପଞ୍ଚାୟତ ମଣିଗାଁ ମହାନଦୀ କୂଳରେ ଆରମ୍ଭ ହୋଇଥିଲା ।ଟେଣ୍ଡର ପ୍ରକ୍ରିୟା ଅନୁସାରେ ଉକ୍ତ ମେଗା ପ୍ରକଳ୍ପ ୩ବର୍ଷ ମଧ୍ୟରେ ସଂପୂର୍ଣ୍ଣ କରାଯାଇ ଉକ୍ତ ବ୍ଳକ ଦ୍ବୟର ଗ୍ରାମାଞ୍ଚଳକୁ ଜଳଯୋଗାଣ କରିବାର ଚୁକ୍ତି ହୋଇଥିଲା ୨ବର୍ଷ ମଧ୍ୟରେ ପାଇପ ବିଛା କାମ ପ୍ରାୟତଃ ସରି ଯାଇଥିବା ବେଳେ ବର୍ତମାନ କଇଁଛ ପରି ଧୀରେ ଧୀରେ କାମ ଚାଲୁଥିବାରୁ ଠିକ ସମୟରେ ଲୋକେ ବିଶୁଦ୍ଧ ପାନୀୟ ଜଳ ପାଇବା ନେଇ ମସ୍କିଲ ହୋଇପଡିଛି ।ପାଇପ ଲାଇନ ବିଛାଇବା ପାଇଁ ଗାଁ ଗାଁରେ ହୋଇଥିବା କଂକ୍ରିଟ ରାସ୍ତା ଗୁଡ଼ିକ ଭାଙ୍ଗି ଦିଆଯାଉଥିବା ବେଳେ

ପାଣିଟାଙ୍କି ନିର୍ମାଣ ସକାଶେ ବିଭିନ୍ନ ସ୍ଥାନରେ ଖୋଲାଯାଇଥିବା ଗାତ ଗୁଡ଼ିକ ଅସୁରକ୍ଷିତ ଅବସ୍ଥାରେ ପଡ଼ିଥିବା ଦେଖିବାକୁ ମିଳୁଛି ।ଫଳରେ ଗାଁ ଭିତର କଂକ୍ରିଟ ରାସ୍ତା ଗୁଡ଼ିକ ବିପର୍ଯ୍ୟସ୍ତ ହୋଇଥିବା ବେଳେ ପାଣି ଟାଙ୍କି ଖୋଲା ଯାଇଥିବା ଗାତ ସମସ୍ତଙ୍କ ପାଇଁ ମରଣମୁଖା ପାଲଟିଛି ।ଅନ୍ୟ ପକ୍ଷରେ ଉକ୍ତ ଦୁଇ ବ୍ଲକର ଅଧିକାଂଶ ଗ୍ରାମରେ ବିଶୁଦ୍ଧ ପାନୀୟ ଜଳ ଯୋଗାଣର ସମସ୍ୟା ରହିଥିବା ବେଳେ ତିନି ବର୍ଷ ମଧ୍ୟରେ ସରିବାକୁ ଥିବା ଏହି ମେଗା ପ୍ରକଳ୍ପ ଇତିମଧ୍ୟରେ ଦୁଇ ବର୍ଷ ଅତିକ୍ରାନ୍ତ କରିଥିଲେ ମଧ୍ୟ ନିର୍ଦ୍ଧାରିତ ସମୟରେ ପାନୀୟ ଜଳ ପାଇବା ନେଇ ଅନିଶ୍ଚିତତା ଦେଖାଦେଇଛି । ଏନେଇ ସୁବର୍ଣ୍ଣପୁର ଜିଲ୍ଲା ଜଳ ଓ ପରିମଳ ବିଭାଗ ନିର୍ବାହୀ ଯନ୍ତ୍ରୀ ବିଭୁପ୍ରସାଦ ପଣ୍ଡାଙ୍କୁ ଯୋଗାଯୋଗ କରିବାରୁ ମଣିଗାଁ ମହାନଦୀ କୂଳରେ ଓ ଘାଟି ଜାମପାଳି ଠାରେ ପ୍ରକଳ୍ପର ବୃହତ ଟାଙ୍କି ନିର୍ମାଣ ସହିତ ବାକିଥିବା କେତେକ ଗ୍ରାମରେ ପାଇପ ସଂଯୋଗ କାମ ଦୃତ ଗତିରେ ଚାଲୁରହିଛି ଏବଂ ନିର୍ଦ୍ଧାରିତ ସମୟରେ ସମ୍ପୂର୍ଣ୍ଣ କରଣ ପ୍ରତି ପଦକ୍ଷେପ ନିଆଯାଉଛି ବୋଲି କହିଛନ୍ତି  l