28-Apr-2022

ବଲାଙ୍ଗୀର,(ପ୍ରେରଣା ଖବର)-ବଲାଙ୍ଗୀର ଜିଲ୍ଲାର ଦେଓଗାଁ ବ୍ଲକ ମକୁନ୍ଦପୁର ପଞ୍ଚାୟତର ଭୀମଡୁଙ୍ଗୁôରି ପର୍ଯ୍ୟଟନସ୍ଥଳିରେ ଆସନ୍ତା ମେ ୩ରୁ୫ ତାରିଖ ପର୍ଯ୍ୟନ୍ତ ତିନିଦିନ ଧରି ଭୀମପାହାଡ ମହୋତ୍ସବ ଅନୁଷ୍ଠିତ ହେବ । ସେଥିପାଇଁ ଆଜି ବଲାଙ୍ଗୀର ସାମ୍ବାଦିକଭବନଠାରେ ଭୀମପାହାଡ ମହୋତ୍ସବ କମିଟି ତରଫରୁ ଏକ ସାମ୍ବାଦିକ ସମ୍ବିଳନୀରେ  ମହୋତ୍ସବର ଲୋଗୋକୁ ଉନ୍ମୋଚନ କରାଯାଇ ଏବିଷୟରେ ସୂଚନା ଦିଆଯାଇଛି । ବଲାଙ୍ଗୀର ଜିଲ୍ଲାପରିଷଦର ଅଧ୍ୟକ୍ଷା ଦେବକୀ ସାହୁ ମୁଖ୍ୟଅତିଥି ଓ ବରେଣ୍ୟ ଅତିଥି ଭାବରେ ସଂସ୍କୃତିଗବେଷକ ଡ.ଗୁରୁଶ୍ରୀ ଘାସିରାମ ମିଶ୍ର ଓ ଜଗଦାନନ୍ଦ ଛୁରିଆ ଯୋଗଦେଇ ଏହି ଲୋଗୋକୁ ଉନ୍ମୋଚନ କରିଥିଲେ । ମହୋତ୍ସବ କମିଟିର ଉପଦେଷ୍ଟା ଲକ୍ଷ୍ମଣକୁମାର ମେହେରଙ୍କ ସଂଯୋଜନାରେ ଅନୁଷ୍ଠିତ ଏହି କାର୍ଯ୍ୟକ୍ରମରେ ଭୀମପାହାଡ ମହୋତ୍ସବ କମିଟିର ସଭାପତି ପ୍ରମୋଦ ବହିଦାର,ସଂପାଦକ ଗୋବର୍ଦ୍ଧନ ସାହୁ ମଞ୍ଚାସୀନ ଥିଲେ । ଭୀମପାହାଡ ପର୍ଯ୍ୟଟନସ୍ଥଳିର ପ୍ରଚାର ପ୍ରସାର ତଥା ଉନ୍ନୟନ ପାଇଁ କମିଟି ବହୁବର୍ଷ ହେଲା କାମ କରିଆସୁଛି । ସ୍ଥାନୀୟ ଦେଓଗାଁ,ପୁଇଁତଳା ଓ ବଲାଙ୍ଗୀର ବ୍ଲକର ସାଧାରଣଜନତାଙ୍କ ତରଫରୁ ମିଳିତ ଭାବରେ ଏହି ମହୋତ୍ସବ ଆୟୋଜିତ ହେଉଛି । ୨ ତାରିଖରେ ମହୋତ୍ସବ ପାଇଁ ଏକ ମଶାଳଶୋଭାଯାତ୍ରା ଅନୁଷ୍ଠିତ ହେବ । ଉପରଝର ପାଟଖଣ୍ଡା,ଅଠଗାଁର ପୁଡାପାଠ,ମହିମୁଣ୍ଡା କନ୍ଧେନବୁଢି ,କୁମୁରିଆର ସୁଲିଆପୀଠରୁ ମଶାଳ ଶୋଭାଯାତ୍ରାରେ ଆସିବ । ୨ ତାରିଖରେ ଭୀମପାହାଡର ଐତିହାସିକ ପୃଷ୍ଠଭୂମୀ ଉପରେ ଏକ ଆଲୋଚନାଚକ୍ର କରାଯିବ । ଅତିଥି ଭାବରେ ରାଜନେତା ତଥା ପ୍ରଶାସନିକ ଅଧିକାରୀମାନେ ଯୋଗଦେବେ । ଠିକ ସେହିପରି ରାଜ୍ୟ ତଥା ରାଜ୍ୟବାହାରୁ ସାଂସ୍କୃତିକଦଳ ଗୁଡିକ ଯୋଗଦାବନ କରିବାର କାର୍ଯ୍ୟକ୍ରମ ରହିଛି ବୋଲି କମିଟିର ଉପଦେଷ୍ଟା ଲକ୍ଷ୍ମଣକୁମାର ମେହେର ସୂଚନା ଦେଇଥିଲେ । ଗୁରୁଶ୍ରୀ ଡ.ଘାସିରାମ ମିଶ୍ର ଭୀମପାହାଡର ଐତିହାସିକ ପୃଷ୍ଠଭୂମୀ ଉପରେ କହିବା ସହିତ ବଲାଙ୍ଗୀର ଜିଲ୍ଲାର ପୂର୍ବରେ ଭୀମାଶଙ୍କରଙ୍କ ଭୀମପାହାଡପୀଠ ଓ ପଶ୍ଚିମରେ ହରିଶଙ୍କରପୀଠ ଥାଇ ଜିଲ୍ଲାର ଶୋଭାବର୍ଦ୍ଧନ କରୁଛନ୍ତି । ଏହାର ଐତିହ୍ୟ ହିଁ ବଲାଙ୍ଗୀରକୁ ଐତିହ୍ୟପୂର୍ଣ୍ଣ କରିଛି ବୋଲି କହିଥିଲେ । ସେହିପରି ବଲାଙ୍ଗୀର ଜିଲ୍ଲାରେ ସାଂସ୍କୃତିକ ବିଭବ ଭରି ରହିଛି ବୋଲି ନାଟ୍ୟଭୂଷଣ ଜଗଦାନନ୍ଦ ଛୁରିଆ କହିଥିଲେ । ମୁଖ୍ୟଅତିଥି ଶ୍ରୀମତୀ ଦେବକୀ ସାହୁ ତାଙ୍କ ବକ୍ତବ୍ୟରେ ମହୋତ୍ସବର ଉତ୍ତରୋତ୍ତର ଉନ୍ନତି କାମନା କରି ଜିଲ୍ଲାରେ ଏଭଳି କାର୍ଯ୍ୟକ୍ରମ ଲୋକଙ୍କ ମଧ୍ୟରେ ଭାଇଚାରା ସୃଷ୍ଟିକରିବ ବୋଲି କହିଥିଲେ । ଶେଷରେ କମିଟିର ସଭାପତି ପ୍ରମୋଦ ବହିଦାର ଧନ୍ୟବାଦ ଅର୍ପଣ କରିଥିଲେ । ଏହି କାର୍ଯ୍ୟକ୍ରମରେ ମକୁନ୍ଦପୁର ସରପଞ୍ଚ ଜାନକି ସାହୁ,ସମିତିସଭ୍ୟ ଅଭିମନ୍ୟୁ ମାଝୀ,ଦେଓଗାଁ ବ୍ଲକଯୁବ ବିଜେଡି ସଭାପତି ଶୈଳେନ୍ଦ୍ର ସାହୁ ପ୍ରମୁଖ ଉପସ୍ଥିତ ରହିଥିଲେ ।