20-Mar-2022

ବଲାଙ୍ଗୀର, ଆସନ୍ତା ପୌର ନିର୍ବାଚନରେ ବଲାଙ୍ଗୀରର ଅଗ୍ରଣୀ ସାମାଜିକ ଅନୁଷ୍ଠାନ ନେତାଜୀ ସଂଗ୍ରାମୀ ପରିଷଦ ତରଫରୁ ନୋଟା ଚିହ୍ନରେ ଭୋଟ ଦେବା ପାଇଁ ପଥପ୍ରାନ୍ତ ସଭା ସହରର ବିଭିନ୍ନ ସ୍ଥାନରେ କରାଯାଇଛି । ରାଜ୍ୟର ଦ୍ୱିତୀୟ କୃଷି ବିଶ୍ୱ ବିଦ୍ୟାଳୟ ପ୍ରତିଷ୍ଠା ପାଇଁ ବଲାଙ୍ଗୀରରେ ସମସ୍ତ ପ୍ରକାର ଭିତ୍ତିଭୂମି ଥିବା ସତ୍ୱେ ଏବଂ ରାଜ୍ୟ ସରକାର ପୂର୍ବରୁ କେବିକେ ଅଂଚଳରେ ଦ୍ୱିତୀୟ କୃଷି ବିଶ୍ୱ ବିଦ୍ୟାଳୟ ପ୍ରତିଷ୍ଠା ପାଇଁ ପ୍ରତିଶୃତି ଦେଇ ମଧ୍ୟ ଆଜି ପର୍ଯ୍ୟନ୍ତ ଏହି ପ୍ରକଳ୍ପର ବ୍ୟବସ୍ଥା ହୋଇପାରି ନାହିଁ । ନେତାଜୀ ସଂଗ୍ରାମୀ ପରିଷଦ ପୂର୍ବରୁ ବିଭିନ୍ନ ସଭା ସମିତି, ଆଲୋଚନାଚକ୍ର ଓ ଜିଲ୍ଲାପାଳଙ୍କ ଅଫିସ ସମ୍ମୁଖରେ ଧାରଣା ଏବଂ ରାଜ୍ୟ ସରକାରଙ୍କୁ ବିଭିନ୍ନ ସମୟରେ ଦାବିପତ୍ର ଦିଆ ଯାଇଥିବା ସତ୍ତ୍ୱେ 
ତାହା ଆଜି ପର୍ଯ୍ୟନ୍ତ କାର୍ଯ୍ୟକାରୀ ହୋଇପାରି ନାହିଁ । ଆସନ୍ତା ପୌର ନିର୍ବାଚନରେ ସରକାରଙ୍କ ଦୃଷ୍ଟିଭଙ୍ଗୀ ପରିବର୍ତ୍ତନ ପାଇଁ ନୋଟା ଚିହ୍ନରେ ଭୋଟ ଦେଇ ଏକ ଅଭିନବ ବାର୍ତ୍ତା ଦେବାକୁ ନେତାଜୀ ସଂଗ୍ରାମୀ ପରିଷଦ ଏବଂ ଅଗ୍ରଣୀ ସାମାଜିକ ଅନୁଷ୍ଠାନ ଲୋକମିତ୍ର ସଂଗଠନ ବଲାଙ୍ଗୀର ଜନସାଧାରଣଙ୍କୁ ପଥପ୍ରାନ୍ତ ସଭା ମାଧ୍ୟମରେ ନିବେଦନ କରିଅଛି । ଶିଳ୍ପ ବିହୀନ ବଲାଙ୍ଗୀର ଜିଲ୍ଲାର ବିକାଶ ପାଇଁ ଏହି ମାଧ୍ୟମ ନିଶ୍ଚୟ ଫଳପ୍ରଶୁ ହୋଇ ରାଜ୍ୟ ସରକାରଙ୍କ ଆଖି ଖୋଲି ଦେବ ବୋଲି ପରିଷଦ ପକ୍ଷରୁ ନିବେଦନ କରାଯାଇଛି ।  ଏହି ପଦକ୍ଷେପ ଆଗାମୀ ଦିନରେ ଏକ ବିରାଟ ଆନ୍ଦୋଳନର ରୂପ ନେବ ଏବଂ ବଲାଙ୍ଗୀରର ସଚେତନଶୀଳ ଜନସାଧାରଣ ବହୁଳ ଭାବେ ନୋଟା ରେ ଭୋଟ ଦେଇ ଏକ ବିକାଶଶୀଳ ବଲାଙ୍ଗୀର ଗଠନରେ ସହାୟକ ହୁଅନ୍ତୁ ବୋଲି ପରିଷଦ ବିନମ୍ର ନିବେଦନ କରିଛି ।