19-Mar-2022

ବଲାଙ୍ଗୀର,(ଅନ୍ତର୍ଯ୍ୟାମୀ ସାହୁ) ବଲାଙ୍ଗୀର ଜିଲ୍ଲା ପାଟଣାଗଡ଼ ସବଡିଭିଜନ ଖପ୍ରାଖୋଲ ବ୍ଲକ ଲାଠୋର ପଂଚାୟତ ଜୁନିୟର କଲେଜରେ ଚଳିତ ୨ଠ୨୧-୨୨ ଶିକ୍ଷା ବର୍ଷରେ ସିଟ ସଂଖ୍ୟା ୧୯୨ରୁ ୯୬ କୁ ହ୍ରାସ ପାଇଥିବା ଯୋଗୁଁ  ଅନେକ ମେଧାବୀ ଛାତ୍ରଛାତ୍ରୀ ଏହି କଲେଜରରେ ପାଠ ପଢ଼ିବାର ସୁବିଧାରୁ ବଂଚିତ ହୋଇଛନ୍ତି । କଲେଜରେ କ୍ରମାଗତ ଭlବରେ  ପରୀକ୍ଷା ଫଳ ନୈରାଶ୍ୟଜନକ ରହୁଥିବା ଯୋଗୁଁ ତତ୍କାଳୀନ କମିଟିର ନିଷ୍ପତ୍ତି ମୁତାବକ ସିଟ ସଂଖ୍ୟା ହ୍ରାସ କରାଯାଇଥିବା ଜଣାପଡିଛି lଏଥିସହ ଏହି ଏହି ଜୁନିୟର କଲେଜରେ ଚାଲିଥିବା ଏକାଧିକ ଅନିୟମିତତା ଓ ପରିଚାଳନାଗତ ତୃଟି ଯୋଗୁଁ ଉଭୟ ଛାତ୍ରଛାତ୍ରୀ ଓ ଅଭିଭାବକ ମହଲରେ ତୀବ୍ର ଅନ୍ତୋଷ ପ୍ରକାଶ ପାଇଛି । ସବୁଠାରୁ ବଡକଥା ହେଲା କଲେଜରେ ହୋଇଥିବା ଅଡିଟ ହିଁ   ଏହି ଶିକ୍ଷାନୁଷ୍ଠାନରେ ଚାଲିଥିବା ଦୁର୍ନୀତିକୁ ଆଙ୍ଗୁଳି ନିର୍ଦ୍ଦେଶ କରିଛି । କଲେଜର କଂପ୍ୟୁଟର, ସିସି ଟିଭି, ଆସବାବ ପତ୍ର, ଚୌକି ଟେବୁଲ ଓ ସିମେଣ୍ଟ କିଣାରେ ଏଠାରେ ବ୍ୟାପକ ଦୁର୍ନୀତି ହୋଇଥିବା ଜଣାପଡିଛି । କଲେଜ ପାଇଁ କଂପ୍ୟୁଟର କିଣା ବାବଦକୁ ୬୬ହଜାର ୨୫ଠ ଟଙ୍କାର ହେରଫେର ହୋଇଥିବା କଲେଜ ଅଡିଟରୁ ସ୍ପଷ୍ଟ ହୋଇଛି । କଲେଜରେ କାର୍ଯରତ ଅଧ୍ୟକ୍ଷ ନାରାୟଣ ପ୍ରଧାନ ବେଆଇନ ଭାବରେ ଏଠାରେ ଦୁଇ ଜଣ କର୍ମଚାରୀଙ୍କୁ ନିଯୁକ୍ତି ଦେଇଛନ୍ତି । ଅଧ୍ୟକ୍ଷ ଙ୍କ ସ୍ତ୍ରୀ  ନମିତା ସାହୁ ମଧ୍ୟ ଏଠlରେ ଜଣେ ଓଡ଼ିଆ ଅଧ୍ୟାପିକା ଭାବରେ କାର୍ଯ୍ୟ କରୁଛନ୍ତି । ତେବେ ବିନା ଇଣ୍ଟରଭ୍ୟୁ ଓ ରିଜୋଲେସନ ରେ ଏହି ନିଯୁକ୍ତି ପ୍ରଦାନ କରାଯାଇଥିବା ଅଭିଯୋଗ ହୋଇଛି l ସବୁଠାରୁ ବଡ କଥା ହେଲା ଏଠାରେ ପିଅନ ଭlବରେ କାର୍ଯ୍ୟ କରୁଥିବା ଚନ୍ଦ୍ରମଣି ଭଏଁସାଲ ନାମକ ଜଣେ ବ୍ୟକ୍ତି ଙ୍କୁ କେଉଁ ନ୍ୟାୟ ବଳରେ କଲେଜର କିରାଣୀ ଭାବରେ ନିଯୁକ୍ତି ଦିଆଗଲା, ତାହା ତଦନ୍ତ ସାପେକ୍ଷ l କଲେଜ ଅଡିଟ ସମୟରେ ହୋଇଥିବା ହେରଫେର ର ଅନୁସନ୍ଧାନ କରିବା ପରେ ଅଡିଟ ବିଭାଗ ପକ୍ଷରୁ ୫ଲକ୍ଷ ୬୧ହଜାର ଟଙ୍କାର ରିକୋଭରୀ କରିବା ପାଇଁ କଲେଜକୁ ନୋଟିସ (ମେମୋ ନମ୍ବର ୧୩୬୭ ଆଇଏଫ୍‌ଏ ତା- ୧୭.ଠ୫.୨୦୨୧) ମଧ୍ୟ ଦିଆଯାଇଛି । ଏ ସମସ୍ତ ଅଭିଯୋଗ ସଂପର୍କରେ ଆମେ କଲେଜର ଅଧ୍ୟକ୍ଷ ନାରାୟଣ ପ୍ରଧାନଙ୍କୁ ପଚାରିବାରୁ ସେ ଅଭିଯୋଗ କୁ ଅସ୍ୱୀକାର କରିବା ସହ କଲେଜର ସିଟ୍ ସଂଖ୍ୟା କମାଇବାରେ ଯେଉଁ ନ୍ୟସ୍ତସ୍ୱାର୍ଥ ବ୍ୟକ୍ତି ଙ୍କ ହାତ ରହିଛି ସେମାନଙ୍କ ମୁଖା ଖୋଲାଯାଉ ବୋଲି କହିଥିଲେ । କଲେଜରେ ସିଟ୍ ସଂଖ୍ୟା ବୃଦ୍ଧି ପାଇଁ ରାଜ୍ୟ ଶିକ୍ଷା ବିଭାଗକୁ ଅବଗତି କରାଯାଇଛି ଏବଂ ହାଇକୋର୍ଟର ନିର୍ଦ୍ଦେଶ ମୁତାବକ ଆସନ୍ତା ବର୍ଷ ଠାରୁ କଲେଜର ସିଟ୍ ସଂଖ୍ୟା ବୃଦ୍ଧି ହେବ ତଥା ପାଠପଢ଼ା ସ୍ୱାଭାବିକ ହେବ ବୋଲି ଶ୍ରୀ ପ୍ରଧାନ କହିଥିଲେ । କଲେଜ ପରିଚାଳନା କମିଟିର ସଭାପତି ଭାବରେ ପାଟଣାଗଡ଼ ଉପଜିଲ୍ଲାପାଳ ଦାୟିତ୍ୱ ନେଇଥିବା ବେଳେ କଲେଜରେ ଚାଲିଥିବା ଏପରି ଅନିୟମିତତା ପ୍ରତି କାହାରି ଦୃଷ୍ଟି ପଡି ନାହିଁ । ଏହି ସମସ୍ତ ଘଟଣାର ଏକ ଉଚ୍ଚସ୍ତରୀୟ ତଦନ୍ତ କରାଯାଇ ଦୋଷୀ ବିରୁଦ୍ଧରେ କଡା କାର୍ଯ୍ୟାନୁଷ୍ଠାନ ଗ୍ରହଣ କରିବା ପାଇଁ ଜନସାଧାରଣ ଓ ଅଭିଭାବକ ମହଲରେ ଦାବି ହେଉଛି ।