13-Mar-2022

ବଲାଙ୍ଗୀର: (ମଳୟ ମିଶ୍ରଙ୍କ ରିପୋର୍ଟ): ସବୁ କଳ୍ପନାଜଳ୍ପନାର ଅନ୍ତଘଟାଇ ଶେଷମୁହୂର୍ତ୍ତରେ ବିଜେଡି ସମର୍ଥିତା ୧ ନମ୍ବର ଯୋନ୍ ଆଗଲପୁରର ଦେବକୀ ସାହୁ ବଲାଙ୍ଗୀର ଜିଲ୍ଲାପରିଷଦ ଅଧ୍ୟକ୍ଷା ଭାବେ ନିର୍ବାଚିତା ହୋଇଛନ୍ତି । ଚଳିତ ତ୍ରିସ୍ତରୀୟପଞ୍ଚାୟତ ନିର୍ବାଚନରେ ଜିଲ୍ଲାର ମୋଟ ୩୪ ଟି ଜିଲ୍ଲାପରିଷଦ ଆସନ ମଧ୍ୟରୁ ୨୪ଟି ଆସନ ଜିତି ଏକକ ସଂଖ୍ୟାଗରିଷ୍ଠତା ହାସଲ କରିଥିବା ବିଜେଡିର ଏହି ପ୍ରାର୍ଥିନୀଙ୍କ ମୁଣ୍ଡରେ ହାତୀ ସୁନାକଳସ ଢାଳିଲା । ଏହାପୂର୍ବରୁ ବିଜେଡିର ମନ୍ତ୍ରୀ ଟୁକୁନୀ ସାହୁଙ୍କ ଅନୁଗତା ଓ ରାଜପରିବାରର ଅନୁଗତ ଜଣେ ଯୁବ କର୍ମକର୍ତ୍ତାଙ୍କ ପତ୍ନୀଙ୍କ ସମେତ ଲୋଇସିଂହା ଅଞ୍ଚଳର ଅନ୍ୟଜଣେ ଜି

 ପରିଷଦ ସଦସ୍ୟାଙ୍କ ନାଁ' ଶେଷପର୍ଯ୍ୟନ୍ତ ଚର୍ଚ୍ଚାରେ ରହିଥିଲା । ଏହି ଆସନଟି ପୁଣିଥରେ ଆଗଲପୁର ବାଜି ମାରିନେଲା । କାରଣ ଗତଥର ବିଜେପିରୁ ଆଗଲପୁର ଅଞ୍ଚଳର ଏହି ଯୋନ୍ ରୁ ହିଁ ସଂରକ୍ଷିତ ମହିଳା ଆସନରେ ଅଧ୍ୟକ୍ଷା ରହିଥିଲେ । ଏଥର ଏଇ ଆସନଟି ସାଧାରଣ ବର୍ଗର ମହିଳାଙ୍କ ନିମନ୍ତେ ସଂରକ୍ଷିତ ରହିଛି ।

ଶ୍ରୀମତୀ ସାହୁ ବାବୁ ଫାସଡ ପଞ୍ଚାୟତର ପୂର୍ବତନ ସରପଞ୍ଚ  ଓ ସମାଜସେବିକା ଅଟନ୍ତି । ତାଙ୍କୁ ଏହି ପଦ ମିଳିବାରେ ଜିଲ୍ଲାରେ ଥିବା ଦଳର ଅନ୍ତର୍ବିବାଦର ସମାଧାନ ହେବା ସହିତ ଜିଲ୍ଲାର ନିର୍ବାଚନ ସଂଗଠନ ଦାୟିତ୍ୱରେ ଥିବା ଶ୍ରମମନ୍ତ୍ରୀ ସୁଶାନ୍ତ ସିଂ ଙ୍କର ପ୍ରଭାବ ଏବଂ ପୂର୍ବତନ ମନ୍ତ୍ରୀ ଯୋଗେନ୍ଦ୍ର ବେହେରାଙ୍କ କନିଷ୍ଠ ପୁତ୍ର ଯୁବବିଜେଡିନେତା ତଥା ଲୋଇସିଂହା ବିଧାନସଭା ଆସନ ପ୍ରତ୍ୟାଶୀ ନିହାର ରଞ୍ଜନ ବେହେରାଙ୍କ ପତିଆରା ବୃଦ୍ଧି ପାଇଲା ବୋଲି କୁହାଯାଉଛି । ତାଙ୍କୁ ଜିଲ୍ଲାର ବିଭିନ୍ନ ଆଡୁ ଶୁଭେଚ୍ଛାର ସୁଅ ଛୁଟୁଛି ।